Numbers 24

Amharic Dawro DFBE (ጌሻ ማጻፋ) No Year

1እስራኤልያ አንጅያዌ መና ጎዳ ናሸቼዳዋ ባላም በኤዳ ዎደ፥ ካሰ እ ኦዳዋዳን ሙሩናናዉ ኮይቤና፤ ሽን ባረ ሶምኡዋ መላ ቢታኮ ዛሬዳ።

2ያቲዴ ቁ ጊ ጼሊደ፥ እስራኤልያ አሳይ ባረ ዛርያን ዛርያን ዱንካን ኡቴዳዋ በኤዳ፤ ጾሳ አያናይ አ ቦላ ዎዳ።

3እ ባረ ትምቢትያ ሀዋዳን ያጊደ ኦዴዳ፤ “ብኦራ ናኣ ባላማ ትምቢቲ፥ አ አይፊ ትሽ ኦ ጼልያዋ ትምቢቲ፥

4ጾሳይ ግያዋ ስስያዋ ትምቢቲ፥ ልጭ ጊደ ጉፋንና፥ አ አይፊ ዶየቴዳዋነ ኡባ ዳንዳይያ ጾሳ ሳፃ በእያዋ ትምቢቲ ሀዋ።

5ያቆባ ዛረቶ፥ ህንተ ዱንካነቱ፥ እስራኤልያ አሳዉ፥ ህንተ ደእያ ሳአቱካ፥ ዎት ሎኤ!

6ኡንቱንቱ ምጨቴዳ ዎምባዳን፥ ሻፋ ዶናን ደእያ አታክልትያ ሳኣዳን፥ መና ጎዳይ ቶኬዳ ጎዳረ ኡዳንነ ሃ ዶናን ደእያ ዝጋዳን ሀኒኖ።

7ኡንቱንቶ ዳሮ ሃይ ፑልታና፤ ኡንቱንቱ ዛረቶ ግድያ ሃይ ደአና። ኡንቱንቱ ካቲ ካትያ አጋጋፐ ግታታና፤ ኡንቱንቱ ካዉተይካ ቦንቼታና።

8ጾሳይ ኡንቱንታ ግብጼፐ ከሴዳ፤ እ ምኖ መንዳን ኡንቱንቶ ደኤ። ኡንቱንቱ ሞርከ ካዉተ ምታና፤ ኡንቱንቱ መቀካ ሊቅሳና፤ ኡንቱንቱ ባረንቱ ዎንዳፍያ ዙቢያን ኡንቱንታ ጫዳና።

9እስራኤልያ አሳይ ጋሙዋዳን ግሴ። ማጫ ጋማትዳን ኡንቱንታ ደንናዉ ኦን ጻላኔ? ህንተና አንጅያ ኡባይ አንጀቴዳዋ ግዳናዋ፤ ህንተና ሸቂያ ኡባይ ሸቀቴዳዋ ግዳናዋ” ያጌዳ።

10ሄዋፐ ጉይያን፥ ባላቅ ባላማ ቦላ ሀንቁዋ ኤጽ ከሴዳ። ባላቅ ባረ ኩሽያ ዱኪደ ባላማ፥ “ታ ሞርከቱዋ ቃንጋናዳን ታን ኔና ጼሳድ፤ ሽን ኔን ሀ ሄዙ ገደካ ኡንቱንታ አንጃዳ።

11ስም ሀእ ኔን ነ ጎለ ባቃታ፤ ‘ታን ነዉ ዳሮባ ዎይታና’ ጋድ፤ ሽን ኔን ዎይቱዋ አከናዳን መና ጎዳይ ኔና ድጌዳ” ያጌዳ።

12ባላም ባላቃ ዛሪደ፥ “ኔን ታኮ ኪቴዳዋንቱነ፥

13‘ባላቅ ሀራይ አቶ ባረ ብራይነ ዎርቃይ ኩሜዳ ባረ ካትያ ጎልያ ታዉ እሜዳዋ ግድንቶነ፥ መና ጎዳይ ኦዴዳዋ አደ፥ ሎኡዋ ዎይ ኢታ ታ ሸንያን ኦናዉ ዳንዳይከ። ታን መና ጎዳይ ግያዋ ጻላላ ጋና’ ያጋደ ነዉ ኦዳበይክታየ?” ያጌዳ።

