Genesis 46

Amharic Dawro DFBE (ጌሻ ማጻፋ) No Year

1እስራኤሊ ባረዉ ደእያዋ ኡባ አክ ደንዲደ፥ በርሳበሀ ጋኬዳ፤ እ ባረ አዉዋ ይሳቃ ጾሳዉ ያርሹዋ ያርሼዳ።

2ጾሳይ ቃማ አኩሙዋን አ፥ “ያቆባ፥ ያቆባ” ያጌዳ። እ፥ “አቤ” ጊደ ኮዬዳ።

3አ፥ “ታን ጾሳ፥ ነ አዉዋ ጾሳ፤ ኔን ዱገ ግብጼ ባናዉ ያዮፓ፤ አያዉ ጎፐ፥ ታን ኔና ያን ዎልቃማ ካዉተ ከሳና።

4ታን ኔናና እትፐ ግብጼ ባና፤ ቃይ ታን ነ ዘረ ያፐ ከሳና። ዮሴፎ ባረ ኩሽያን ነ አይፍያ ሺሻና” ያጌዳ።

5ሄዋፐ ጉየ፥ ያቆብ በርሳበሄፐ ደንዴዳ፤ እስራኤልያ አቱማ ናናይ ባረንቱ አዉዋ ያቆባ፥ ባረንቱ ናናነ ባረንቱ ማቻቱዋ ግብጼ ካቲ ኡንቱንቶ ኪቴዳ ፓራ ጋርያን ዎደ አፌድኖ።

6ኡንቱንቱ ካናነ ቢታን ሞዴዳ ማጹዋነ መህያ ኡባ አፌድኖ። ያቆብነ አ ዘረ ኡባይ አናና ግብጼ ቤድኖ።

7እ ባረ አቱማ ናናነ ባረ ናና አቱማ ናና፥ ባረ ማጫ ናናነ ባረ ናና ማጫ ናና፥ ሄዌነ ባረ ዘረ ኡባ ባረናና ግብጼ አፌዳ።

8እስራኤላና ግብጼ ጋድያ ቤዳ እስራኤልያ ናና ሱንይ ሀዋፐ ካሊደ ጻፈቴዳዋ። ያቆባ ባይራ ናአይ ሮቤላ፤

9ሮቤላ አቱማ ናናይ ሀኖካ፥ ፓሉ፥ ሄጽሮናነ ካርማ።

10ስሞና አቱማ ናናይ ይሙኤላ፥ ያሚና፥ ኦሃዳ፥ ያኪና፥ ጾሃራነ ካናነ ምሽራት ናኣ ሻኡላ።

11ሌዊ አቱማ ናናይ ገርሾና፥ ቃሃታነ ማራራ።

12ይሁዳ አቱማ ናናይ ኤራ፥ ኦናና፥ ሼላ፥ ፓሬሳነ ዛራሀ፤ ሽን ኤርነ ኦናን ካናነ ቢታን ሀይቄድኖ። ፓሬሳ አቱማ ናናይ ሄጽሮናነ ሀሙላ።

