Romans 11

Amharic Dawro DFBE (ጌሻ ማጻፋ) No Year

1ያትና፥ ጾሳይ ባረ አሳ እጼደ ጋደ ኦቾ? ሄዋ ግደና፤ አያዉ ጎፐ፥ ታን ታ ሁጰዉ እስራኤልያ አሳ፤ አብራሃመ ዛረ፤ ቢንያማ ያራ።

2ጾሳይ ኮይሮ ዶሬዳ ባረ አሳቱዋ እጸና፤ ጾሳ ማጻፋይ፥ ኤላሳ ታርክያ ግዶን፥ ኤላስ እስራኤላቱዋ ጾሳ ስንን ዎት ሞትንቶ፥ ህንተ ኤሪታ።

3“ጎዳዉ፥ ኡንቱንቱ ሄ ሱንን ናባቱዋ ዎድኖ፤ ነ ያርሽያ ሳካ ኮሌድኖ። ያትና፥ ታን ታ ጻላላይ አታድ። ቃይ ኡንቱንቱ ታናካ ዎናዉ ኮዪኖ” ያጌዳ።

4ጾሳይ አዉ ዋግ ዛሬዴ? “ታን ኤቃ ባኣላዉ ጉልባትቤና ላፑ ሻአ አሳ ታዉ አሻድ” ያጌዳ።

5ሀዋዳንካ ቃይ ሀ ዎድያን፥ ጾሳይ ባረ አ ኬካተን ዶሬዳ አማሬዳ አሳቱ ደኢኖ።

6ሽን እ ባረ አ ኬካተን ዶሬዳፐ አትን፥ ኡንቱንቱ ኦሱዋን ኡንቱንታ ዶርቤና፤ ሄዌ ዮፐ፥ አ አ ኬካተይ ቱሙ አ ኬካተ ግደና።

7ያትና፥ አዬ? እስራኤልያ አሳቱ ባረንቱ ኮይያዋ ደምበይክኖ፤ ሽን ጾሳይ ዶሬዳ አማሬዳዋንቱ ደሜድኖ። የኮንቱ ዎዛናይ ምኔዳ።

8ሀዋዳንካ፥ ጾሳ ማጻፋይ፥ “ጾሳይ ኡንቱንቱ ባረንቱ አይፍያን በኤናዳንነ ባረንቱ ሀይን ስሰናዳን፥ ሀዋ ጋካናዉ ኡንቱንቶ፥ አዛላ አያና እሜዳ” ያጌዳ።

9ቃይ ዳዊተ ያጌዳ፤ “ኡንቱንቱ ምያ ጋይታይ ኡንቱንታ ጲርያዳን ኦይቆ፤ ኡንቱንታ ጉፋን፤ ኡንቱንቶ ኩሽያ ሽር ጭጎ።

10ኡንቱንቱ ጼለናዳን፥ ኡንቱንቱ አይፊ ጎዘቶ፤ ኡባ ዎደ ባረንቱ መቱዋን ቁኒደ ደኢኖ” ያጌዳ።

11ያትና፥ አይሁዳቱ በቴዳ ዎደ፥ ደንደናዳን ኩንዴድኖ? ሄዋ ግደና፤ ኡንቱንቱ ናጋራ ኦዳ ድራዉ፥ አቶተይ ኡንቱንቱ አይሁዳ ግደና አሳቱዋ ቃናታናዳን፥ አይሁዳ ግደና አሳዉ ዬዳ።

12ሽን አይሁዳቱ ናጋራ ኦዳ ድራዉ፥ አላመዉ ዳሮ አንጁ ዬዳ፤ ቃይ ኡንቱንቱ ኩንደይካ አይሁዳ ግደና አሳዉ ዳሮ አንጁዋ አሄዳ። ያትና፥ አይሁዳቱ ኡባይ ጉጀትያ ዎደ፥ አንጁ ዎይሳ ኬና ዳራንዴሻ!

