Job 9

Amharic Dawro DFBE (ጌሻ ማጻፋ) No Year

1ሄዋፐ ጉይያን፥ ኢዮብ ዛሪደ፥ ሀዋዳን ያጌዳ፤

2“ኤ፥ ሀዌ ህንተ ግያዌ ቱማ ግድያዋ ታን ኤራይ። ሽን አሳይ ጾሳ ስንን ጽሉዋ ግዳናዉ ዋን ዳንዳዪ?

3አናና እት ኡራይ ፓሉመታናዉ ኮዮፐ፥ ሄ ኡራይ እ ኦችያ ሻኡ ኦሻፐ እቱዋነ ዛራናዉ ዳንዳየና።

4ጾሳይ ባረ ዎዛናን አዳ ኤራንቻ፤ ባረ አቢያንካ ዳሮ ዎልቃማ። አናና ኤቀቲደ ጾነትቤናዌ ባዋ።

5ኤረናን ደእሺና፥ ቃ ደረቱዋ እ ኡንቱንቱ ሳኣፐ ድጌ፤ ባረ ሀንቁዋንካ አ የጌ።

6እ ቢታ አ ሳኣን ቃ፤ ቢታ ቱቀቱዋካ ዪቂዪቂሴ።

7አዋይ አዋጸናዳንነ ጾልንተቱ ፖኤናዳን አዛዛናዉ ዳንዳዬ።

8እ ባረካ ሳሎቱዋ ምጬዳ፤ አባ ቤታ ቦላንካ ሀመቴ።

9ጾሳይ ዎጋ ቤርያ፥ ኦርዮና፥ ፕልያድሳ ግያ ጾልንተቱዋ ጩጉዋነ ሄዋዳንካ ገድሳ ባጋና ደእያ ጾልንተቱዋ ጩጎቱዋ መዳዋ።

10ፕልጊደ ኤራናዉ ዳንዳየተና ዎልቃማቱዋ፥ ፓይዱ ባይና ኦራባቱዋ እ ኦ።

11“ጾሳይ ታኮ ሺቅንቶካ፥ ታን አ በአናዉ ዳንዳይከ፤ እ ታ ምይያና አንቶካ፥ ታን እ ሄዋን ደእያዋ ኤራናዉ ዳንዳይከ።

12እ ባረ ኮዬዳዋ አክና፥ አ ኦንነ ድጋናዉ ዳንዳየና። ‘ዋታይ?’ ያጊደ አ ኦቻና አሳይ ባዋ።

13ጾሳይ ባረ ሀንቁዋ ተኤና፤ ራኣባ ግያ ዳዊያ ማድያ ባረ ሞርከቱዋ ባረ ገድያፐ ጋርሳዉ አደ የ።

14“ያትና፥ ታን አ ኦሻ ዛራናዉ ሎኦ ቃላ ሀቃፐ ደማናዉ ዳንዳያይታ?

15ታን ጽሉዋ ግድንቶካ፥ ፕርድያ ጾሳይ ታና ማራናዳን ዎሳናፐ አትና፥ ታን አ ቦላ ሃሳይከ።

16ታን አ ጼስና፥ እ ታዉ ኮይንቶካ፥ ‘ታ ኮሻ ስሴዳ’ ጋደ አማንከ።

17እ ታና ጎትያን መንሬ፤ ጋሱ ባይናን እ ታ ማዱ ዳርሴ።

18ታና ሸምፑዋካ ሸምፕሰናን ድጌ፤ እ ታ ደኡዋ ጫሙዋን ኩንዳ።

19ዎልቃባ ሃሳዮፐ፥ እ ዎልቃማ። ፕርዳዋ ሃሳዮፐ፥ አ ጼሲደ፥ ፕርዳ ጎለ ሺሻና አሳይ ባዋ።

20ታን ጽሉዋ ግድንቶካ ታ ዶናይ ታና ባይዛንቻ ከሴ፤ ታን ቶሺ ባይና አሳ ግድንቶካ፥ እ ታና ጌላ ከሴ።

21“ታን ቶሺ ባይና አሳ። ሽን ታ ደኡዋ ዶስከነ ካይ።

22ዱማተይ ባዋ፤ ሄዋ ድራዉ፥ ታን፥ ‘እ ቶሺ ባይናዋንታነ ኢታቱዋ ላኡዋካ እትፐ ይሴ’ ያጋይ።

23ባሻይ ጽሎ አሳቱዋ ቆፐናን ዎያ ዎደ፥ ጾሳይ ቅሊጬ።

24ጾሳይ ሀ ሳኣ ኢታ አሳቶ አደ እሜዳ፤ ፕርድያዋንቱ አይፍያካ ጎዜዳ። ሀዋ ኡባ ኦዳዌ አ ግዳናፐ አትና፥ ሀራይ ኦኔ?

25“ታ ደኡዋ ላይቱ ዎ ዎጽያ ኡራፐካ አደ ኤሌሊኖ፤ ኡንቱንቱ ሎኦባ በኤናን ፓሊደ ዪኖ።

26ታ ደኡዋ ላይቱ ማቃ ዎንግርያዳን ኤሌሊኖ፤ አርጋንይ ባረዉ ምያዋ ኦይቃናዉ ሳሉዋፐ ዱገ ፓልያዋዳን ፓሊኖ።

27ታን፥ ‘ታ ዙዙን ዶጋና፤ ታ ሶምኡዋካ ምስያዋ አጋደ ፓሽካና’ ያጎፐ፥

28ኔን ታና ጌሻ ጌናዋ ታን ኤራይ፤ አያዉ ጎፐ፥ ታና ጋካና ዋይያ ኡባዉ ታን ያያይ።

29ያትና፥ ታን ባይዛንቻ ግዳ ክቻድፐ አትና፥ ጮ መላ አያዉ ዳቡራይታ?

30“ታን ታ ቦላ ሀራይ አቶ ሳሙናን ሜጨታንቶካ፥ ታ ኩሽያ ሀንጪጭያን ሜጫንቶካ፥

31ኔን ታና ኡርቃ ኦላን ኦላና፤ ታ ማዩካ ታና ሸነታና።

32ታን አዉ ዛሩዋ እማና ጋናዉ፥ ጾሳይ ታ ማላ አሳ ግደና። ሄዋ ድራዉ ፕርዳዉ ቦይተ ጋናዉ ዳንዳይከ።

33ሽን ባረ ኩሽያ ኑ ላኡዋ ቦላ ዎደ፥ ኑና ስገያ አሳይ ኑ ግዶን ደኤረኔሻ!

34አቤት ጾሳዉ፥ ታና ሙርያዋ አጋ፤ ታና ዳጋንያዋነ ያሽስያዋ አጋ።

35ያቶፐ፥ ታን አዉ ያየናን ሃሳያና፤ ሽን ሀእ ዳንዳይከ።

← Chapter 8 Chapter 10 →