Job 32

Amharic Dawro DFBE (ጌሻ ማጻፋ) No Year

1ኢዮብ፥ “ታን ጽሎ አሳ” ጌዳ ድራዉ፥ ሀ ሄዙ አሳቱ አዉ ዛሩዋ እምያዋ አግ ባሼድኖ።

2ኢዮብ ጾሳ ጽሉዋ ግያዋ አጊደ፥ ባረና ጽሉዋ ኦዳ ድራዉ፥ ራማ ያራ ግድያ ቡዝያ ባርኬላ ናአይ ኤልሁ ኢዮባ ቦላ ሎይ ሀንቀቴዳ።

3ኤልሁ ቃይ ኢዮባ ሄዙ ላገቱዋካ ሀንቀቴዳ፤ አያዉ ጎፐ፥ ኡንቱንቱ አ ጮ ባይዛንቻ ጌድኖፐ አትና፥ አዉ ሱረ ዛሩዋ ዛራናዉ ዳንዳይበይክኖ።

4ኤልሁ ኡንቱንቱፐ ቴፋትያ ድራዉ፥ ኡንቱንቱ ኡባይ ሃሳያ ዉርሳና ጋካናዉ ናጌዳ።

5ሀ ሄዙ አሳቱ ኢዮባዉ ግድያ ዛሩዋ እማናዉ ዳንዳይቤናዋ በኢደ፥ እ ሎይ ሀንቀቴዳ።

6ቡዝያ ባርኬላ ናአይ ኤልሁ ሀዋዳን ያጊደ፥ ሃሳያ ዶሜዳ፤ “ታን ላይን ናአታይ፤ ህንተ ታፐ ጭሚታ። ሄዋ ድራዉ፥ ታን ታ ቆፋ ህንተዉ ኦዳናዉ ያያድ።

7ታን፥ ‘ጭማቱ ሃሳይኖ፤ ባረንቱ ዳሮ ላይን ደሜዳ አዳ ኤራተ ታማርስኖ’ ጋደ ቆፓድ።

8ሽን አሳኮ ዪደ፥ አዳ ኤራተ አሳዉ እምያዌ ኡባ ዳንዳይያ ጾሳ አያና።

9አሳ አዳ ኤራንቻ ከስያዌ ጭማተ ግደና፥ ዎይ ልከባይ ገልያዌ ዳሮ ደኤዳ አሳቱዋሳ ግደና።

10ሄዋ ድራዉ፥ ስስተ፤ ታንካ ታ ቆፋ ህንተዉ ኦዳና።

11“በእተ፥ ህንተ ሃሳይያ ዎደ፥ ታን ጮኡ ጋደ ሀይዛድ፤ ህንተ ሃሳያና ቃላ ቆፓደ ናጋድ።

12ታን ህንተ ግያዋ ኡባ ዉርሳ ስሳድ፤ ሽን ህንተፐ ኦንነ ኢዮብ ባይዛንቻ ጊደ አማንቤና፤ ቃይ ህንተፐ ኦንነ አ ፓላማዉ በስያ ዛሩዋ እምቤና።

13ኢዮባ ሃሳያዉ ካልስያ ዛሩዋ ዛራናዌ ጾሳፐ አትና፥ አሳ ግደና ድራዉ፥ ህንተ፥ ‘ኑን አዳ ኤራተ ደሜዶ’ ጌናዳን ናገትተ።

14ኢዮብ ፓሉመቴዳዌ ህንተናናፐ አትና፥ ታናና ግደና። ታን ህንተ ሃሳዬዳዋዳን አዉ ዛሩዋ እምከ።

15“ኢዮባ፥ ኡንቱንቱ ዳጋሚደ፥ ነ ሃሳያዉ ዛሩዋ እማናዉ ዳንዳይበይክኖ፤ ኡንቱንቶ ሃሳይያዌ ዬዳ።

16ኡንቱንቱ ሃሳይያዋ ዪደ፥ ጮኡ ጊደ ኤቆፐ፥ ታንካ ናጋናዉ ኮሺ?

17ታዉካ ኦድያዌ ደኤ፤ ታንካ ታ ቆፋ ኦዳና።

18ዳሮ ሃሳይያዌ ደእያ ድራዉ፥ ታ ግዶን ደእያ አያናይ ታና ኦዳ ጊደ ግዴ።

19በእተ፥ ታዉ ሃሳይያ ካላይ እመተናዋ ግዶፐ፥ ታን ሆኦ ዎይንያ ኤሳይ ኩሜዳ ኦጎሩዋዳን ቃና ሀናይ።

20ታዉ ሀዋፐ ጉ ኬካና ማላ፥ ታን ሃሳያናዉ ኮሼ፤ ታ ዶናካ ዶያደ፥ ታን ታ ዛሩዋ እማናዉ ኮሼ።

21ሀ የዉዋን ታን ኦናነ ማድከ፥ ዎይ አይ አሳነ ጮ ሳቢከ።

22አያዉ ጎፐ፥ አሳ ጮ ሳቢያዌ ታዉ ሙለካ ኤረተና። ታን ቃይ ሄዋ ሀኖፐ፥ ታና መዳዌ ታና ሙራና።

← Chapter 31 Chapter 33 →