Psalms 88

Amharic Dawro DFBE (ጌሻ ማጻፋ) No Year

1አቤት መና ጎዳዉ፥ ታና አሽያ ጾሳዉ፥ ታን ጋላስ ነዉ ዋሳይ፤ ቃማካ ነ ስንን ዬካይ።

2ታ ዎሳይ ነ ስን ጋኮ፤ ነ ሀይ ታ ዋሱዋኮ ዛራ።

3አያዉ ጎፐ፥ ታ ደኡ መቱዋን ኩሜዳ፤ ታን ሀይቃና ማታድ።

4ታን ዱፉዋን ገልያ አሳቱዋና ፓይደታድ፤ ዎልቃይ ባይና አሳ ግዳድ።

5ታን አሃቱዋ ግዶን አጌዳ አሳ ማላ፤ ዎደ ዱፉዋን የጌዳ አሳቱዋ ማላ። ታን ነ ኡባ ዶጌዳ፥ ነ ማዱዋፐ ሃኬዳ አሳቱዋ ማላ።

6ኔን ታና ጪሞ ኦላን፥ ህርክ ማ ሳኣን የጋዳ።

7ነ ሀንቁ ታና ዴጼ፤ ነ ሀንቁዋ ቤታይ ታና ኡባና ሙኬዳ።

8ኔን ታ ዳቦቱዋ ታፐ ሃሳዳ፤ ኡንቱንቶ ታና ሸነይያዋ ኦዳ። ታን ዶደታድ፤ ከሳ አካናዉካ ዳንዳይከ።

9አቤት መና ጎዳዉ፥ ካዩዋ ጋሱዋን ታ አይፈቱ ጋልጄድኖ። ኡባ ጋላስ ታን ኔኮ ዋሳይ፤ ታ ኩሽያ ኔኮ ምጫድ።

10ኔን ሀይቄዳዋንቶ ማላልስያባ ኦይ? ኡንቱንቱ ደንዲደ ኔና ጋላቲኖ?

11አገና ነ ሲቁ ዱፉዋ ግዶን ሃሳየቲ? ኔን አማነትያዌካ ባየ ሳኣን ኦደቲ?

12ነ ማላልስያ ኦሱካ ማን ኤረቲ? ዎይ ነ ጽልቶተይ ዶገቴዳ አሳቱዋ ቢታን ደኢ?

13አቤት መና ጎዳዉ፥ ታን ኔኮ ዋሳይ፤ ዎንታን ዎንታን ታ ዎሳይ ነ ስን ጋኬ።

14አቤት መና ጎዳዉ፥ ታና ኔን አያዉ አጋይ? ነ ሶምኡዋ ታፐ አያዉ ገንይ?

15ያላጋተፐ ዶማደ፥ ታን ቱጋታድነ ሀይቃና ማታድ። ታን ነዉ ዳጋማደ ሂዶታ ቃንጻድ።

16ነ ሱልያ ሀንቁ ታ ቦላ ኡሾቴዳ፤ ነ ዳጋማይ ታና ባይዜዳ።

17ኡንቱንቱ ጋላሳ ኡባ ድኡዋዳን ታና ዶዴድኖ፤ ታና ሙኬድኖ።

18ኔን ታ ላገቱዋነ ታ ሲቆቱዋ ታፐ ሃሳዳ፤ ማ ጻላላይ ታዉ ዳቦ።

← Chapter 87 Chapter 89 →