Psalms 102

Amharic Dawro DFBE (ጌሻ ማጻፋ) No Year

1አቤት መና ጎዳዉ፥ ታ ዎሳ ስሳ፤ ታ ዋሱ ኔኮ ጋኮ።

2ታ ዋይያ ጋላስ፥ ነ ሶምኡዋ ታፐ ገንፓ። ነ ሀይ ታኮ የጋ፤ ታን ነዉ ዋስያ ዎደ፥ ታና ኤለካ አላ።

3አያዉ ጎፐ፥ ታ ላይይ ጩዋዳን ዬ፤ ታ መቀይካ ታማ ቦንቁዋዳን ኤጼ።

4ታ ዎዛናይ ሾጭ የጌዳ መላ ማታዳን ሀናድ፤ ቁማይካ ታዉ ሜተተና።

5ታን ታ ቃላ ቁ ኦደ ኦላይ፤ ታ ጋልባይ መቀና ኦይቀቴዳ።

6ታን ባዙዋን ደእያ አንኩዋ ማላ፥ ዎይ ኮለቴዳ ጎልያን ደእያ ጉቱዋ ማላ።

7ታን ግስና፥ ገምእሹ ዬና፤ ታን ጎልያ ሁጲያን ባረካ ኡቴዳ ካፉዋ ማላ።

8ታ ሞርከቱ ጋላሳ ኡባን ታና ጫሺኖ፤ ታና ቅሊጭያዋንቱ ታ ሱንን ሸቂኖ።

9ታን ብድን ቁማዳን ማይ፤ ቃይ ታ አፎ ታ ኡሻና ዋላካይ።

10ኔን ታና ፑደ ደንደ፥ ነ ሀንቁዋ ድራዉ ዎራ ኦላዳ።

11ታ ደኡዋ ላይይ ኦማርሳ ኩዋ ማላ፤ ታን ማታዳን ሹላይ።

12ሽን አቤት መና ጎዳዉ፥ ኔን ካዉተ አራታን መናዉ ኡታዳ፤ ነ ሱንይካ የለታፐ የለታ ጋካናዉ ሀሳየታና።

13ኔን ደንዳደ፥ ጽዮነዉ ቃረታ፤ አያዉ ጎፐ፥ ኔን እዞ ማርያ ዎዲ ጋኬዳ፤ ሀዌ ኔን ዶሬዳ ዎድያ።

14እዛ ኮለቴዳዋ ግዶፐካ፥ ነ ቆማቱ እዞ ሲቂኖ። እዛ ባዬዳዋ ግዶፐካ፥ ኡንቱንቱ እዝዉ ቃረቲኖ።

15ካዉተቱ መና ጎዳ ሱንዉ ያያና፤ ሳኣ ካተቱ ኡባይ አ አንጋዉ ዳጋማና።

16አያዉ ጎፐ፥ መና ጎዳይ ጽዮነ ዛረ ኬጺደ፥ እ ባረ ግታተ በሳና።

17እ ፑቴሳቱዋ ዎሳ ስሳና፤ ኡንቱንቱ ዋሱዋ ካና።

18ብሮ የለታና አሳቱ መና ጎዳ ጋላታና ማላ፥ ሀዌ ይያ የለታዉ ጻፈቶ።

19መና ጎዳይ ቃን ደእያ ባረ ጌሻ ሳኣፐ ዱገ ጼሌዳ፤ እ ሳሉዋፐ ዱገ ሳኣ ጾሞሴዳ።

20ሄዌነ፥ ቃሸቴዳ አሳቱዋ ኦልያ ስሳናሳነ ሀይቆ ፕርደቴዳ አሳቱዋ ብላናሳ።

21ሄዋ ድራዉ፥ መና ጎዳ ሱንይ ጽዮነን ኦደታናነ አ ጋላታይ የሩሳላመን አዋየታና።

22አሳይነ ካዉተይ እትፐ ሺቂደ፥ መና ጎዳዉ ሄ ዎደ ጎይናና።

23እ ታን ያላጋተን ደኢና፥ ታ ዎልቃ ዉርሴዳ፤ ታ ላይ ቃንዬዳ።

24ያትና፥ ታን፥ “አቤት ታ ጾሳዉ፥ ታ ላይይ ብሮ ግዶትያ ዎደ፥ ታና አፎፓ” ያጋይ። አቤት ጾሳዉ፥ ኔን የለታፐ የለታ ጋካናዉ ደኣሳ።

25ኔን በን ሳኣ መዳ፤ ሳሉካ ነ ኩሽያ ኦሱዋ።

26ሄዋንቱ ኡባይ ያና፤ ሽን ኔን ደአና፤ ኡንቱንቱ ኡባይካ አፍላዳን ዉራና። ኔን ኡንቱንታ ጩርቃ አፍላዳን ላማና፤ ኡንቱንቱካ አና።

27ሽን ኔን ኔናካ፤ ነ ላይይ ኡባ ዉረና።

28ኑን ነ ቆማቱዋ፤ ኑ ናናቱ ሳሮተን ደአና። ኡንቱንቱ ዘረይካ ነ ስንን ምኒደ ኤቃና።

← Chapter 101 Chapter 103 →