Psalms 95

Amharic Dawro DFBE (ጌሻ ማጻፋ) No Year

1ሃይተ፤ አነ መና ጎዳ ሳቦይተ። ኑና አሽያ ዛላዉ ናሸቻዉ የጾይተ።

2አ ስን ጋላታና ሺቆይተ። ጋላታ የ ናሸቻን የጾይተ።

3አያዉ ጎፐ፥ መና ጎዳይ ዎልቃማ ጾሳ፥ ጾሳቱዋ ኡባ ቦላ ዎልቃማ ካትያ።

4ቢታ ጪማቱ አ ኩሽያን ደኢኖ፤ ደርያ ሁጰቱካ አዋ።

5አባ ሃይካ አዋ፤ ሄዋ እ መዳ፤ መላ ቢታካ አ ኩሺ ኦዳ።

6ሃይተ፤ ሆኪደ አነ አዉ ጎይኖይተ፤ ኑና መዳ መና ጎዳ ስንን ጉልባቶይተ።

7አያዉ ጎፐ፥ እ ኑ ጾሳ። ኑን አ ቆሩዋን ደእያ አሳቱዋ፤ ኑን እ ሄምያ አ ዶርሳ ዉደቱዋ። ጾሳይ ህንተና ግያዋ ሀች ስስተ!

8“ካሰ ህንተ ማይዛ አዎቱ፥ ማሪባ ግያ ሳኣን ሀኔዳዋዳን፥ ሄ ጋላስ ማሳ ባዙዋን እጼዳዋዳን፥ ህንተካ ዞርያ አከናን እጾፕተ።

9ኡንቱንቱ ታ ኦሱዋ በኢደካ፥ ታና ኤቀቴድኖነ ፓጬድኖ።

10ታን ሄ የለታ ኦይታሙ ላይ ሻተታድ፤ ‘ኡንቱንቱ ኡባ ዎደ ባረንቱ ዎዛናን ባሊኖ፤ ኡንቱንቱ ታ ኦግያ ኤርበይክኖ ያጋድ።

11ሄዋዳንካ ቃይ፥ ታን ሀንቀታ ጫቃደ፥ ኡንቱንቱ ታ ሸምፑዋሳ ኡባካ ገልክኖ’ ያጋድ” ያጌ።

← Chapter 94 Chapter 96 →