Psalms 10

Amharic Dawro DFBLVL (Geeshsha Mas'aafaa)

1Abeet Med'inaa Godaw, ayaw haakkaade ek'k'ay? Metuwaa wodiyaan ayaw neeni geemmay?

2Bare otoruwaan iita Asay hiyyeesaa shankkatee. Unttunttu barenttu pala mak'k'uwaan barenttoo oyk'k'ettino.

3He iitay bare wozanaa iita amuwaan c'eek'ettee; yoranchchay Med'inaa Godaa bolla iita k'aalaa haasayeenne kaddee.

4Iitay bare otoruwaan S'oossaa koyenna; bare k'ofa ubbankka S'oossaa ayinne koyenna.

5Ubbabay aw ubbaa wodekka kumee; I otoruwaa p'ees's'alee. Ne higgii aw gelenna; bare morkkatuwaa bollan I k'iliic'ee.

6Bare wozanaan I, «Taana ayaynne k'aatsenna. Taana ubbakka metuu gakkenna» yaagiide k'oppee.

7Aa doonaan shek'ay, wordduunne manddetsay kumeedda. Bare ins's'arssan genebaanne iitabaa haasayanaw elleellee.

8Heeraan k'osettiyaasan I zuggiide uttee. Bare wod'iyaawaa wod'anaw k'osetti naagiidde, wolk'k'ay bayinna ashkketuwaa s'eellee.

9Bare k'osettiyaasan geemmiide, hiyyeesaa oyk'k'anaw gaammuwaadan zuggee. I hiyyeesaa oyk'k'iide, bare p'iriyaan goochchiide afee.

10Yaatina, wolk'k'ay bayinna hiyyeesay shoc'etee; nippi geenne he minuwaan s'oonettee.

11I bare wozanaan, «S'oossay taana dogi kichcheedda. Bare som"uwaa taappe gentsi kichcheedda; ubbakka I be'enna» yaagee.

12Abeet Med'inaa Godaw, dendda. S'oossaw, ne kushiyaa d'ok'k'u ootsaade dentsa; hiyyeesaa dogoppa.

13Nagaranchcha uray bare wozanaan, S'oossaa ayaw kad'ii? Bare k'ofankka, «S'oossay taana murena» ayaw yaagii?

14Shin S'oossaw, neeni tumukka be'aasa; metuwaakka waayiyaakka s'eellaasa. Neeni ubbaa wode nuuna maaddanaw giiga uttaadda. Yii'atoo neeni maaduwaa. K'ohetteeddawe neeni maaddanaadan barena new sheed'd'e.

15Geniyaawanttu wolk'k'aa neeni wurssa; Iita asatuwaakka hewaadda ootsa. Laa"entso unttunttu giddon iitatetsay beettena mala unttuntta mura.

16Med'inaa Goday med'i med'inaw kaatetiide de'ee; hara kawutetsatuu Aa biittaappe d'ayana.

17Abeet Med'inaa Godaw, neeni barentta kawushshiyaawanttu amuwaa sisaasa. Neeni unttuntta mintsetsaasa.

18Yi'atoone un"etteeddawanttoo tumuwaa pirddaa; sa'aan de'iyaa asay, unttuntta yashissenna mala, Unttunttu waasuwaa sisaasa.

← Chapter 9 Chapter 11 →