Psalms 60

Amharic Dawro DFBLVL (Geeshsha Mas'aafaa)

1Abeet S'oossaw, neeni nuuna aggaada; nuuna mentsaadda. Neeni nuuna hank'k'ettaadda; shin ha"i nuukko simma.

2Neeni biittaa k'aatsaadanne za'issaadda; biittay kokkoriyaa diraw, neeni Aa za'uwaa bara.

3Neeni ne asaa metuwaa bessaadda; neeni nuuna ganddigaarissiyaa woyniyaa ushshaadda.

4New yayyiyaawanttu, barenttu morkkiyaa wonddaafiyaappe attana mala, malaa immaadda.

5Neeni siik'iyaawanttu attana mala, ne ushechcha kushiyan nuuna ashsha; neeni nuw alla.

6S'oossay bare geeshsha sa'aan hawaadan yaageedda; «Taani s'oonaade Sekeema biittaa shaakkana; k'ay Sukkoota zanggaaraa likkana.

7Gala'aade tawaa; Minaasekka taassa; Efireemi ta huup'iyaa naagiyaa k'oobiyaa; Yihuday ta kawutetsaa s'am"aa.

8Moo'aabe taani meec'ettiyaa kuyis'aaruwaa; Eedoomi tawaa gidiyaawaa erissanaw ta c'aammaa Aa bolla wotsay; Taani Piliss's'eema s'oonaade gereeray» yaageedda.

9Gimbbetteedda katamaakko, taana oonee afanawe? Eedooma gakkanaw taana oonee kaaletsanawe?

10Abeet S'oossaw, nuuna aggeedawe neena gidikkii? Abeet S'oossaw, neeni nu tooranchchatuwaanna olaw kesakka.

11Asaa maaduu patsenna diraw, morkkiyaanna olettanaw neeni nuuna maadda.

12S'oossaa wolk'k'an nu morkkatuwaa nuuni s'oonana; nu morkkatuwaa yed'd'anawe Aa.

← Chapter 59 Chapter 61 →