Psalms 49

Amharic Dawro DFBE (ጌሻ ማጻፋ) No Year

1ህንተኖ፥ አሳቶ፥ ኡባቱካ ሀዋ ስስተ። ህንተኖ፥ ሳኣን ደእያዋንቶ፥ ኡባቱካ ሀዋ ሀይዝተ።

2ቃይ ዝቃይካ፥ ዱሪ ማንቁካ ስስተ።

3ታ ዎዛና ቆፋይ ጪማ፤ ታ ዶናይ አዳ ኤራተ ሃሳዬ።

4ታ ሀይ ሌምሱዋኮ የጋና፤ ዲ ዲጻደ፥ ታን አ ብለ ቆንጭሳና።

5መቶ ጋላሳይ ይያ ዎድያንነ ባለያ ሞርከቱ፥ ታና ዶድያ ዎደ፥ ታን አያዉ ያያይታ?

6ታ ሞርከቶ፥ ባረንቱ ደእያዋን አማነትያዋንቶነ ባረንቱ ዱረተ ዳሩዋን ጬቂያዋንቶ አያዉ ያያይታ?

7አይ አሳይነ ባረና ዎዛናዉ፥ ዎይ ባረ ሸምፑዋ ጋትያ ጾሳዉ ጭጋናዉ ዳንዳየና።

8አያዉ ጎፐ፥ አሳ ሸምፑዋ ጋቲ አልአ። አይ ጋትያ ጭግናካ ግደና።

9እ መናዉ ደአናዳን፥ ዎይ እ ሀይቀናዳን ኦናዉ ጋከና።

10ኤያቱነ ቦዛቱ ሀይቂያዋዳን፥ አዳ ኤራንቻቱካ ይያዋነ ባረንቱ ማጹዋ ሀራቶ የጊደ ብያዋ አሳይ ኡባይ በኤ።

11ኡንቱንቱ ባረንቱ ቢታ ባረንቱዋ ጊናካ፥ ዱፉ መናዉ ኡንቱንቱ ጎለነ የለታፐ የለታ ጋካናዉ ኡንቱንቱ ደእያ ሳኣ ግዳናዋ።

12አሳይ አይ ግታቶፐካ ፓጻ አተና፤ እ ዶኣዳን ሀይቃና።

13ባረካ ባረንቱ ሁጲያን አማነትያዋንቱ ካጫይነ ኡንቱንቱ ቃላ ቱማ ግያዋንቱ ዉርሰይ ሀዋ።

14ሹካዉ ዶረቴዳ ዶርሳቱዋዳን፥ ኡንቱንቱ ዱፎ ዶረቴድኖ፤ ሀይቁ ኡንቱንቱ ሄንንቻ ግዳናዋ። ሱረቱ ዎንታ ኡንቱንቱ ዱፉዋ ቦላ ሀመታና፤ ኡንቱንቱ ባረንቱ ደእያ ጎልያፐ ሃኪደ፥ ዱፉዋን ዎቃና።

15ሽን ጾሳይ ታና ዎዛና፤ እ ታ ሸምፑዋ ሀይቁዋ ዎልቃፐ አሻና።

16አሳይ ዱረትያ ዎደነ፥ አ ቦንቹ ዳርያ ዎደ ያዮፓ።

17አያዉ ጎፐ፥ እ ሀይቂደ፥ አይነ አኪደ ቤና፤ አ ዱረታይ አናና እትፐ ዱፉዋ ቤና።

18አሳይ ፓጻ ደእያ ዎድያን፥ “ታዉ ኩሜዳ” ጎፐነ፥ ኡባባይ አዉ ጊጌዳ ድራዉ ጋላተቶፐነ፥

19ስሚደ ፖኡዋ በኤና ባረ ማይዛ አዎቱዋና ጋከቴ።

20ኤር ባይናን ግታቴዳ አሳይ ዶኣዳን ሀይቃና።

← Chapter 48 Chapter 50 →