Isaiah 66

Amharic Dawro DFBE (ጌሻ ማጻፋ) No Year

1መና ጎዳይ ሀዋዳን ያጌ፤ “ሳሉ ታ አራታ፤ ሳአይካ ታ ገዲ የያ ሳ። ያትና ህንተ ታዉ ኬጻና ጎሊ አይ ማላ ጎሌ? ታን ሸምፓና ሳአይ ሀቃነ?

2ሄዋንታ ኡባባካ ታ ኩሺ ኦዳ ግደኔ? ሄዋ ድራዉ፥ ሀዋንቱ ኡባቱካ ታዋንታ። ሽን ታን ባረና ዝቂ ኦያዋኮ፥ ባረ ኦዳ ናጋራዉ ካዮቲደ ስምያዋኮነ ታ ቃላን ኮኮርያዋኮ ጼላና ያጌ መና ጎዳይ።

3“አሳይ ኡባይ ባረዉ ባረዉ እንጀትያ ኦግያ ዶሬዳ ጋሱዋን፥ ኮሩማ ያርሽያዌ አሳ ዎያ ኡራ ማላ፤ ዶርሳ ማራ ያርሽያዌካ ካና ጎራእያ አሳ ማላ፤ ካ ያርሹዋ ያርሽያዌካ ጉዱን ሱ ያርሽያ አሳ ማላ፤ ቃይ ሀሳይስያ እጻና ጩዋይያ ኡራይካ ኤቃዉ ጎይንያ አሳ ማላ። ኡንቱንቱ ሸምፑካ ኡንቱንቱ ቱናተን ናሸቴ።

4ሄዋ ድራዉ፥ ታን መቱዋ ኡንቱንቶ ዶራና፤ ኡንቱንቱ ያዬዳዋካ ታን ኡንቱንቱ ቦላን አሀና። አያዉ ጎፐ፥ ታን ጼሴዳ ዎደ፥ ኦንነ ኮይቤና፤ ታን ሃሳዬዳ ዎደካ ኦንነ ሀይዝቤና። ኡንቱንቱ ታ ስንን ኢታባ ኦድኖ፤ ታን ናሸተናዋ ዶሬድኖ” ያጌ።

5ህንተኖ፥ ጾሳ ቃላዉ ያዪደ ኮኮርያዋንቶ፥ መና ጎዳ ቃላ ስስተ፤ “ህንተ እሻቱ፥ ህንተና እጽያዋንቱ፥ ታ ሱን ድራዉ፥ ህንተና ቦህያዋንቱ፥ ‘ህንተ ናሸቻ ኑን በአና ማላ፥ መና ጎዳይ አነ ቦንቼትና በአና’ ያጌድኖ፤ ሽን ኡንቱንቱ ዬላታና።

6ካታማፐ ይያ ዋሱዋ ስስተ፤ ጌሻ ጎልያፐ ይያ ኮሻካ ስስተ። ሄዌ ኮሻይ ባረ ሞርከቶ ኡንቱንቱ ኦሱዋ ማላ ኩሽያ ዛርያ መና ጎዳ ኮሻ።

7“ባንከናን ናኣ የልያ ማጫ አስ ደኢ? ኦይይ ኡንኤናን አቱማ ናኣ የልያ ማጫ አስ ደኢ?

8ሀዋ ማላባ ኦኔ ስሴዳዌ? ቃይ ሀዋ ማላባ ኦኔ በኤዳዌ? እት ቢታ አሳይ ፐጽ እት ጋላስ የለታናዉ ዳንዳዪየ? ዎይ ካዉተይ እት ኩን የለቲ? የሩሳላማ ባንኮ ሳናካ፥ እት ኩን ባረ ናናቱዋ የላዱ።

9የላና ዎድያ ጋያ ታን ኡንቱንቱ የላናዳን ኦክታየ? ያጌ መና ጎዳይ። ቃይ የላናዳን ኦያ ታን የልያ ኡሉዋ ጎርዳይታየ? ሀዋ ግያዌ ታና፥ ጾሳ።

10“ህንተኖ የሩሳላሞ ሲቅያ ኡባቶ፥ ኢናና ናሸትተ፤ እ ድራዉካ ናሸቻን ፖጩ ጊተ። ህንተኖ እሲ ዬክያ ኡባቶ፥ ኢናና ሎይ ናሸትተ።

11አያዉ ጎፐ፥ ህንተ እ ምንያ ን ሚደ ካላና፤ ቃይ እ ዳሮ ቦንቹዋፐ ሎይ ኡሺደ፥ ህንተ ናሸታና” ያጌ።

12መና ጎዳይ ሀዋዳን ያጌ፤ “በእተ፥ ታን እዝዉ ሳሮተ ሻፋዳን ዳርሳና፤ ካዉተቱዋ ዱረተካ ኩሚደ ጎግያ ፑልቱዋዳን፥ እዝዉ አሀና። ያቶፐ ህንተ ሄዋ ማና፤ እ ሀሽያን ህንተ ቶከታና፤ እ ክዉዋን ኡቲደ፥ ህንተ እሻለታና።

