Leviticus 13 — Amharic Dawro DFBE (ጌሻ ማጻፋ) No Year

1መና ጎዳይ ሙሳነ አሮና ሀዋዳን ያጌዳ፤

2“አይ አሳ ቦላነ ጋፉ ቤቶፐ፥ ዎይ ሳ ማዱይ ዎይ እላሁ ከሶፐነ ቃይ ሄዌካ አ ጋልባን ዎልቃማ ጋልባ ሀርግያዉ ላመቶፐ፥ ሄ ብታንያ ቄስያ አሮናኮ ዎይ ቄስያ ግድያ አ አቱማ ናናቱዋፐ እቱዋኮ አህኖ።

3ቄሲ አ ጋልባ ቦላን ደእያ ማዱ በኦ። ሄ ማዱጼዳ ሳኣን ደእያ እስኪ ቦጾፐነ፥ ማዱይካ ኦላቶፐ፥ ሄዌ ዎልቃማ ጋልባ ሀርገ። ቄሲ ሄዋ በኢደ፥ ሄ ብታኒ ቱና ግድያዋ ኤርሶ።

4ሽን አ ጋልባ ቦላን ደእያ ሻቱ ቦጽንቶካ፥ ጋልባፐ ሉኪደ ኦላትቤናዋ ግዶፐነ ሄ ማዱ ቦላን ደእያ እስኪ ቦጽቤናዋ ግዶፐ፥ ቄሲ ሄ ብታንያ ዱማ ክፍልያን ላፑን ጋላሳ ጎርዲደ ዎ።

5ላፑን ጋላሳን ቄሲ አ ዛረደካ በኦ፤ እ በእያ ዎደ ማዱይ ብታንያ ጋልባ ቦላን አከናን ካሰዋዳንካ ደኦፐ፥ ቄሲ ሄ ብታንያ ላኤንዋካ ዱማ ክፍልያን ላፑን ጋላሳ ጎርዲደ ዎ።

6ቃይካ ላፑን ጋላሳን ቄሲ አ፤ በእያ ዎደ ማዱይ አክያዋ አጊደ ይ ይ ቦፐነ ሞፐ፥ ቄሲ እ ጌሻ ግድያዋ ኤርሶ። ሄዌ ሻቱዋፐ አትና ሀራባ ግደና፤ ሄዋ ድራዉ፥ እ ባረ ማዩዋ ሜጪደ ጌሻ ግዴ።

7ሽን እ ጌያናዉ ባረና ቄስያ በሴዳዋፐ ጉይያን፥ ሄ ሻቱ አ ጋልባ ቦላን ያ አክ አክ ቦፐ፥ እ ላኤንዋ ባረና በሳናዉ ቄስያኮ ቦ።

8ቄሲካ አ በኦ፤ ሄ ሻቱ ብታንያ ጋልባ ቦላን ያ አክ አክ ቦፐ፥ ቄሲ እ ቱና ግድያዋ ኤርሶ፤ አያዉ ጎፐ ሄዌ ዎልቃማ ጋልባ ሀርግያ።

9“ኦናነ ዎልቃማ ጋልባ ሀርጊ ኦይቆፐ፥ ቄስያኮ አ አህኖ።

10ቄሲ አ በኦ፤ በእያ ዎደ አ ጋልባ ቦላን ቦ ጋፉ ደኦፐ፥ ሄ ጋፉ እስክያካ ቦዉ ላሞፐነ ሄ ጋፉዋ ግዶን አሹ ሙን ኡቴዳዋ ግዶፐ፥

11ሄዌ አ ጋልባ ቦላን ጋምኤዳ ዎልቃማ ጋልባ ሀርግያ ግድያ ድራዉ፥ ቄሲ እ ቱና ግድያዋ ኤርሶ። እ ቱና ግድያዌ ኤረት ድጌዳ ድራዉ፥ አ ዱማ ክፍልያን ጎርዳናዉ ኮሸና።