14ያጊደ፥ “ታን ሀእ ታ አሳኮ ባይ፤ ሽን ኔን ሃያ፤ ሀ አሳይ ዉርሰ ዎድያን ነ አሳ ኦናዋ ታን ነዉ ኦዳና” ያጌዳ።

15እ ባረ ትምቢትያ ሀዋዳን ያጊደ ኦዴዳ፤ “ብኦራ ናኣ ባላማ ትምቢቲ፥ አ አይፊ ትሽ ኦደ ጼልያዋ ትምቢቲ፥

16ጾሳይ ግያዋ ስስያዋነ፥ ኡባፐ ቂያ ጾሳፐ ግዴዳ ኤራተይ ደእያዋ ትምቢቲ፥ ልጵ ጊደ ጉፋንና፥ አ አይፊ ዶየቴዳዋነ ኡባ ዳንዳይያ ጾሳ ሳፃ በእያዋ ትምቢቲ ሀዋ።

17ታን አ በአይ፤ ሽን ዎዲ ሀአ ግደና፤ ታን አ ጼላይ፤ ሽን ማታን ግደና። ያቆባ ዛርያፐ ጾልንቲ ከሳና። እስራኤልያፐ ካተቱዋ ጻምአይ ከሳና። ሞኣባ አሳ ሶምኡዋ እ ጋጭ ቆላና። ሴተ አሳ ኡባ ሁጲያ እ ክንቻና።

18ኤዶም ጾነታና፤ አ ሞርኪ ሰኢርካ ጾነታና፤ ሽን እስራኤሊ ምን ምኒደ ባና።

19ያቆባፐ ሞድያዌ ከሳና፤ ኡንቱንቱ ካታማን ፓጻ አቴዳዋንታ ይሳና” ያጌዳ።

20ሄዋፐ ጉይያን፥ ባላም አማሌቃ አሳቱዋ በኢደ፥ ባረ ትምቢትያ ሀዋዳን ያጊደ ኦዴዳ፤ “ካዉተቱዋ ግዶን አማሌቅ ኮይሮ፤ ሽን ኡንቱንቱ ዉርሰይ ዮ” ያጌዳ።

21ቃይ ባላም ቄና አሳቱዋ በኢደ፥ ባረ ትምቢትያ ሀዋዳን ያጊደ ኦዴዳ፤ “ህንተ ደእያ ሳአይ ሳሮ ሳ ግዴ፤ ህንተ ጎሊ ዛላ ቦላን ኬጸቴዳ።

22ሽን አሶረቱ ህንተና ኦሞድያ ዎደ፥ ህንተ ቄና አሳቱ ያና” ያጌዳ።

23ሄዋፐ ጉይያን፥ ባላም ባረ ትምቢትያ ሀዋዳን ያጊደ ኦዴዳ፤ “አየ አና! ጾሳይ ሀዋ ኦያ ዎደ፥ ኦን ደአና ዳንዳዪ?

24ማርካባቱ ክቲማ ሀሩሩዋፐ ያና፤ ኡንቱንቱ አሶረቱዋነ ኤቤራቱዋ ኡቁናና፤ ሽን ቃይ ኡንቱንቱካ ያና” ያጌዳ።

25ሄዋፐ ጉይያን፥ ባላም ደንዲደ፥ ባረ ጎለ ስሜዳ፤ ባላቅካ ባረ ኦግያ ቤዳ።

← Chapter 23 Chapter 25 →