Hebrews 5

Amharic Dawro DFBE (ጌሻ ማጻፋ) No Year

1ቄሳቱዋ ኡባቱዋ ካፓቱ ሁጲያን ሁጲያን ባረ አሳ ግዶፐ ዶረቲደ፥ ሄ አሳ ግሻታዉ ጾሳዉ ኦናዉ፥ እሙዋ እማናዉነ ናጋራ ያርሹዋ ያርሻናዉ ሱንቴድኖ።

2እ ባረ ሁጰዉ ዳቡራንቻ ግድያ ድራዉ፥ ታማርቤናዋንቶነ ባልያዋንቶ ቃረታናዉ ዳንዳዬ።

3ሄዋ ድራዉ፥ ሄ ቄሳቱዋ ኡባቱዋ ካፑ አሳ ድራዉ ያርሹዋ ያርሽያዋዳን፥ ባረ ሁጰ ናጋራ ድራዉካ ያርሻናዉ በሴ።

4ጾሳይ አሮና ቄሳቱዋ ኡባቱዋ ካፑዋ ግዳና ማላ ጼሴዳዋዳን፥ ጾሳይ ጼሳናፐ አትን፥ ኦንነ ቄሳቱዋ ኡባቱዋ ካፑዋ ግድያ ቦንቹዋ ባረዉ አካናዉ ዳንዳየና።

5ሄዋዳንካ፥ ክርስቶስ ቄሳቱዋ ኡባቱዋ ካፑዋ ግድያ ቦንቹዋ ባረዉ አክቤና፤ ሽን ጾሳይ አ፥ “ኔን ታ ናኣ። ታን ሀቼ ነዉ አዉዋ ግዳድ” ያጌዳ።

6ሄዋዳንካ ቃይ ሀራሳን፥ “ማልክ-ጸደቂ ቄሳ ግዴዳዋዳን፥ ኔንካ መናዉ ቄሳ ግዳና” ያጌዳ።

7የሱስ ሳኣን ደእያ ዎደ፥ ባረና ሀይቁዋፐ አሻናዉ ዳንዳይያ ጾሳ ሎይ ዬኪደነ አፎጺደ ዎሴዳነ ኦቼዳ፤ ጾሳይ አ ዎሳ ስሴዳዌ፥ እ ባረና ቶቼዳዋሳነ አዉ ያዬዳዋሳ።

8የሱስ ጾሳ ናኣ ግዶፐነ፥ ባረ ዋየቴዳ ዋይያን አዛዘትያዋ ታማሬዳ።

9የሱስ ባረ ኦሱዋ ፖሌዳ ዎደ፥ ባረዉ አዛዘትያ ኡባዉ መና አቶተ ደማናዉ ጋሶ ግዴዳ።

10ቃይ ጾሳይ ማልክ-ጸደቃ ሱንተዳን፥ ቄሳቱዋ ኡባቱዋ ካፑዋ ግዳና ማላ፥ አ ሱንዳ።

11ኑን ሀ የዉዋን ሃሳያናባይ ዳሮባይ ደኤ፤ ሽን ህንተንቱ አኬካናዉ አዛላ ግድያ ድራዉ፥ ህንተንቶ ኦድ ገልሳናዉ ዋይሴ።

12አያዉ ጎፐ፥ ህንተንቱ ሀ ዎድያን ታማርስያዋንታ ግዳናዉ በሶፐካ፥ ጾሳ ቃላ ኮይሮ ትምርትያ ህንተንታ ዛር ታማርስያ እት ኡራ ኮሼ፤ ህንተንታ ኡሽያ ማ ኮሼፐ አትን፥ ጮምያ ቁማ ኮሸና።

13ማ ፓከቲደ ደእያ ኦንነ ጋጭኖ ናኣ ግድያ ድራዉ፥ ጽሎተ ትምርትያዋ ኤረና።

14ሽን ምኖ ቁማይ ኢታነ ኬካ ደኡዋ ዳሩዋን ሻክ ኤሬዳ ዎዛናማ አሳሳ።

← Chapter 4 Chapter 6 →