Psalms 118

Amharic Dawro DFBE (ጌሻ ማጻፋ) No Year

1መና ጎዳ ጋላትተ! አያዉ ጎፐ፥ እ ኬካ። አገና አ ሲቁ መናዋ።

2እስራኤልያ አሳይ፥ “አገና አ ሲቁ መናዋ” ያጎ።

3አሮና ጎልያ አሳይ፥ “አገና አ ሲቁ መናዋ” ያጎ።

4መና ጎዳዉ ያይያዋንቱ ኡባይ፥ “አገና አ ሲቁ መናዋ” ያግኖ።

5ታን ኡንኤቴዳ ዎደ መና ጎዳዉ ዋሳድ፤ እ ታ ዋሱዋ አሊደ፥ ታና ላአ ከሴዳ።

6መና ጎዳይ ታናና ደእያ ድራዉ፥ ታን ያይከ። አስ ታና አይ ኦ?

7መና ጎዳይ ታና ማዳናዉ ታናና ደኤ፤ ታ ሞርከቱ ጾነቴዳዋንታ ታን በአና።

8አሳን አማነትያዋፐ፥ መና ጎዳኮ ባቃትያዌ ሎአ።

9ዳናቱዋን አማነትያዋፐ፥ መና ጎዳኮ ባቃትያዌ ሎአ።

10ካዉተቱ ኡባይ ታና ዶድ ኦይቄድኖ፤ ሽን መና ጎዳ ሱንን ታን ኡንቱንታ ጾናድ።

11ኡንቱንቱ ታና ዶዴድኖ፤ ኡባ ሳና ዶድ ኦይቄድኖ፤ ሽን መና ጎዳ ሱንን ታን ኡንቱንታ ጾናድ።

12ኡንቱንቱ ማይ ዶድያዋዳን፥ ታ ዩሹዋን ዶዴድኖ። ሽን አጉንይ ታማን ኤጽያዋዳን ኤጽ ዬድኖ። መና ጎዳ ሱንን ታን ኡንቱንታ ጾናድ።

13ታና ሱግ የግና፥ ኩንዳና ሀናይ፤ ሽን መና ጎዳይ ታና ማዴዳ።

14መና ጎዳይ ታዉ ዎልቃነ ምኖተ፤ እ ታና አሽያዋ ግዴዳ።

15ኦላ ጾኒደ ስምያ አሳይ፥ ጽሎቱዋ ዱንካንያን ሆምቦጪደ፥ ግያዋ ስስተ። ኡንቱንቱ፥ “መና ጎዳ ኡሸቻ ኩሺ ዎልቃማባ ኦዳ!

16መና ጎዳ ኡሸቻ ኩሺ ጾኑዋ እሜዳ! መና ጎዳ ኡሸቻ ኩሺ ዎልቃማባ ኦዳ!” ያጊኖ።

17ታን ሀይቂከ፤ ፓጻ ደአናነ መና ጎዳይ ኦዳዋ አዋያና።

18መና ጎዳይ ታና ኢታ ሙሩዋ ሙሬ፤ ሽን ሀይቆ አደ እምቤና።

19ታን ግዶ ገላደ መና ጎዳ ጋላታና ማላ፥ ጌሻ ጎልያ ፐንገቱዋ አነ ታዉ ዶይተ።

20ሀዌ መና ጎዳ ፐንግያ፤ ሀ ፐንግያና ጽሎቱዋ ጻላላይ ገሊኖ።

21ኔን ታና ስሴዳ ድራዉነ ጾኑዋ እሜዳ ድራዉ፥ ታን ኔና ጋላታይ።

22ግምቢያዋንቱ ካደ እጼዳ ሹቻይ፥ ጎዳ ጻጱዋ ምንስያ፥ ኡባፐ አያ ሹቻ ግዴዳ።

23ሀዌ መና ጎዳይ ኦዳዋ፤ ቃይ ኑ አይፍያዉካ ማላልስያዋ።

24ሀዌ ጋላሳይ መና ጎዳይ መዳ ጋላሳ። አነ ኑን አን ናሸቶይተነ እልሎይተ።

25አቤት መና ጎዳዉ፥ ሀእ ኑና አሻርኪ! አቤት መና ጎዳዉ፥ ሀእ ኑዉ እንጀያርኪ!

26መና ጎዳ ሱንን ይያ አሳይ አንጀቴዳዋ ግዶ! ኑን መና ጎዳ ጌሻ ጎልያፐ ህንተና አንጄቶ።

27መና ጎዳይ ጾሳ፤ እ ኑ ቦላን ፖእሴዳ። እርጻ ታሽያ ኦይቂደ፥ አያና ጋላሳ ቦንችተ፤ ያርሹዋ ቦላን ደእያ ካጭያኮ አተ።

28ኔን ታ ጾሳ፤ ታን ኔና ጋላታና። ኔን ታ ጾሳ፤ ታን ኔና ግታያና።

29መና ጎዳ ጋላትተ! አያዉ ጎፐ፥ እ ኬካ፤ አገና አ ሲቁ መናዋ።

← Chapter 117 Chapter 119 →