Proverbs 9

Amharic Dawro DFBE (ጌሻ ማጻፋ) No Year

1አዳ ኤራተታ ባረ ጎልያ ኬጻዱ፤ ሄ ጎልያዉ ላፑን ቱሳቱዋ ኤሳዱ።

2እዛ ባረ ጊግስያ ሾብያዉ ሞ መህያ ሹካዱ፤ ዎይንያ ኤሳካ አጋደ ጊግሳዱ። ማዳ ስንዉ አዱ።

3ያታደ አሳ ጼሳናዉ ባረ ቆማቱዋ ኪታዱ። ቆማቱ ካታማዉ ቃ ሳኣን ኤቂደ፥

4“ህንተኖ፥ ኤራይ ፓጬዳዋንቶ ሀዋ ገልተ!” ያጌድኖ። ቦዛቱዋካ እዛ ሀዋዳን ያጋዱ፤

5“ሃ ዪተ፤ ታ ቁማ ሚተ፤ ታን አጌዳ ዎይንያ ኤሳካ ኡሽተ!

6ቦዛተ አጊደ፥ ደኡዋን ደእተ፤ አኬካ ኦግያን ሀመትተ” ያጋዉ።

7ቅሊጭያ ኡራ ሴርያ አሳይ ባረዉ ቦርያ አኬ፤ ኢታ ኡራ ዞርያዌካ ባረዉ ቆሄቴ።

8ቅሊጭያ ኡራ ዞሮፓ፤ እ ኔና እጻና። አዳ ኤራንቻ ኡራ ዞራ፤ እ ኔና ዶሳና።

9አዳ ኤራንቻ ኡራ ታማርሳ፤ ያቶፐ፥ እ ካሰዋፐካ አዳ ኤራንቻ ግዳናዋ። ጽሎ ኡራካ ታማርሳ፤ ያቶፐ እ ኤራ ጉጃና።

10አዳ ኤራተዉ ዶመይ መና ጎዳዉ ያይያዋ፤ ጌሻ ጾሳ ኤርያዌ አኬክያዋ።

11ታናን ነ ላይይ ዳራና፤ ነ ደኡዋ ላይይካ አዱቃና።

12ኔን አዳ ኤራንቻ ግዶፐ፥ ነ ሁጲያዉ ጎኤታሳ። ኔን ቅሊጭያዋ ግዶፐካ፥ ነ ሁጲያዉ ቆሄታሳ።

13ቦዛ ምሽራታ ዋላሳ ዳራዉ፤ እዛ ባረና ናገናዉኖ። እዛ አይነ ኤሩኩ።

14እዛ ባረ ካረን፥ ዎይ ካታማዉ ቃ ሳኣን ኦይድያን ኡታዉ።

15ሱረ ባረንቱ ኦግያ ኦይቂደ ብያ አሳ ጼሳደ፥

16“ህንተኖ፥ ኤራይ ፓጬዳዋንቶ፥ ታኮ ሃ ዪተ” ያጋዉ። አኬካይ ባይናዋካ፥

17“ዉኢደ ኡሽያ ሃይ ማልኤ፤ ጌማን ምያ ቁማይካ ናሸቼ” ያጋዉ።

18ሽን እ ሀይቄዳ አሳይ ያን ደእያዋ፥ እዝ እማቱካ ዱፉዋ ጪሞ ግዶን ደእያዋ ኤረና።

← Chapter 8 Chapter 10 →