Zechariah 6

Amharic Dawro DFBE (ጌሻ ማጻፋ) No Year

1ቃይካ ታን ቁ ጋደ ጼላድ፤ ጼልያ ዎደ ኦይዱ ፓራ ጋረቱ ላኡ ደረቱዋፐ ግዱዋና ይያዋንታ በኣድ፤ ደረቱካ ቃይ ናሃሰ ግያ ብራታ ደረቱዋ።

2ኮይሮ ፓራ ጋርያ ዞኦ ፓራቱ ጎቺኖ፤ ላኤን ፓራ ጋርያ ካረ ፓራቱ ጎቺኖ፤

3ሄዘን ፓራ ጋርያ ቦ ፓራቱ ጎቺኖ፤ ኦይደን ፓራ ጋርያ ዋንጮ ፓራቱ ጎቺኖ፤ ኡንቱንቱ ኡባቱካ ዎልቃማ።

4ታን ታናና ሃሳይያ ኪታንቻ፥ “ታ ጎዳዉ፥ ሀዋንቱ አዬ?” ያጋደ ኦቻድ።

5ኪታንቻይ፥ “ሀዋንቱ ሳኣ ኡባ ጎዳ ስንን ባረና ሺሺደ ከስያ ኦይዱ ሳሉዋ ጫርኮቱዋ።

6ካረ ፓራቱ ጎችያ ጋሪ ሁጲሳ ባጋ ቢታ ቤ፤ ቦ ፓራቱ ጎችያ ጋሪ አዋይ ዶልያ ባጋ ቤ፤ ዋንጮ ፓራቱ ጎችያ ጋሪ ቃይ ገድሳ ባጋ ቤ” ያጊደ ዛሬዳ።

7ሄ ፓራቱ ከሴዳ ዎደ፥ ቢታ ኡባ ዩዪደ ጾሞሳናዉ ፓቹሪኖ። ኪታንቻይ ኡንቱንታ፥ “ቢተ፥ ቢታ ኡባ ዩዪደ ጾሞስተ” ያጌዳ። ኡንቱንቱ ቢታ ኡባ ዩዪደ ዎቼድኖ።

8ሄዋፐ ጉይያን፥ ኪታንቻይ ባረ ቃላ ቁ ኦ ታኮ ዋሲደ፥ “በአ፥ ሁጲሳ ባጋ ቢታ ቤዳ ፓራቱ ባረንቱ ቤዳ ሁጲሳ ባጋ ጋድያን ጾሳ አያና ሸምፕሴድኖ” ያጌዳ።

9መና ጎዳ ቃላይ ታኮ፥ ቃይካ ሀዋዳን ያጊድ ዬዳ፤

10“ባብሎነ ኦሞዱዋፐ ስሜዳ ሄልዳይ፥ ጾቢነ ያዳይ እምያ እሞታ አካ፤ ሄ ጋላስካ ጻፋንያ ናኣ እዮስያሳ ጎለ ባ።

11ኡንቱንቱፐ አኬዳ ብራፐነ ዎርቃፐ ካላቻ መ፤ እዮጸዴቃ ናኣ፥ ቄስያ ኡባቱ ካፑዋ ኢያሱ ሁጲያን ዎ።

12አዉ፥ ‘ኡባፐ ዎልቃማ መና ጎዳይ ሀዋዳን ያጌ፤ “በአ፥ አ ሱንይ ታሽያ ጌተትያ እት ብታኒ ባረ ደእያ ሳን ድጫና፤ እ መና ጎዳ ጌሻ ጎልያ ዛር ኬጻና።

13መና ጎዳ ጌሻ ጎልያ ኬጻናዌ አ፤ እ ካትያዳን ቦንቹዋ ማዪደ፥ ባረ ካተቱዋ አራታን ኡታናነ ሞዳና። ቃይ እ ባረ አራታን ኡቲደ ቄሰተን ኦና፤ ኡንቱንቱ ላኡ ባረንቱ ቆፋን እቱዋ ግዳና” ያጌ’ ያጋ።

14ሄ ካላቻይ ሄልዳያ፥ ጾቢያ፥ ያዳያነ ጻፋንያ ናኣ እዮስያሳ ሀሳይስያዋ ግዲደ፥ መና ጎዳ ጌሻ ጎልያን ደአና” ያጌዳ።

15ሄ ዎደ ሃኮ ሳን ደእያዋንቱ መና ጎዳ ጌሻ ጎልያ ኬጺደ ማዳናዉ ያና። ኡባፐ ዎልቃማ መና ጎዳይካ ታና ህንተኮ ኪቴዳዋ ህንተ ሄዋን ኤራና። መና ጎዳዉ፥ ህንተ ጾሳዉ፥ ህንተ ፖሎ አዛዘቶፐ፥ ሄዌ ሀናና።

← Chapter 5 Chapter 7 →