12“ቃይ ዎልቃማ ጋልባ ሀርጊ ብታንያ ጋልባ ቦላን አኪደ፥ ሁጲያፐ ገድያ ጋካናዉ ኡባን ማዬዳዋ ግዶፐ፥ ቄሲ በኦ።

13ሄ ዎልቃማ ጋልባ ሀርጊ አ ቦላ ኡባ ማዮፐ፥ ቄሲ እ ጌሻ ግድያዋ ኤርሶ፤ አ ቦላይ ኡባናካ ላመቲደ ቦ ግዴዳ ድራዉ፥ እ ጌሻ።

14ሽን ሄ ማዱ ግዶን ሙኔዳ አሹ ቤቶፐ እ ቱና።

15ቄሲ ሄ ሙኔዳ አሹዋ፤ በኢደ ሄ ብታኒ ቱና ግድያዋ ኤርሶ። ሄ ሙኔዳ አሹ ዎልቃማ ጋልባ ሀርግያ ግድያ ድራዉ፥ እ ቱና።

16ሽን ሄ ሙኔዳ አሹ ቃይካ ላመቲደ ቦጾፐ፥ ሄ ብታኒ ቄስያኮ ዮ።

17ቄሲ አ በኦ፤ አ ማዱይ ቦጼዳዋ ግዶፐ፥ ሄ ብታኒ ጌሻ ግድያዋ ቄሲ ኤርሶ፤ ያቶፐ እ ጌሻ ግዳናዋ።

18“እት አሳ ቦላ ማዱይ ዎደ ፓጽና፥

19አ ሳኣን ቦ ጋፉ ቤቶፐ ዎይ ዞኤዳ እላሁ ከሶፐ፥ ሄ ኡራይ ባረና ቄስያ በሶ።

20ቄሲ አ በኦ፤ ሄ ማዱይ ኦላቶፐነ ማዱ ቦላን ደእያ እስኪካ ላመቲደ ቦጾፐ፥ ሄ ብታኒ ቱና ግድያዋ ቄሲ ኤርሶ። ሄዌ ማዱና ዶሜዳ ዎልቃማ ጋልባ ሀርግያ።

21ሽን ቄሲ በእያ ዎደ፥ እስኪ ቦጽቤናዋ ግዶፐነ ማዱይካ ጋልባ ሉኪደ ኦላትቤናዋ ግዶፐ፥ ቃይ ይ ይ ቦፐ፥ ቄሲ አ ዱማ ክፍልያን ላፑን ጋላሳ ጎርዲደ ዎ።

22ሄዌ አ ጋልባ ቦላን አክ አኪደ ቦፐ፥ ሄ ብታኒ ቱና ግድያዋ ቄሲ ኤርሶ፤ አያዉ ጎፐ፥ ሄዌ ጋልባ ሀርግያ።

23ሽን ሄ እላሁ አክ አክ ቤናን እትሳ ጻላላን ደኦፐ፥ ሄዌ ማዱይ ፓጼዳ ማላ ግድያ ድራዉ፥ ሄ ብታኒ ጌሻ ግድያዋ ቄሲ ኤርሶ።

24“እት አሳ ጋልባ ታማይ ሞፐነ ሄ ሜዳ ሳኣን ቦጼዳ ዎይ ዞኤዳ እላሁ ከሶፐ፥

25ቄሲ ሄ ሳኣ በኦ፤ አ ሳኣን ደእያ እስኪ ቦጾፐነ ማዱይካ ሉኪደ ኦላቶፐ፥ ሄዌ ዎልቃማ ጋልባ ሀርግያ። እ ታማይ ሜዳሳና ከሴዳ፤ ሄዋ ድራዉ ቄሲ እ ቱና ግድያዋ ኤርሶ።

26ሽን ቄሲ በእያ ዎደ፥ ሄ እላሁዋ ቦላን ደእያ እስኪ ቦጽቤናዋ ግዶፐነ ማዱይካ ጋልባ ሉኪደ ኦላትቤናዋ ግዶፐ፥ ቃይ ይ ይ ቤዳዋ ግዶፐ፥ ቄሲ አ ዱማ ክፍልያን ላፑን ጋላሳ ጎርዲደ ዎ።

