Proverbs 31

Amharic Dawro DFBE (ጌሻ ማጻፋ) No Year

1ሀዋፐ ካሊደ ጻፈቴዳ ሃሳያይ፥ ካትያ ልሙኤላ አታ ካትያ ልሙኤላ ታማርሴዳዋ።

2“ላ ታ ናአዉ፥ ታ ኡሉዋፐ ዎዳዎ፥ ታን ሺቀታደ የሌዳዎ፥

3ማጫ አሳን ነ ዎልቃ ዉርሶፓ፤ ሄ ካተቱዋ ባይዝያ ማጫ አሳቱዋን ነ አካታ ይሶፓ።

4“ልሙኤላ፥ ሀዌ ካተቶ በሰና፤ ዎይንያ ኤሳ ኡሽያዌ ካተቶ በሰና፤ ማይያ ኡሻ ኡሽያዌ አሳ ቦላ ሱንቴዳዋንቶ በሰና።

5ኡንቱንቱ ኡሽያ ዎደ ህግያ ባሊኖ፤ ናቀቴዳ አሳ ማታ ሸነኮ ጊኖ።

6ማይያ ኡሻ ሀይቃና ሀንያ ኡራዉነ ሳአይ ኢቴዳ ኡራዉ እምተ።

7ኡንቱንቱ ባረንቱ ማንቆተነ ባረንቱ ቱጋ ደኡዋ ዶጋና ማላ ኡሽኖ።

8“ባረንቱ መቱዋ ኦዳናዉ ዳንዳየናዋንቱ ድራዉ ኔን ኦዳ፤ ማድያዌ ባይናዋንቱ ማታ ድራዉ ኔን ደንዳ።

9ኡንቱንቶ ሱረ ፕርዳ ፕርዳ፤ ህዬሳቱዋነ መቶታንቻቱዋ ማታ ናጋ” ያጋደ ታማርሳዱ።

10ዎዛናማ ማቻቶ ኦን ደማናዉ ዳንዳዪ? እንቁዋ ግያ አልኦ ሹቻፐካ እዛ አልአዉ።

11እ አስናይ እዞ ኡባባንካ አማኔ፤ አዉ ደአናዉ በስያዋፐ አያይነ ፓጨና።

12አ ባረ ደኡዋ ላይ ኡባን አዉ ሎኦባፐ አትና፥ ኢታባ ኦኩ።

13ሱፍያነ ላይኑዋ አ ኮያደ፥ ናሸታደ ባረ ኩሽያን ኦዉ።

14አ ዛልአንቻቱዋ ማርካባቱዋ ማላ፤ ባረ ቁማ ሃኮ ቢታፐ አያዉ።

15አ ባረ ሶ አሳዉ ቁማ ካናዉነ ባረ ማጫ ቆማቶ ኦሱዋ ግሻናዉ፥ ሳአይ ብሮ ቃማ ደእሺና ደንዳዉ።

16ጋድያ አ ኮያደ ሻማዉ፤ ባረ ኩሽያን ኦደ ደሜዳ ሻሉዋን ዎይንያ ቱራ ቶካዉ።

17አ ጎባ ኦሳንቻ ግድያዋ ጻላላ ግደናን፥ ምኖነ ጭንጫ አሳ።

18አ ባረ ዎያ ደማናዉ ምናደ ዛልአዉ፤ አ ኦደ ቃምስያ ድራዉ፥ ባረ ጾምፕያ ኤለ ቶይሱኩ።

19አ ባረ ስንድሪታን ሱቃደ፥ ባረ አፍላ ዳዳዉ።

20አ ህዬሳቶነ መቶታንቻቶ ባረዋፐ ጮ እማዉ።

21እ ሶ አሳይ ኡባይ ሆእያ ማዩዋ ማዬዳ ድራዉ፥ ሻቻይ ቡክንቶ፥ አ ህርጉኩ።

22አርሳ ቦላን ሂጽያ ማዩዋ ስካዉ፤ ሊኑዋፐ ዳደቴዳ ኦቻ ቴራ ማላትያ ማዩዋካ ባረዉ ማያዉ።

23ጋድያ ጭማቱ ሺቅያ ዱቡሻን እ አስናይ ቦንቼቴዳ አሳ።

24ሊኑዋፐ ማዩዋነ ሳቂያ ኦ ኦደ፥ ዛልአንቻቶ ዛልአዉ።

25እዛ ምኖነ ቦንቾ አሳ፤ ይያ ላይቶ እዛ ኡባካ ህርጉኩ።

26አዳ ኤራን አ ሃሳያዉ፤ አማንያ ዞሪ እ እንጻርሳፐ ከሴ።

27አ ባረ ሶ አሳ ደኡዋ እንጀያናዉ ኡባ ገደ ኦሱዋ ኦደ ደአዉ፤ አዛላ ሀኑ እ ቦላን ቤት ኤረና።

28እዝ ናናቱ ደንድ ኤቂደ፥ እዞ ናሺኖ፤ እዝ አስናይካ እዞ ጋላቲደ፥

29“ሎኦባ ኦዳ ዳሮ ማጫ አሳቱ ደኢኖ፤ ሽን ኔን ኡንቱንቱ ኡባፐ አሳ” ያጌ።

30ማላ ሎኦተይ አላለ ከሰና፤ ፑልካ ያና፤ ሽን መና ጎዳዉ ያይያ ምሽራታ፥ እዛ ጋላተታናዉ በሳዉ።

31አ ኦዳባዉ ኡባዉ እዉ እዝ ኩሽያ ዛርተ፤ እዛ ኦዳ ኦሱ ኡባይ ዳባባን እዞ ጋላትሶ።