Song of Solomon 5

Amharic Dawro DFBE (ጌሻ ማጻፋ) No Year

1ታ ሲቆ ምቻቶ ግድያ ታ ምሽራተ፥ በአ፤ ታን ታ አታክልትያ ግዶ ገላድ። ታ ካርቢያነ ታ ሽቱዋ ጪሻ ቆራይ። ኤሳ ኡክ ዮልታያደ ማይ። ታ ዎይንያ ኤሳነ ታ ማ ኡሻይ ያጌዳ። ህንተኖ፥ አ ላገቶ፥ ሲቁዋ አላና ጋካናዉ ኡሽተ ያጌድኖ።

2ታን ቃማ ገምእሻድ፤ ሽን ታ ዎዛናይ ቤጎት ኡቴዳ። ታ አኩሙዋን ታ ሲቁ ሀዋዳን ያጊደ፥ ፐንግያ ቆጺና ስሳድ፤ ታ ሙሹራቴ፥ ታ ሲቃቴ፥ ኔናን ዎያዌ ባይና ታ ሀራጳተ፥ ታዉ ካርያ ዶያ፤ ታ ሁጲ ከተርሳን ካኤዳ። ታ ብናናይካ ቃማ ፑስያን ናርካኬዳ ያጌ።

3ታን፥ ታ ማዩዋ ቃራ ድጋድ፤ ዛራ ማዮየ? ታ ገድያ ሜጨታ ክቻድ፤ ዛራደ ኡርቃዮየ? ያጋድ።

4ታ ሲቁ እፍ ጾእያና ባረ ኩሽያ ጎለ የዴዳ፤ ታ ዎዛናይ አ ድራዉ ፖድ ፖዴ።

5ያትና፥ ታ ሲቆ ካርያ ዶያናዉ ደንዳድ። ካርያ ዶይያ ኩልቡዋ ታን ኦይቂያ ዎደ፥ ታ ኩሽያፐ ካርቢ፥ ታ ብራያፐ ሽቱ ጾኬ።

6ታ ሲቆ ካርያ ዶያድ፤ ሽን ዶይያ ዎደ እ ባዋ ብ ክቼዳ። አ ኮሻ ስሳናዉ ሎይ አሞታድ። ምንደ አ ኮያድ፤ ሽን ደማናዉ ዳንዳያበይከ። ጼጋድ፤ ሽን ታዉ ኮይቤና።

7ዩዪደ ካታማ ናግያዋንቱ ታና ደሚደ፥ ዋድኖነ ማዱድኖ፤ ካታማ ድርሳ ናግያዋንቱ ታ ቁማዩዋ ቃር አኬድኖ።

8ህንተኖ የሩሳላመ ጌላዮቶ፥ ታ ሲቁዋ ደሞፐ፥ ታን አ ሲቁዋፐ ደንዴዳዋን ሀርግያዋ፥ ሀዳራ፥ አዉ ኦድተ ያጋዱ።

9ኔኖ፥ ማጫ አሳ ኡባፐ አዳ ማላንቻቴ! ነ ሲቁ ቱሙ ሀራቱዋፐ ዋን ዱማቲ? ኔን ሀዋ ኬሻ ኑና ጫልያዌ፥ እ ሀራቱዋፐ ዱማትያዌ አያኔ? ያጌድኖ።

10ታ ሲቁ ዳሮ ሎእያዋነ ምና፤ ታሙ ሻኡ አቱማ አሳ ግዶን አ ማል ባዋ።

11አ ሁጲ ዎርቃ ሉልያ ማላቴ፤ አ ብናናይካ ሎአነ ቁሩዋ ማላ ካረ።

12አ አይፊ ሻፋ ላንቂያን ኤቄዳነ፥ ማን ሜጨቴዳዋ ማላትያ ሀራጰቱዋ ማላቴ።

13አ ጋጮቱካ ሳዉዋ ማታይነ፥ ቅማሚ ቶከቴዳ አታክልትያዳን ሎኢኖ፤ አ መተርሻቱ ካርቢያ ሽቱ ጾክያ ዎራ ጪሻዳን ሎኢኖ።

14አ ኩሸቱ እንቁዋን አሌቀቴዳ ዎርቃ ጻምኣዳን ሎኢኖ፤ አ አሳተይ ሳምፔርያ ግያ እንቁዋን አሌቀቴዳ፥ ዳንጋርሳ አቻ ማላ።

15አ ገደቱ ዎርቃ ባሱዋን ቶከቴዳ፥ እብናባራድያ ቱሳ ማላቲኖ፤ አ ማላይ ዝጋን አሌቀቴዳ ሊባኖሳ አሳ ማላ።

16አ ዶናይ ኤሳዳን ማልኤ። እ ኡባናካ ሎእያዋ። ህንተኖ የሩሳላመ ዎዶራቶ፥ ታ ሲቁነ ታ ላጊ ሀዋ ማላቴ ያጋዱ።

← Chapter 4 Chapter 6 →