27ላፑን ጋላሳን ቄሲ አ በኦ፤ ሄ ዎደ ሄ ሳአይ አክ አክ ቦፐ፥ እ ቱና ግድያዋ ቄሲ ኤርሶ። ሄዌ ዎልቃማ ጋልባ ሀርግያ።

28ሽን ሄ እላሁ ጋልባ ቦላን አከናን አጊደ እት ሳኣን ኡቶፐነ ኡባ ቃይ ይ ይ ቦፐ፥ ሄዌ ታማይ ሜዳሳን አቴዳ ማላ ግድያ ድራዉ፥ እ ጌሻ ግድያዋ ቄሲ ኤርሶ።

29“እት አቱማ አሳዉ ዎይ ማጫ አሳዉ ሁጲያ ዎይ ጋጩዋ ቦላን ማዱይ ከሶፐ፥

30ቄሲ ሄ ማዱ በኦ። እ በእያ ዎደ ማዱይ ጋልባ ሉኪደ ኦላቶፐነ አ ቦላን ደእያ እስኪካ አድልያ ጪሻ ማላትያ ሌኦ ግዶፐ፥ ሄ ብታኒ ቱና ግድያዋ ቄሲ ኤርሶ። ሄዌ ሁጲያ ዎይ ጋጩዋ ቦላን ከስያ ቃጨቹዋነ ዎልቃማ ጋልባ ሀርግያ።

31ቃይ ቄሲ ሄ ሀርግያ በእያ ዎደ፥ እ ጋልባ ሉኪደ ኦላትቤናዋ ግዶፐነ ካረ እስኪካ አ ቦላ ዮፐ፥ ሄ ቃጨቹዋ ሀርግያና ደእያ ብታንያ ቄሲ ዱማ ክፍልያን ላፑን ጋላሳ ጎርዲደ ዎ።

32ላፑን ጋላሳን ቄሲ ሄ ሀርግያ፤ በእያ ዎደ ቃጨቹዋ ሀርጊ አከናዋ ግዶፐ፥ አ ቦላን አድልያ ጪሻ ማላትያ እስኪ ባይናዋ ግዶፐነ፥ እካ ጋልባ ሉኪደ ኦላትቤናዋ ግዶፐ፥

33ሄ ብታኒ ሄ ማዱ ዩሹዋን ደእያ እስክያ ሜዶ፤ ቃጨችያ ሳኣን ደእያ እስክያ ማታ ሜዶፖ። ቄሲ ሄ ብታንያ ዱማ ክፍልያን ሀራ ላፑን ጋላሳ ጎርዲደ ዎ።

34ላፑን ጋላሳን ቄሲ ሄ ቃጨችያ ሳኣ በእያ ዎደ፤ ሄዌ ብታንያ ጋልባ ቦላን አካና ዮፐ ጋልባ ሉኪደ ኦላታና ዮፐ፥ ሄ ብታኒ ጌሻ ግድያዋ ቄሲ ኤርሶ። ብታኒካ ባረ ማዩዋ ሜጪደ፥ ጌሻ ግዴ።

35ሽን እ ጌዬዳዋፐ ጉይያን፥ ቃጨችያዌ ሄ ብታንያ ጋልባ ቦላን አክ አክ ቦፐ፥

36ቄሲ አ በእያ ዎደ ሄ ቃጨችያዌ አኬዳዋ ግዶፐ፥ ቄሲ አድልያ ጪሻ ማላትያ እስክያ ኮዮፖ፤ አያዉ ጎፐ፥ ሄ ብታኒ ቱኔዳ።

37ሽን ቄሲ በእያ ዎደ፥ ሄ ቃጨችያሳይ አክቤናዋ ግዶፐነ ካረ እስኪካ አ ቦላ ዶለዳዋ ግዶፐ፥ ሄ ቃጨችያሳይ ፓጼዳ። ሄ ብታኒካ ጌሻ ግድያ ድራዉ፥ እ ጌሻ ግድያዋ ቄሲ ኤርሶ።

