Psalms 56

Amharic Dawro DFBLVL (Geeshsha Mas'aafaa)

1Abeet S'oossaw, asatuu taana yederssiyaa dirawunne gallassaa ubbankka ta morkketuu taana un"etseedda diraw, taw k'aretta.

2Ta morkketuu gallassaa ubbaan taana yederssiino; C'oratuu otoruwaan taana un"etsiino.

3Taani yayyeedda wode, neenan ammanettay.

4Taani S'oossan ammanettay; Taani Aa k'aalaa galatiyaa S'oossan ammanettaynne yayyikke. Asay taana ayaa ootsanee?

5Gallassaa ubbaan ta morkketuu, taw metuwaa med'd'iino; Unttunttu ubbaa gede taw iitabaa k'oppiino.

6Unttunttu ta bolla mak'ettiino; kuukuliide wochchiinonne ta ogiyaa naagiino; taana wod'anaw koyiino.

7Unttunttu iitatetsaa diraw, unttuntta yeddoppa; ne hank'k'uwaan he asatuwaa zik'k'i ootsa.

8Neeni taani toyilakattowaa paydaadda. Taani woyssa afotsaa gussaadditantto, neeni eraasa. Unttunttu ne mazggobiyaan de'ikkinoo?

9Taani neena s'eesiyaa wode, ta morkketuu guyye simmana. S'oossay ta bagga gidiyaawaa taani eray.

10Taani Aa k'aalaa galatiyaa S'oossay, taani Aa k'aalaa galatiyaa Med'inaa Godaa,

11taani he S'oossan ammanettay; yayyikke. Asay taana ay ootsanee?

12Abeet S'oossaw, taani, new shiik'etteeddawaa ootsana; Hewaa galataa yarshshuwaa taani new immana.

13Ayaw gooppe, neeni taana hayk'k'uwaappe, ta gediyaa kunddetsaappe ashshaada. Hewaa diraw, I pas'a de'iyaawanttu bollan poo'issiyaa poo'uwaan S'oossaa sintsan taani hamettay.

← Chapter 55 Chapter 57 →