13አታ ባረ ናኣ ምንያዋዳን፥ ታንካ ህንተና ምንና፤ ህንተ የሩሳላመን ምነታና።

14ህንተ ሄዋ በእያ ዎደ፥ ህንተ ዎዛናይ ናሸታና፤ ህንተ መቀይካ ማታዳን አጫና። ቃይ መና ጎዳ ኩሺ አ ቆማቱዋና ደእያዌነ አ ሀንቁ አ ሞርከቱዋ ቦላን ደእያዌ ኤረታና” ያጌ።

15በእተ፥ መና ጎዳይ ታማ አኪደ ያና። ባረ ሀንቀቴዳዋንታ ሙራናዉነ ታማ ላጩዋን ሴራናዉ ሳራጋላ ቶጊደ፥ እ ያና።

16አያዉ ጎፐ፥ መና ጎዳይ አሹዋ ማዬዳ ኡባ ታማንነ ማሻን ፕርዳና። ቃይ መና ጎዳ ማሻን ሀይቄዳዋንቱ ፓይዱ ዳራና።

17መና ጎዳይ ሀዋዳን ያጌ፤ “አታክልትያ ሳኣን ባረንቱ ኤቃዉ ጎይናናዉ፥ ባረንቱ ግዶን ደእያ እቱዋ ካሊደ፥ ባረና ዱማዪደ ጌሽያዋንቱ፥ ቃይ ጉዱን አሹዋ፥ ሸነይያዋነ ኤጨርያ ምያዋንቱ ኡባይ እትፐ ያና።

18“ታን ኡንቱንቱ ኦሱዋነ ኡንቱንቱ ቆፋ ኤርያ ድራዉ፥ ካዉተቱዋ ኡባነ ዱማ ዱማ ቃላን ሃሳይያዋንታ እትፐ ሺሻናዉ ያይ፤ ኡንቱንቱ ሺቂደ፥ ታ ቦንቹዋ በአና።

19ታን ኡንቱንቱ ግዶን ማላታ ኦና፤ ኡንቱንቱፐ አቴዳዋንታካ ታ ግታተ ስስቤናነ ታ ቦንቹዋ በእቤና ካዉተቱዋኮ፥ ታርሴሳኮ፥ ሊብያኮ፥ ሊድያኮ፥ ቱባላኮ፥ ያዋናኮነ አባ ዶናን ደእያ ሃኮ ቢታቱዋኮ ኪታና፤ ኡንቱንቱ ታ ቦንቹዋ ካዉተቱዋ ግዶን ኦዳና። 66:19 ሊብያኮ: እብራዌዋን ፑጻ ጌተቴ።

20እስራኤልያ አሳይ ካ ያርሹዋ ጌሻ ሚሻን ዎደ፥ መና ጎዳ ጌሻ ጎልያ አህያዋዳን፥ ኡንቱንቱ ህንተ እሻቱዋ ኡባ ካዉተቱዋ ኡባ ግዶፐ ፓራቱዋን፥ ፓራ ጋረቱዋን፥ ጋሎቱዋን፥ ባቁሎቱዋንነ ሚሻቱዋ ጫንያ ጋረቱዋን ኡትሲደ፥ ታዉ እሙዋ ግዳናዳን፥ መና ጎዳ ጌሻ ደርያ የሩሳላመ አሀና።

21ኡንቱንቱፐ እቱዋ እቱዋ ታን ቄሳቱ ዋነ ሌዋቱዋ ከሳና። ታን መና ጎዳይ ሀዋ ኦዳይ” ያጌ።

22ቃይካ መና ጎዳይ ሀዋዳን ያጌ፤ “ታን መያ ኦራ ሳሎቱነ ኦራ ሳአይ ታ ስንን ምኒደ ደእያዋዳን፥ ሄዋዳንካ፥ ህንተ ዘረይነ ህንተ ሱንይ ምኒደ ደአና።

23አግና ጼሩዋፐ ቢደ ሀራ ጼሩዋ ጋካናዉነ እት ሳምባታፐ ቢደ ሀራ ሳምባታ ጋካናዉ፥ አሳይ ኡባይ ታ ስንን ጎይናናዉ ያና ያጌ መና ጎዳይ።

24ኡንቱንቱ ከሲ ቢደ፥ ታ ቦላ ማካሌዳ አሳቱ አሃ በአና። ሄዋንታ ምያ ጉጹኒ ሀይቀና፤ ኡንቱንታ ጹግያ ታማይካ ቶኤና። ኡንቱንቱ አሳ ኡባዉ ሸነይያባ ግዳናዋ” ያጌ።