Psalms 110

Amharic Dawro DFBE (ጌሻ ማጻፋ) No Year

1መና ጎዳይ ታ ጎዳ፥ “ታን ነ ሞርከቱዋ ኔን ገድያን የ ኤቂያዋ ኦና ጋካናዉ፥ ሀዋን ታፐ ኡሸቻ ባጋና ኡታ” ያጌዳ።

2መና ጎዳይ ነ ምኖተ ጻምኣ ጽዮነፐ ኪታና፤ ያትና፥ “ነ ሞርከቱዋ ሞዳ!” ያጋና።

3ኔን ነ ሞርከቱዋና ኦለትያ ጋላስ፥ ነ አሳይ ኤኖ ጋና። ዎንታ ጉራ ከተርሳዳን፥ ነ ዎዳላ አሳይ ኔኮ ጌሻ ደረቱዋን ሺቃና።

4መና ጎዳይ፥ “ማልካ ጸደቅ ቄስያ ግዴዳዋዳን፥ ኔንካ መናዉ ቄስያ ግዳና” ያጊደ ጫቄዳ፤ እ ባረ ቆፋ ላመና።

5ጎዳይ ነ ኡሸቻን ደኤ፤ ባረ ሀንቁዋ ጋላስ እ ካተቱዋ ክንቼሬና።

6ካዉተ ቦላ እ ፕርዳና፤ ኦላ ደምባቱዋካ አሃ ጻላላ ኦና፤ ሳኣን ኡባን ደእያ ካተቱዋ እ መንሬና።

7ካቲ ኦግያ ማታን ደእያ ሃ ፑልቱዋፐ ኡሺደ፥ እ ባረ ሁጲያ ቁ ኦና።

← Chapter 109 Chapter 111 →