Proverbs 15

Amharic Dawro DFBE (ጌሻ ማጻፋ) No Year

1ሊቆ ዛሩ ሀንቁዋ ዛርቢሴ፤ ሽን ፖዶላ ቃላይ ሀንቁዋ ደን።

2አዳ ኤራንቻ እንጻርሳይ ኤራ ሎይ፤ ሽን ቦዛቱዋ ዶናይ ቦዛተ ፑልቴ።

3መና ጎዳ አይፈቱ ኡባሳ ጼሊኖ፤ ኢታ ኦያዋንታካ ሎኡዋ ኦያዋንታካ በኢኖ።

4ሊቆ ሃሳያይ ደኡዋ ም ማላ፤ ሽን ጭምያ ሃሳያይ አያና መን።

5ቦዛ አሳይ ባረ አዉዋ ሴራ ካ፤ ሽን ባረ አዉዋ ሴራ አክያ አሳይ ጭንጫ።

6ጽሎ ኡራ ጎልያን ዳሮ ሚሻይ ደኤ፤ ሽን ኢታዉ ገልያ ሚሻይ መቱዋ አዬ።

7አዳ ኤራንቻቱዋ ዶናይ ኤራ ዘሬ፤ ሽን ቦዛቱዋ ዎዛናይ ሄዋ ማላ ግደና።

8መና ጎዳይ ኢታቱዋ ያርሹዋ ሸነቴ፤ ሽን ሱረቱዋ ዎሳይ አ ናሸቼ።

9መና ጎዳይ ኢታ አሳቱዋ ሄመታ ሸነቴ፤ ሽን ጽሎተ ካልያዋንታ እ ሲቄ።

10ሱረ ኦግያ አጌዳ አሳ ኢታ ሙሩ ናጌ፤ ሴራ እጽያ አሳይ ሀይቄ።

11ዱፉነ ባሻይ መና ጎዳ ስንን ቆንጭያን ቤቲኖ። ያትና፥ አሳ ዎዛና ቆፋይ ዋን አፐ ጌማኔ?

12ቅሊጭያ አሳይ ሴርያዋ ዶሰና፤ አዳ ኤራንቻቱዋፐካ ዞርያ ኦቼና።

13ዎዛናይ ናሸትና፥ ሶምኢ ፖኤ፤ ሽን ዎዛናይ ካዮቶፐ፥ ሄ አያናይ መኤ።

14አኬክያ ዎዛናይ ደእያ አሳይ ኤራተ ኮዬ፤ ሽን ቦዛቱ ባረንቱ ቦዛተን ናሸቲኖ።

15ህዬሳቱዋ ደኡ ኡባ ጋላስካ ባጸ። ሽን ናሸትያ አሳቱ ኡባ ገደካ ባረንቱ ደኡዋን አሊኖ።

16ዋላሳይ ደእያ ዎልቃማ አቁዋፐ መና ጎዳ ያሻተይ ደእያ ጉባይ ኬካ።

17ዋላሳይ ደእያ ሳን ሞ አሹዋ ማናፐ ሲቁ ደእያ ሳን ሳን ምያዌ ኬካ።

18ሀንቀትያ አሳይ ዋላሳ ከሴ፤ ሽን ሀንቀታናዉ ኤሌለና አሳይ ዋላሳ እርጽሴ።

19አዛላ ኡራ መቱ አ ኦግያ ኡባን አጉን ድርሳ ማላ፤ ሽን ሱረ ኡራ ኦጊ ደምባ።

20ጭንጫ ናአይ ባረ አዉዋ ናሸቼ፤ ሽን ቦዛ ናአይ ባረ አቶ ካ።

21ዎዛን ባይና አሳይ ባረ ቦዛተን ናሸቴ፤ ሽን ዎዛናማ አሳይ ልከባ ኦ።

22ዞረታይ ዮፐ፥ ሀልቼዳዌ ፖለተና፤ ዳሮ ዞርያዋንቱ ደእያ ሳን ሀልቼዳዌ ፖለቴ።

23ኦሸቴዳዎ ልከ ዛሩዋ ዛርያዌ ሄ ኡራ ናሸቼ፤ ሃሳያ ልከ ዎድያን ሃሳይያዌ አይባ ሎኦቤ!

24አዳ ኤራንቻይ ቦላዉ ካለያ ደኡዋ ኦግያን ሀመቴፐ አትና፥ ዱገ ዱፉዋ ዎያ ኦግያን ሀመተና።

25መና ጎዳይ ኦቶራንቻቱዋ ጎልያ ኮላና፤ ሽን አምአቲ ዛዋ ናጌ።

26መና ጎዳይ ኢታቱዋ ቆፋ ሸነቴ፤ ሽን ጌሻ ቃላይ አ ናሸቼ።

27ዎርዱዋን ዎያ ደማናዉ ጃምያ አሳይ ባረ ሶ አሳ ቦላ መቱዋ አዬ፤ ሽን ማታይያ እጽያ አሳይ ፓጻ ደአና።

28ጽሎ አሳይ ሃሳያናፐ ካሰቲደ ቆፔ፤ ሽን ኢታቱዋ እንጻርሳይ ፓላባ ፑልቴ።

29መና ጎዳይ ኢታቱዋፐ ሃኬ፤ ሽን ጽሎቱዋ ዎሳ ስሴ።

30ፓሽኪደ ጼልያ ጼላይ ዎዛና ናሸቼ፤ ምሽራቹዋ ኦዱካ ቦላ ፓ።

31ደኡዋ እምያ ዞርያ ስስያ አሳይ አዳ ኤራንቻቱዋና እትፐ ደአና።

32ሴራ እጽያ አሳይ ባረና ቆሄ፤ ሽን ሴራ አክያ አሳይ አኬካ ደሜ።

33መና ጎዳዉ ያይያዌ አሳ አዳ ኤራተ ታማርሴ፤ ቦንቼታና ኮዬዳ አሳይ ኮይሮ ባረና ካዉሻናዉ ኮሼ።

← Chapter 14 Chapter 16 →