Jeremiah 47

Amharic Dawro DFBE (ጌሻ ማጻፋ) No Year

1ግብጼ ካቲ ጋዛ ኦሊደ ጾናናፐ ካሰቲደ፥ ፕልስጼማ ቢታ ጼልያዋን መና ጎዳፐ ትምቢትያ ኦድያ ኤርማሳኮ ዬዳ ቃላይ ሀዋ።

2መና ጎዳይ ሀዋዳን ያጌ፤ “በእተ፥ ሁጲሳ ባጋ ቢታፐ ሃይ ቃናነ ድኡ ገሌዳ ኩን ሃዳን ጎጋና። ቢታነ ቢታ ቦላን ደእያዋ ኡባ፥ ካታማቱዋነ ካታማቱዋ ግዶን ደእያ አሳ ኡባካ ሙካና። ያቶፐ አሳይ ዋሳና፤ ሄ ቢታን ደእያ ኡባይ ዬካና።

3አያዉ ጎፐ፥ ኡንቱንቱ ፓራቱዋ ኮትያ፥ ፓራ ጋረቱዋ ጊረነ ጋረቱዋ ይንግርያዋን ጎንዶርሳ ስሳና፤ አዎቱ ባረንቱ ኩሺ አርጋጬዳ ድራዉ፥ ባረንቱ ናናቱዋ ማዳናዉ ጉየ ስምክኖ።

4ፕልስጼማ አሳ ይሳናዉነ ጺሮሳነ ሲዶና አሳይ ፕልስጼማቱዋን ማደተናዳን፥ አቴዳዋንታ ቢታፐ ዎናዉ ዎዲ ጋኬዳ። መና ጎዳይ ፕልስጼማ አሳቱዋ፥ ሄዋንቱካ ሜድተራነ አባ ሃን ዶደቴዳ ሳኣን አቴዳዋንታ ካፍቶራፐ ዬዳዋንታ ይሳና ሀኔ።

5ጋዛ አሳይ ዎልቃማ ካዩዋ ካዮቴዳ፤ አስቃሎና አሳይካ ስርጵ ጌዳ። ህንተኖ፥ አባ ዛንጋራን ባሻፐ አቴዳዋንቶ፥ ህንተ አዉደ ጋካናዉ፥ ህንተ ቦላ ቃንጸረደ ካዮቲቴ?

6“ህንተ፥ ‘ኔኖ መና ጎዳ ማሻዉ፥ ኔን ጮኡ ጌናን እጽያዌ አዉደ ጋካናሴ? ነ ሾኩዋን ስማ ገላ! ጮኡ ጋደ ሸምፓ!’ ያጊታ።

7ሽን መና ጎዳይ አ አዛዝና፥ እ ዋን ጮኡ ጎ ጊቴ? አስቃሎና ቦላነ አባ ዛንጋራን ቢታን ደእያ አሳ ቦላ እ አ ሱንድጌዳ” ያጌ።

← Chapter 46 Chapter 48 →