Isaiah 35

Amharic Dawro DFBE (ጌሻ ማጻፋ) No Year

1ቢታ ባዙነ መላ ቢታይ ናሸታና፤ መላ ቢታይ ናሸቻ ፖጩ ጊደ፥ ጪሻ ጪሻና።

2እ ዳሮፐ ጪሻና፤ ፖጩ ጊደ ናሸቻን የጻና። ሊባኖሳ ቦንቹነ ቃርመሎሳነ ሳሮና ግታተይ እመታና፤ ኡንቱንቱ መና ጎዳ ቦንቹዋነ ኑ ጾሳ ግታተ በአና።

3ዳቡሬዳ ኩሸቱዋነ አርጋጬዳ ጉልባታ ምንተ።

4ዎዛናን ያሻይ ደእያዋንታ፥ “ምንተ! ያዮፕተ! ሄኮ፥ ህንተ ጾሳይ ሀሉዋ ከሳናዉነ ባረ ጾሳተን ኡንቱንታ ሙራናዉ ያና፤ እ ህንተና አሻና” ያግተ።

5ሄ ዎደ፥ ቆቀቱዋ አይፊ ዶየታና፤ ቱለቱዋ ሀይይካ ስሳና።

6ዎባቱዋ ገንእያዳን ጉፓና፤ ዱደቱካ ናሸቻን የጻና፤ ባዙዋን ሃይ መሎሳን ፑልቱ ቃና።

7ጹግያ ሻፊ ዳጋቴዳ ሃ ግዳናዋ፤ መላ ቢታይ ሃ ፑልታና፤ ዎራካናቱ አላጽያሳን ማታይ ማቃይነ ጫሪ ዶላና።

8ያን አኮ ኦጊ ደአና፤ እካ ጌሻተ ኦግያ ጌተታና። ጌሻ ግደናዋንቱ ሄ ኦግያና አክኖ። ሽን እ ጌሻቱዋሳ ግዳናዋ፤ ኢታ ኤያቱ አን ስመረትክኖ።

9ያን ጋሙ ደኤና፤ ያሽያ ዶአቱካ ሄዋና አክኖ፤ ያንካ ቤትክኖ፤ ሽን ዎዘቴዳዋንቱ ጻላላይ ሀመታና።

10መና ጎዳይ ዎዜዳዋንቱ ስማና፤ የጺድ፥ ጽዮነ ያና፤ መና ናሸቻይ ኡንቱንቱ ሁጲያን ዎና። ኡንቱንቱ ናሸቻነ ሀሹ ግያዋ ደማና፤ ካዩነ ኦሊ ዎራ ባቃታና።

← Chapter 34 Chapter 36 →