Numbers 12

Amharic Dawro DFBE (ጌሻ ማጻፋ) No Year

1ሙሴ ቶጵያ ቢታ ምሽራቶ አኬዳ። እ አኬዳ ቶጵያ ማጫን ድራዉ፥ ሚርያማነ አሮን ሙሳ ቦሬድኖ።

2ኡንቱንቱ፥ “መና ጎዳይ ሙሴ ባጋ ጻላላና ሃሳዬደየ? ቃይ እ ኑ ባጋና ሃሳይቤኔየ?” ያጌድኖ። መና ጎዳይ ሄዋ ስሴዳ።

3ሙሴ ጋድያን ሳኣን ኡባን ደእያ አሳ ኡባፐ አያ አሽከ አሳ።

4መና ጎዳይ ኤለካ ሙሴዉ፥ አሮናዉነ ሚርያምዉ፥ “ህንተ ሄዙካ ጋከትያ ዱንካንያኮ ከስተ” ያጌዳ፤ ኡንቱንቱ ሄዙካ ከሴድኖ።

5ጾሳይ ሻርያ ቱሳን ዱገ ዎዳ፤ ዱንካንያ ፐንግያን ኤቂደ፥ አሮናነ ሚርያሞ ጼሴዳ። ኡንቱንቱ ላኡካ አ ስን ሺቅና፥

6እ ኡንቱንታ፥ “ታ ኦድያዋ ስስተ: ህንተ ግዱዋን ትምቢትያ ኦድያዌ ደኦፐ፥ ታን መና ጎዳይ ታና አዉ ሳጻን ቆንጭሳይ፤ ታን አዉ አኩሙዋን ኦዳይ።

7ሽን ታ ቆማ ሙሴና ሄዋዳን ግደና፤ እ ታ ጎልያ ኡባን አማነቴዳዋ።

8ታን ሙሴና ስን ስንን ሃሳያይፐ አትና፥ ሌምሱዋን ሃሳይከ። እ መና ጎዳ ማላ በኤ። ያትና ታ ቆማ ሙሳ ቦራናዉ ህንተ አያዉ ያይበይክቴ?” ያጌዳ።

9መና ጎዳ ሀንቁ ኡንቱንቱ ቦላ ኤጽ ከሴዳ፤ መና ጎዳይ ቤዳ።

10ሻሪ ዱንካንያ ቦላፐ ደንዴዳ ዎደ፥ ሚርያማ ዎልቃማ ጋልባ ሀርግያን ምልጽ ጋደ ቦጻዱ። አሮን ኢኮ ስሚደ ጼልያ ዎደ፥ ዎልቃማ ጋልባ ሀርግያን ኦይቀቴዳኖ በኤዳ።

11ያትና እ ሙሳ፥ “ሀይ ታ ጎዳዉ፥ ኑን ኤያተን ኦዳ ናጋራዉ ኑና ሙሮፓ።

12ባረ ዳይ ኡሉዋፐ ከስያ ዎደ፥ አ አሹዋፐ ባጋይ ሜተት ክችና፥ ሀይቂ ክቺደ የለቴዳ ጋጭኖ ናኣ ማላ ግዶፓረኬ” ያጌዳ።

13ሙሴ፥ “ሀይ ጾሳዉ፥ እዞ ፓርኪ!” ያጊደ መና ጎዳዉ ዋሴዳ።

14መና ጎዳይ ሙሳ፥ “እ አዉ እ ሶምእያን ጩቻ ጩቼዳዋ ግድንቶነ፥ ላፑን ጋላሳ እዛ ዬላ ማያደ ኡታና ግደኬየ? ሄዋ ድራዉ፥ ኔን እዞ ላፑን ጋላሳ ዱንካኔዳ ሳኣፐ ጋጻ ባጋና ዱማ ሳኣን ኡትሳ፤ ሄዋፐ ጉይያን፥ ስማደ ዩ” ያጌዳ።

15ያትና ሚርያማ አሳይ ዱንካኔዳ ሳኣፐ ጋጻ ከሳደ ላፑን ጋላሳ ኡታዱ። አ ስማና ጋካናዉ አሳይ ባናዉ ደንድቤና።

16ሄዋፐ ጉይያን፥ አሳይ ሀጸሮታ ግያ ሳፐ ደንዲደ፥ ፓራና መላ ቢታ ዱንካኔዳ።

← Chapter 11 Chapter 13 →