38“እት አቱማ አሳ ዎይ ማጫ አሳ ጋልባ ቦላ ቦ እላሁ ከሶፐ፥

39ቄሲ አ፤ በእያ ዎደ ሄ ኡንቱንቱ ጋልባ ቦላን ደእያ እላሁ ሾሎላ ቦ ግዶፐ፥ ሄዌ ጋልባ ቦላን ጮ ከሴዳዋ፤ ሄ ብታኒካ ጌሻ።

40“እት አሳዉ ሁጲያ ብናናይ ቆቆፈቶፐ፥ እ ቦኣ፤ ግዶፐ አትና እ ጌሻ።

41ቃይ እት አሳዉ ሁጲያ ብናናይ ስንና ቦአቶፐ፥ አ ቲሻይ ሜዳ፤ ግዶፐ አትና እ ጌሻ።

42ሽን አ ቦኣ ዎይ አ ቲሻይ ሜዳሳ ቦላን ዞኦ ዎይ ቦ ማዱይ ከሶፐ፥ ሄዌ አ ቦኣን ዎይ ቲሻይ ሜዳሳን ከሴዳ ዎልቃማ ጋልባ ሀርግያ።

43አ ቄሲ፤ በእያ ዎደ አ ቦኣ ዎይ ቲሻይ ሜዳሳ ቦላን ደእያ ማዱይ ጋልባ ቦላን ከስያ ዎልቃማ ጋልባ ሀርግያዳን ዞኦ ግዶፐ፥

44ሄ ብታኒ ቱሙካ ዎልቃማ ጋልባ ሀርጊ ሳክያ ሀርጋንቻ። እ ቱና ግድያ ድራዉ እ ቱና ግድያዋ ቄሲ ኤርሶ፤ አያዉ ጎፐ ሀርጊ አ ሁጲያን ደኤ።

45“ዎልቃማ ጋልባ ሀርጊ ኦይቄዳ አሳይ ፔቴዳ ማዩዋ ማዮ፤ ባረ ሁጲያ ፕጾፖ፤ ባረ መተርሻካ ካሞ፤ ያቲደ፥ ባረ ቃላ ቁ ኦደ፥ ‘ታን ቱና፥ ታን ቱና!’ ያጎ።

46ሄ ሀርጊ አ ቦላ ደኤዳ ኬሻን ኡባን እ ቱና። እ ቱና ግድያ ድራዉ፥ አሳፐ ሻከቲደ ዱንካኔዳ ሳኣፐ ካረና ባረካ ደኦ።

47“አይ ማዩዋ ቦላነ ቦሮቄዳ ሳአይ ቤቶፐ፥ ሄ ማዩ ሱፈ ግድና ዎይ ሊኖ ግድና፥

48ቃጭናፐ ዎይ ሻሉዋፐ ዳደቴዳ ሊኖ ዎይ ሱፈ ግድና፥ ጋልባ ዎይ ጋልባፐ ኦሰቴዳ ማዩዋ ግድና፥

49ሄ ማዩዋ ቦላ ከሲደ ቦሮቁ ማታ ማላትያ ዎይ ዞኦ ማላ በሶፐ፥ እ ቃጭናፐ ዎይ ሻሉዋፐ ዳደቴዳዋ ግድና፥ ጋልባ ዎይ ጋልባፐ ኦሰቴዳ ማዩዋ ግድናካ፥ ሄዌ ቦሮቁ ከሴዳ ድራዉ፥ ሄዋ ቄስያ በሳናዉ ኮሼ።