13ይሳኮራ አቱማ ናናይ ቶላአ፥ ፑዋ፥ ያሹባነ ሽምሮና።

14ዛብሎና አቱማ ናናይ ሰሬዳ፥ ኤሎናነ ያህላኤላ።

15ሀዋንቱ ልያ ማስጰጾምያን ያቆባዉ የሌዳ አቱማ ናና፤ እ ማጫ ናታ ዲኖ። ሀዋንቱ አ ናናይነ ናና ናናይ ሙሊ ሀታማነ ሄዛ።

16ጋደ አቱማ ናናይ ጻፎና፥ ሀጋ፥ ሹና፥ ኤጽቦና፥ ኤር፥ አሮዳነ አርኤላ።

17አሴራ አቱማ ናናይ ይምና፥ ይሽዋ፥ ይሽዋሀነ ባሪአ፤ ኡንቱንቱ ምቻታ ሰራሆ። ባሪአ አቱማ ናናይ ሄቤራነ ማልክኤላ።

18ላባን ባረ ናት ልዮ እሜዳ ዝልፓ ያቆባዉ የሌዳ ናናይ ሀዋንታ፤ ኡንቱንቱ ሙሊ ታማነ ኡሱፑና።

19ያቆባ ማቻት ራሄል አቱማ ናናይ ዮሴፎነ ቢንያማ።

20ኦና ካታማ ቄስያ ጶጽፋራ ናታ አስናታ ዮሴፎዉ ግብጼን ምናሳነ ኤፍሬማ የላዱ።

21ቢንያማ ናናይ በላአ፥ በኬራ፥ አሽቤላ፥ ጌራ፥ ናእማና፥ ኤሀ፥ ሮሻ፥ ሙፒማ፥ ሁፒማነ አራዳ።

22ያቆባዉ የለቴዳ ራሄል አቱማ ናናይ ሀዋንታ፤ ኡንቱንቱ ሙሊ ታማነ ኦይዳ።

23ዳና አቱማ ናአይ ሁሺማ።

24ንፍታሌማ አቱማ ናናይ ያህጽኤላ፥ ጉና፥ የጼራነ ሺሌማ።

25ላባን ባረ ናት ራሄልዉ እሜዳ ባላ ያቆባዉ የሌዳ ናናይ ሀዋንታ፤ ኡንቱንቱ ሙሊ ላፑና።

26ያቆባና ግብጼ ቤዳ፥ አ ጉልባታፐ የለቴዳዋንቱ፥ አ ናና ማቻቱዋ ጉጀናን፥ ሙሊ ኡሱፑን ታማነ ኡሱፑና።

27ግብጼን ዮሴፎዉ የለቴዳ ላኡ ናና ጉጅና፥ ግብጼ ቤዳ ያቆባ ሶ አሳይ ሙሊ ላፑን ታማ።

28ገሴመ ቢታን ሞካና ማላ፥ ያቆብ ይሁዳ ባረፐ ስንዉ ዮሴፎኮ ኪቴዳ፤ ኡንቱንቱ ገሴመ ጋኬዳ ዎደ፥

29ዮሴፎ ባረ ፓራ ጋርያ ጊግሲደ፥ ባረ አዉዋ እስራኤላና ጋከታናዉ ገሴመ ቤዳ። ዮሴፎ ባረ አዉዋ ደሜዳ ሳናካ አ ቆያን ጻጸት ቆም፥ ዳሮ ዎድያ ዬኬዳ።

30እስራኤሊ ዮሴፎ፥ “ኔን ፓጻ ደእሽን፥ ታን ነ አይፍያ በኤዳ ድራዉ፥ ሀእ ታን ሀይቂንቶነ አይነ ባዋ” ያጌዳ።

31ሄዋፐ ጉየ፥ ዮሴፎ ባረ እሻቱዋነ ባረ አዉዋ ሶ አሳ፥ “ታን ግብጼ ካትያኮ ባና፤ አዉ፥ ‘ካናነ ቢታን ደእያ ታ እሻቱዋነ ታ አዉዋ ሶ አሳይ ታኮ ዬድኖ።

32ኡንቱንቱ ዶርሳ ሄንንቻ፤ ኡንቱንቱ መህያ ሄምኖ፤ ኡንቱንቱ ባረናና ባረንቱ ዶርሳቱዋ፥ ባረንቱ ምያቱዋነ ባረንቶ ደእያዋ ኡባ አኪደ ዬድኖ’ ያጋና።

33ካቲ ህንተንታ ጼስሲደ፥ ‘ህንተ ኪታይ አዬ?’ ያጊደ ኦቾፐ፥

34ህንተንቱ አዉ፥ ‘ኑን ነ ቆማቱ ናአተፐ ዶሚደ፥ ኑ አዎቱዋዳን መህያ ሄሜቶ’ ያግተ። እ ህንተንታ ገሴመ ጋድያን ዎናዋ፤ አያዉ ጎፐ፥ ዶርሳ ሄንንቻ ኡባይ ግብጼ አሳን ካቴዳዋ” ያጌዳ።

← Chapter 45 Chapter 47 →