13ሽን ታን ሀእ ህንተንቶ፥ አይሁዳ ግደና አሳዉ ሃሳያይ፤ ታን አይሁዳ ግደና አሳዉ የሱስ ኪቴዳዋ ግድያ ድራዉ፥ ታ ኦሱዋ ቦንቻና።

14ታን ታ ዛረ ግድያ አሳቱዋ ቃናታንቻቱዋ ኦፐ፥ ኦን ኤር ኡንቱንቱፐ አማሬዳዋንታ አሸናን አግከ።

15አያዉ ጎፐ፥ ጾሳይ ኡንቱንታ እጼዳ ዎደ፥ ሀ አላሚ ጾሳና ስገቴዳ። ያትና ጾሳይ ኡንቱንታ ሺሽ አክያ ዎደ፥ ሀይቄዳዌ ደኡዋ ደማናፐ አትን፥ አዬ ሀናኔ?

16ኮይሮ አይፈ ባጋ ሙናቃይ አንጀቴዳዋ ግዶፐ፥ ሙመ ሙናቃይካ ቃይ አንጀቴዳዋ ግዳና፤ እት ም ጻጱ አንጀቴዳዋ ግዶፐ፥ ሀይይ ኡባይካ ቃይ አንጀቴዳዋ ግዳና።

17ሽን ዎራን ዶሌዳ ዎጋራ ም ቃንካፐ እቱዋ እቱዋ ካሬዳሳን፥ ኔና ዎራን ዶሌዳ ዎጋራ ም ማላ ሄ ዎጋራና ጋ ቃቼዶ፤ ኔን ቃይ ዛይቲ ከስያ ዎጋራ ም ጻጱዋና እትፐ ደኣ።

18ስም ኔን ሄ ካረት ዎዳ ቃንካቱዋ ቦላን ኦቶረታናዉ በሰና፤ ሽን ኔን ኦቶረትያዋ ግዶፐካ፥ ጻጱ ኔና ቶኬፐ አትን፥ ኔን ጻጱዋ ቶከናዋ አኬካ።

19ሄዋ ድራዉ ኔን፥ “ኤ፤ ሽን ቃንካቱ ታን ኡንቱንቱ ሳኣን ገላናዳን ካረቴድኖ” ያጋና።

20ሄዌ ቱማ፤ ኡንቱንቱ አማንቤና ድራዉ፥ ካረቴድኖ፤ ኔን አማኔዳ ድራዉ፥ ሄ ሳኣን ኤቃዳ። ሽን ያያፐ አትን፥ ኦቶሮ ቆፋ ቆፖፓ።

21አያዉ ጎፐ፥ ጾሳይ መታ ቃንካ ማላትያዋንቶ፥ አይሁዳቶ ቃረትቤናዋ ግዶፐ፥ ነዉ ቃረትያዋ ማላቲ?

22ስም ጾሳ ኬካተነ ጻላተ በአ። ኩንዴዳዋንቶ እ ጻላ፤ ሽን ኔን አ ኬካተን ምናደ ደኦፐ፥ እ ነዉ ኬካ፤ ሄዌ ዮፐ፥ ኔንካ ቃይ ቃንጸታና።

23አይሁዳቱካ ቃይ አማነናን እጽያዋ አጎፐ፥ ጾሳይ ካሰ ኡንቱንቱ ደእያ ሳን ዛሪደ ዎና፤ አያዉ ጎፐ፥ እ ኡንቱንታ ዛሪደ ዎናዉ ዳንዳዬ።

24አያዉ ጎፐ፥ ጾሳይ ህንተንታ ዎራን ደእያ ኮይሮ መታ ዎጋራ ምፐ ቃንጺደ፥ ህንተንቱ መታን ዎራን ዶሎዋንቱዳን ግደናን ጋደን ቶኬዳ ዎጋራ ምና ጋ ኦይዳዋ ግዶፐ፥ ያትና፥ ሄ ካረት ዎዳ ኮይሮ መታ ቃንካቱዋ ዛረደ፥ ኡንቱንታ ኮይሮ መታን ዶሌዳ ባረንቱ ዎጋራ ምና ጋ ቃቻናዉ፥ አ አዬ ጾናናዌ?