50ቄሲ ሄ ቦሮቁዋ በኢደ፥ ሄ ቦሮቁዋና ደእያ ማዩዋ ዱማ ክፍልያን ላፑን ጋላሳ ጎርዲደ ዎ።

51ላፑን ጋላሳን ቄሲ ሄ ማዩዋ በእያ ዎደ፤ ሄ ማዩዋ ቦላን አክ አክ ቦፐ፥ እ ቃጭና ዎይ ሻሎ ማዩዋ ግድና፥ ጋልባ ዎይ ጋልባፐ ኦሰቴዳ ማዮ ግድናካ፥ ሄዌ እቱዋፐ እቱዋ ኦይቂያ ቦሮቆ ግድያ ድራዉ፥ ሄ ማዩ ቱና።

52ቃይ ሄ ማዩ ቃጭና ዎይ ሻሎ ማዮ ግድና፥ ሊኖ ዎይ ሱፈ ግድና፥ ጋልባፐ ኦሰቴዳዋ አያ ግድናካ፥ ቄሲ አ ጹጎ። ሄዌ እቱዋፐ እቱዋ ኦይቂያ ቦሮቆ ግድያ ድራዉ፥ እ ጹገታናዉ በሴ።

53“ቃይካ ቄሲ በእያ ዎደ፥ ሄ ቦሮቁ ማዩዋ ቦላ አክቤናዋ ግዶፐ፥ እ ቃጭና ዎይ ሻሎ ማዮ ዎይ ጋልባፐ ኦሰቴዳዋ አያ ግድናካ፥

54ሄ ቦሮቁ ደእያ ማዩዋ ሜጫናዳን ቄሲ አዛዞ። ሄዋፐ ጉይያን፥ ሄ ማዩዋ ዱማ ክፍልያን ሀራ ላፑን ጋላሳ ጎርዲደ ዎ።

55ሄ ቦሮቆ ሳአይ ደእያ ማዩዋ ሜጮዋፐ ጉይያን፥ ቃይካ ቄሲ በእያ ዎደ ሄ ቦሮቁ ባረ ማላ ላምቤናዋ ግዶፐ፥ እ አክ አክ ባና ዮፐካ ቱና። ሄ ቦሮቆ ሳአይ ማዮ ጉየ ባጋና ዎይ ስን ባጋና ደእንካ፥ ሄ ማዩ ታማን ጹገታናዉ ኮሼ።

56ሽን ሄ ማዩዋ ሜጭ ስምና ቄሲ በእያ ዎደ ቦሮቁ ይ ይ ቦፐ፥ እ ጋልባ ግድና፥ ቃጭና ዎይ ሻሎ ማዮ ግድናካ፥ ሄ ቦሮቁ ደእያ ሳኣ ቄሲ ዳኪደ ከስ ድጎ።

57ሄዋፐ ጉይያን፥ ማዩዋ ቦላ ስሚደካ ከሶፐ፥ ሄ ማዩ ቃጭና ዎይ ሻሎ ማዮ ግድና፥ ጋልባፐ ኦሰቴዳዋ አያ ግድናካ፥ ሄዌ አክ አክ ብያ ቦሮቆ ሳ ግድያ ድራዉ፥ ሄ ቦሮቁ ደእያ ማዩ ታማን ጹገታናዉ በሴ።

58ሽን ሜጨቴዳ ማዩ ቃጭና ዎይ ሻሎ ማዮ ግድና፥ ዎይ ጋልባፐ ኦሰቴዳ አያ ማዮ ግድናካ፥ ቦሮቆ ሳአይ አ ቦላፐ ዮፐ፥ ሄ ማዩ ላኤንዋ ሜጨቶ፤ ሄዋፐ ጉይያን፥ እ ጌሻ ግዴ።

59“እት ማዩ ሱፈ ዎይ ሊኖ ግድና፥ ቃጭና ዎይ ሻሎ ማዮ ግድና፥ ዎይ ቃይ ጋልባፐ ኦሰቴዳዋ ግድናካ፥ ሄ ማዩዋ ጌሻ ዎይ ቱና ጊሳናዉ ዳንዳይያ ቦሮቆ ሳኣ ዎጋይ ሀዋ” ያጌዳ።