Proverbs 6

Amharic Dawro DFBE (ጌሻ ማጻፋ) No Year

1ታ ናአዉ፥ ኔን ሚሻ ታልኤዳ ነ ሾሮ ዋሰ ገሌዳዋ ግዶፐ፥ ኔን ኤረና ኡራዉ ነ ኩሽያ ባቃደ ገፔዳዋ ግዶፐ፥

2ኔን ገፔዳ ገፋ ግትያን ገሌዳዋ ግዶፐ፥ ነ ዶናፐ ከሴዳ ቃላን ኦይቀቴዳዋ ግዶፐ፥

3ስም ኔን ነ ሾሩዋ ኩሽያን ገላዳ። ሄዋ ድራዉ፥ ታ ናአዉ፥ ሄዋፐ ከሳናዉ ኮዮፐ፥ ኤለ ነ ሾሩዋ ጎለ ባ፤ ዋሰተ እ ነ ቦላፐ ዎና ማላ፥ አዉዳሻደ አ ዎሳ።

4ሀዋ ኦናን ደኣደ ገምእሾፓ፤ ሸምፑዋካ ሸምፖፓ።

5ሻንካንቻቱዋፐ ገንአታ ከሳ አክያዋዳን፥ ዳባፐ ካፋታ አትያዋዳን፥ ነ ሁጲያ አሻ።

6ኔኖ አዛላዉ፥ ቃጮቱዋኮ ባ፤ ኡንቱንቱፐ ታማራ። ያቲደ አዳ ኤራንቻ ግዳ።

7ቃጮቱዋ ኦስሳናዉ፥ ካፑ ዎይ ኡንቱንታ ሞድያዌ ባዋ፤

8ሽን ባረንቶ ማናባ ቦንያን ምንጂኖ፤ ካ ጫክያ ዎደካ ባረንቶ ኮሽያ ቁማ ሺሺኖ።

9ኔኖ አዛላዉ፥ ኔን አዉደ ጋካናዉ ገምእሻይ? ነ ገምእሹዋፐካ አዉደ ደንዳይ?

10ኔን ቃይካ ጉ ግሳሳ፤ ጉ ገምእሻሳ፤ ኩሽያ ሺሻ አካደ፥ ጉ ሸምፓሳ።

11ያትያ ዎደ ህዬሳተይ ፓንጋዳን፥ ፓጫይ ኦላ ሚሻ ኦይቄዳ አሳዳን፥ ነ ቦላ ያና።

12ኢታ አሳይነ ባላ አሳይ፥ ዩይ ዩዪደ ዎርዱዋ ኦዴ፤

13እ ባረ አይፍያን ስምኤ፤ ባረ ገድያን በሴ፤ ባረ ብራያን ጾርሴ።

14አ ዎዛናን ጌላተይ ደኤ፤ እ ኢታባ ቆፔ፤ ኡባ ገደካ እ ዋላሳ መ።

15ሄዋ ጋሱዋን ባሻይ አኬከናን አ ቦላ ያና፤ እ ሀሳየናን መአና፤ መኢደካ ፓጸና።

16መና ጎዳይ እጽያ ኡሱፑን የዎቱ ደኢኖ፤ እ ላፑንያዋ ኢስ እጼ:

17ካደ ጼልያ አይፍያ፥ ዎርዶትያ እንጻርሳ፥ ጌሻ አሳቱዋ ሱ ጉስያ ኩሽያ፥

18ኢታባ ማቂያ ዎዛና፥ ኢታባኮ ኤሌሊደ ዎጽያ ገድያ፥

19ዎርዱዋ ቦላ ዎርዱዋ ጉጅ ጉጂደ ኦድያ ዎርዶ ማርካ፥ እሻቱዋ ግዶን ዋላሳ መያ አሳ።

20ታ ናአዉ፥ ነ አቡ አዛዙዋ ፖላ፤ ነ አታ ኔና ታማርሴዳዋካ አጎፓ፤

21ኡንቱንታ ኡባ ገደ ነ ዎዛናን ኦይቃ፤ ነ ቆያንካ ቃቻ።

22ኔን ሀመትያ ዎደ፥ ኡንቱንቱ ኔና ካለና፤ ኔን ግስያ ዎደ፥ ኡንቱንቱ ኔና ናጋና፤ ኔን ቤጎትያ ዎደካ፥ ኡንቱንቱ ኔና ዞራና።

23አያዉ ጎፐ፥ ሀ አዛዞቱ ጾምፕያ፤ ትምርተቱካ ፖኡዋ፤ ቃይ ሴራይካ ደኡዋኮ አፍያ ኦግያ።

24ሀ አዛዞቱነ ሀ ትምርተቱ ኢታ ማጫንፐነ ሀራ ምሽራት ሸሌሽያ እንጻርሳፐ ኔና ናጋና።

25እ ማላ ነ ዎዛናን አሞቶፓ፤ እ አይፍያ ሎኦተን ኦሞደቶፓ።

26እት አቱማ አሳይ ጫራቶ እት ኡክ ጋትያን ደማናዉ ዳንዳዬ፤ ሽን አስናይ ደእያ ምሽራትና ዎሹሙሳይ ሸምፑዋ ዎሴ።

27እት አሳይ ታማ እድምና፥ አ ማዩ ሜተተናን አታናዉ ዳንዳዪ?

28እት አሳይ ታማ ቦንቁዋ የ ሀመትና፥ አ ገዲ ጹገተናን አታኔ?

29አሳ ማቻትኮ ገልያ ኡራይ ሄዋካ ማላ፤ እዞ ቦችያ ኡባይ ሙረተናን አተና።

30ካይሱ ኮሻቲደ፥ ባረዉ ማናዉ ዉኦፐ፥ አሳይ አ ካና።

31ሽን እ ኦይቀቴዳዋ ግዶፐ፥ ላፑን ዳኩዋ ጭጋና፤ ባረ ሶ ሚሻ ኡባካ እማና።

32ሽን ዎሹምያ አሳይ ዎዛና ፓጫ፤ ሄ ኡራይ ባረ ሸምፑዋ ባይዜ።

33ማዱጻናነ ቶሸታና። ኡባ ዎደካ እ ቦረቲደ ደአና።

34አያዉ ጎፐ፥ ማጫ ምሽራት አስናይ ምሸቲደ፥ ሀንቁዋ ሱላና፤ ባረ ሀሉዋ ከስያ ዎደ፥ አዉ ቃረተና።

35እ አያ አጫካ አከና፤ አይ ኬሻ እሙካ አ ሀንቁዋ ዶሽሰና።

← Chapter 5 Chapter 7 →