25ታናዳን አማንያዋንቶ፥ ታን ህንተ ኤራናዳን ኮይያ ቱሙ ጹራ የዉ ደኤ፤ ሄዌ ህንተ ህንተንታ ህንተረካ፥ ኑን አዳ ኤራንቻ ያጊደ ቆፕያዋ ድጌ፤ እስራኤልያ አሳፐ ባጋይ ስሰናን እጼዳ፤ ሽን ሄ ስሰናን እጽያዌ አይሁዳ ግደና አሳ ኩመን ፓይዱ ጾሳኮ ጋካናዉ ጋምአና።

26ሀዋዳንካ፥ እስራኤልያ አሳይ ኡባይ አታና፤ ጾሳ ማጻፋይ ሀዋዳን ያጌ፤ “አሽያዌ ጽዮነ ጌተትያ ካታማፐ ዪደ፥ ናጋራ ኦሱዋ ኡባ ያቆባ ዛርያፐ ድጋና።

27ታን ኡንቱንቱ ናጋራ አቶ ያግያ ዎደ፥ ኡንቱንቱና ገላና ቃላ ጫቁ ሀዋ” ያጌ።

28አይሁዳ ግደና አሳቶ፥ አይሁዳቱ ዎንጋላ ምሽራቹዋ ባጋና ህንተ ድራዉ፥ ጾሳና ሞርከ፤ ሽን ጾሳ ዶሩዋ ባጋና አዎቱዋ ድራዉ፥ ኡንቱንቱ እ ሲቅያዋንታ።

29አያዉ ጎፐ፥ ጾሳይ ባረ እሜዳዋ ጉየ አከና፤ ቃይ ባረ ጼሴዳዋ እጻድ ጌና።

30አይሁዳ ግደናዋንቶ፥ ጾሳዉ ህንተ ካሰና አዛዘትበይክታ፤ ሽን አይሁዳቱ አዛዘተናን እጼዳ ድራዉ፥ ጾሳ ማሮተ ሀእ ህንተ አኬድታ።

31ሀዋዳን፥ ህንተ አኬዳ ማሮተ ድራዉ፥ አይሁዳቱ ቃይ ጾሳ ማሮተ ሀእ አካናዳን፥ ጾሳዉ አዛዘተናን እጼድኖ።

32አያዉ ጎፐ፥ ጾሳይ አሳ ኡባ ማራና ማላ፥ አሳይ ኡባይ አዉ አዛዘተናን እጽያ ሀኖታን ቃቼዳ።

33ጾሳ ዱረተይ ዎይሳ ኬና ዳሬ? አ አ ኤራተይነ አ ኤራተይ ዎይሳ ኬና ጪሜ? አ ፕርዳ ኦዳናዌ ኦኔ? እ ባረ ኦያዋ አያዉ ኦንቶ፥ ኦኔ አኬክያዌ?

34ሄዋ ጾሳ ማጻፋይ፥ “ጎዳ ዎዛና ኤርያዌ ኦኔ? አ ዞራናዉ ዳንዳይያዌ ኦኔ?

35ዎይ ባረ ኩሽያ ዛራና ማላ፥ አዉ እትባ እሜዳዌ ደኢ?” ያጌ።

36አያዉ ጎፐ፥ ኡባባ እ መዳ፤ ቃይ ኡባባይካ አ ማታንነ አዉነ ደኤ፤ ጾሳዉ መናዉ ቦንቹ ግዶ። አመንእ።

← Chapter 10 Chapter 12 →