Psalms 104

Amharic Dawro DFBE (ጌሻ ማጻፋ) No Year

1ታ ሸምፓቴ፥ መና ጎዳ ጋላታ! አቤት መና ጎዳዉ ታ ጾሳዉ፥ ኔን አይ ኬሻ ግቴ! ኔን ቦንቹዋነ አንጋ ማያዳ።

2ፖኡዋ አፍላዳን ጉሎታዳ። ኔን ሳሉዋ ዱንካንያዳን ቶላዳ።

3ነ ጎልያ ሳሉዋ ጉፋንዋ ቦላን ኬጻሳ። ሻርያ ፓራ ጋርያ ከሳሳ፤ ጫርኩዋ ቀፍያን ቶጋሳ።

4ኔን ጫርኮቱዋ ነ ኪታንቻ፥ ታማ ላጩዋካ ነ ቆማ ከሳሳ።

5ኔን ሳኣ አ ባሱዋ ቦላ ኤሳዳ፤ እ መ መናዉካ ቃጸና።

6ዎልቃማ አባይ ቢታ ቦላን አፍላዳን ምጨቴዳ፤ ሃይ ዎልቃማ ደረቱዋ ካሜዳ።

7ሽን ነ ጎደትና ሃቱ ባቃቴድኖ፤ ነ አዛዙዋ ስሲደ፥ ኤሌሌድኖ።

8ኡንቱንቱ ዎጋ ደረቱዋፐ ዱገ ዛንጋራ፥ ኔን ኡንቱንቶ ጊግሴዳ ሳኣ ጎጌድኖ።

9ሃቱ ስሚደ ቢታ ካመናዳን፥ ኡንቱንቱ አናዉ ዳንዳየና ዛዋ ኤሳዳ።

10ኔን ፑልቶቱዋ ዛንጋራን ፑልትሳሳ፤ ኡንቱንቱ ሃይ ደረቱዋ ግዱዋና ጎጌ።

11ጎግያዋፐ ባዙዋ ዶአቱ ኡባይ ኡሺኖ፤ ደንባ ሃረቱ ባረንቱ ሳሙዋ አፐ አሊኖ።

12ሳሉዋ ካፎቱ ሄ ሃ ማታን ባረንቱ ጎልያ ኬጺደ፥ ታሽያ ግዶን የጺኖ።

13ኔን ዎልቃማ ደረቱዋ ቦላን ሳሉዋፐ እራ ቡክሳሳ፤ ቢታካ ነ ኩሽያ ኦሱዋ አይፍያን ካልሳሳ።

14ኔን መህያዉ ማታ፥ አሳዉ ካ ሞክሳሳ። ሄዌነ፥ አሳይ ቢታ ኦደ፥ ቢታፐ ካ ደማናሳ።

15አሳ ዎዛና ናሸችያ ዎይንያ፥ ሶምኡዋ ሽጭስያ ዛይትያነ ዎልቃ ኩንያ ቁማ ሞክሳሳ።

16መና ጎዳ ምቱ፥ እ ቶኬዳ ሊባኖሳ ዝጋቱ፥ ዳሮ እራ ኡሺኖ።

17ኡንቱንቱን ካፎቱ ባረንቱ ጎልያ ኬጺኖ፤ ቆለቱካ ጺዳ ቦላ ኬጺደ ደኢኖ።

18ቃ ደረቱዋ ቦላን ጋራቱ ደኢኖ፤ ቃይ ጉፓለቱ ሹቻ ጎንጎሉዋን ቆሰቲኖ።

19ዎድያ ፓይዱዋ ኤርሳና ማላ፥ ኔን አግና መዳ። አዋይ ባረ ዉልያ ዎድያ ኤሬ።

20ኔን ቃማ መዳ፤ ማን ዶአይ ኡባይ ከሴ።

21ዎዳላ ጋሞቱ ሻንካቲደ ጉዲኖ፤ ኡንቱንቱ ባረንቶ ምያዋ ጾሳፐ ኮዪኖ።

22አዋይ ከስያ ዎደ፥ ጉየ ስሚደ ባረንቱ ጌሱዋን ግሲኖ።

23ሄ ዎደ አሳይ ባረ ኦሶ ከሴ፤ ሳአይ ቃማና ጋካናዉ ኦ።

24አቤት መና ጎዳዉ፥ ነ ኦሱ አይ ኬሻ ዳሬ! ነ አዳ ኤራተን ኔን ኡንቱንቱ ኡባ መዳ፤ ሳአይ ኔን መዳዋን ኩሜዳ።

25አባይ ህንን ሄዌሽ፤ እ ዎልቃማነ አኮ፤ ፓይዱ ባይና ቃጽያ መታቱዋን፥ ግታቱዋንነ ጉቱዋን ኩሚደ ደኤ።

26ሄዋ ቦላን ማርካባቱ ቢኖ፤ ቃይ ኔን መዳ ሌዋታና ግያ ዳዊ አን ካኤ።

27ኔን ኡንቱንታ ኮሽያ ዎድያን ኡንቱንቶ ቁማ እማና ማላ፥ ኡንቱንቱ ኡባይ ኔና ጼሊኖ።

28ኔን ኡንቱንቶ እምና፥ ኡንቱንቱ ማጺኖ፤ ኔን ነ ኩሽያፐ የግና፥ ኡንቱንቱ ሎኦባ ካሊኖ።

29ኔን ነ ሶምኡዋ ገንያ ዎደ ዳጋሚኖ። ነ ሸምፑዋ ኔን አክያ ዎደ ሀይቂደ፥ ባረንቱ ቢታዉ ስሚኖ።

30ሽን ኔን ነ ሸምፑዋ ኪትያ ዎደ፥ ሀራቱ መቲኖ፤ ቢታካ ኦራሳ።

31መና ጎዳ ቦንቹ መናዉ ደኦ፤ መና ጎዳይ ባረ ኦሱዋን ናሸቶ።

32እ ቢታ ጼልና፥ ቢታይ ቃጼ፤ ቃይ እ ደረቱዋ ቦንችና፥ ደረቱ ጩዋቲኖ።

33ታን ታ ደኡዋ ኡባን መና ጎዳዉ የጻና፤ ታን ደኤዳ ላይ ኡባን ታ ጾሳ ሳባና።

34ታን መና ጎዳን ናሸትያ ድራዉ፥ ታ ቆፋይ አ ናሸቾ።

35ናጋራንቻቱ ቢታፐ ይኖ፤ ሀዋፐ ስንዉ ኢታቱ ደኦፕኖ። ታ ሸምፓቴ፥ መና ጎዳ ጋላታ! መና ጎዳ ጋላትተ!

← Chapter 103 Chapter 105 →