Psalms 32

Amharic Dawro DFBE (ጌሻ ማጻፋ) No Year

1አ ባይዙ አቶ ጌተቴዳነ አ ናጋራይ ካመቴዳ ኡራይ አንጀቴዳዋ።

2መና ጎዳይ አ ኢታተ ፓይደና አሳይነ አ ቆፋን ባለ ባይና አሳይ አንጀቴዳዋ።

3ታ ናጋራ ፓጸናን ደኣደ፥ ታን ጋላሳ ኩመን ኦሌዳዎ ታ አሳተይ ዳቡሬዳ።

4ጋላስነ ቃማ ነ ኩሺ ታ ቦላ ዴጼዳ። ሃይ ቦንያ አዋን መሊደ ዉርያዋዳን፥ ታ ዎልቃይ ዉሬዳ።

5ታን ታ ናጋራ ነዉ ፓጻድ፤ ታ ኢታተካ ኔፐ ገንበይከ፤ “ታ ባይዙዋ መና ጎዳዉ ፓጻና” ጋድ። ያትና፥ ኔን ታና ዴጼዳ ናጋራ አቶ ያጋዳ።

6ሄዋ ድራዉ፥ ጾሳ አሳ ግድያ ኦንነ፥ ኔን ቤትያ ዎደ፥ ኔና ዎሶ። ዎልቃማ ሃይ ኩንያ ዎደ፥ ቱሙዋፐ ሄ ኡራ ጋከና።

7ኔን ታዉ ቆሰትያ ሳኣ፤ ኔን ታና መቱዋፐ ናጋሳ። አቶተ የ የጽያዋንታ ታ ዩሹዋን ዎዳ።

8ጾሳይ፥ “ታን ኔና ኤርሳናነ፥ ኔን ባናዉ በስያ ኦግያ ኔና ታማርሳና፤ ታን ኔና ዞራናነ ናጋና።

9ብጻላንነ ፑሉዋን ኦይቀተናን አዛዘተና፥ ዎዛናይ ባይና ባቁሉዋዳን ዎይ ፓራዳን ህንተ ሀኖፕተ” ያጌ።

10ኢታቶ ቱጋይ ዳራና፤ ሽን መና ጎዳን አማነትያዋንታ፥ አገና ሲቁ ዶዳና።

11ህንተኖ፥ ጽሎቶ፥ መና ጎዳን ናሸትተነ “ሀሹ!” ጊተ፤ ህንተኖ፥ ዎዛና ሱረቶ፥ ናሸቻዉ የጽተ።

← Chapter 31 Chapter 33 →