Ezekiel 42

Amharic Dawro DFBE (ጌሻ ማጻፋ) No Year

1ሄዋፐ ጉይያን፥ ሄ ብታኒ ታና ሁጲሳ ባጋ ፐንግያና ካረ ዳባባ ካለደ ጌሻ ጎልያ ግዶ ዳባባ ግምቢያና ኦይቀቴዳ ጎልያኮ፥ ታና አሄዳ።

2ሄ ጎልያ ፐንጊ ፑደ ባጋ ስሚደ፥ ሄ ጎሊ 100 ዋ አዱሳነ 50 ዋ አኮ።

3ግዶ ዳባባፐ ላታሙ ዋ ሃኪደ፥ ቃይ ስን ባጋና ካረ ዳባባን ደእያ ሂጸቴዳ ሹቻፐ ስን ባጋና እቱ እቱዋና ጼለትያ ሄዙ ደይ ደእያ ፖቂ ደኤ።

4ሄ ክፍለቱዋ ፐንገቱ ሁጲሳ ጼሊኖ። ኡንቱንቱፐ ስን ባጋና 10 ዋ አኮነ 100 ዋ አዱሳ ግዴዳ፥ ግዱዋና አያ ኦጊ ደኤ።

5ሄ ጎልያ ቦላ ሄዘን ፖቂ ላኤንዋፐ ጹሜ፤ ላኤን ቃይ ኮይሩዋፐ ጹሜ። ጋሶታይካ ኡንቱንቱ እቱ እቱዋፐ ጉየ ሺቅ ሺቂደ ግምበቴዳ ድራሳ።

6ቃይ ኡንቱንቱ ሄዙ ፖቅያን ደእያ ክፍለቱ ቆሞዋንቱፐ ጋርሳዋንቱነ ግዶ ዛዋን ደእያ ክፍለቱ ጹምያ ድራዉ ካረ ዳባባን ደእያ ሀራ ጎለቱዋዳን፥ ኡንቱንቶ ቱሳይ ባዋ።

7ሄ ክፍለቱዋፐ ስን ባጋና፥ 50 ዋ አዱቂያ ካረ ዳባባ ባጋና ደእያ እት ግምቢ ደኤ።

8ካረ ዳባባ ባጋና ደእያ ክፍለቱዋ አዱሳተይ 50 ዋ አዱቂያዋ ግድሽን ጌሻ ጎልያ ስንን ደእያ ክፍልያ አዱሳተይ 100 ዋ።

9ካረ ዳባባፐ ሶ ገልያ ዎደ አዋይ ዶልያ ባጋና ጋርሳ ክፍለቱዋ ገልያ ፐንጊ ደኤ።

10ሄዋዳንካ፥ ጌሻ ጎልያፐ ገድሳ ባጋና ካረ ዳባባ ግምቢያ ካሊደ ጌሻ ጎልያ ዳባባና ኦይቀቴዳነ ካረ ዳባባኮ ጼልያ ሀራ ክፍለቱ ደኢኖ።

11ሄ ጎልያ ክፍለቱዋ ስንን አሳይ ሀመትያ ኦጊ ደኤ። ሄ ጎሊ ሁጲሳ ባጋን ደእያ ጎልያና እት ማላ፤ አዱሳተይ፥ አኮተይ፥ ክፍለቱነ ፐንገቱ ኡባይ እት ማላ።

12ድርሳ ግምቢ ዉርያ አዋይ ዶልያ ባጋ ጋጻፐ ዶሚደ ግምቢ ዶምያ ገድሳ ባጋና ደእያ ክፍለቱዋ ገልያ ፐንጊ ደኤ።

13ሄዋፐ ጉይያን፥ ሄ ብታኒ ታና ሀዋዳን ያጌዳ፤ “ሀዋንቱ ክፍለቱ፥ ሁጲሳናነ ገድሳና ጌሻ ጎልያ ካረ ዳባባኮ ጼልያዋንቱ ቄሳቱ ዋ ክፍለቱዋ። ኡንቱንቱ ግዶን መና ጎዳ ስንን ኦያ ቄሳቱ ኡባፐ አዳ ጌሻ ቁማ ማና። ሄ ክፍለቱ ጌሻ ግዴዳ ድራዉ፥ ኡባፐ አዳ ጌሻ እሞታ፥ ሄዋንቱነ ካ ያርሹዋ፥ ናጋራ ያርሹዋነ ናቁዋ ያርሹዋ ኡባ፥ ኡንቱንቱ ሄዋን ዎና።

14ጌሻ ጎልያ ገሌዳ ቄሳቱ ካረ ዳባባ ከስያ ዎደ፥ ጾሳዉ ኦያ ዎደ ማዬዳ ጌሻ ማዩዋ ከሲደ፥ ሄ ክፍለቱዋን ዎናን ከስክኖ። አያዉ ጎፐ፥ ማዮቱ ጌሻ። ኡንቱንቱ ካረ አሳኮ ከሲደ፥ ካሰ ማይያ ሀራ ማዮቱዋ ማዪደ ከሳናዉ ኮሼ” ያጌዳ።

15ሄ ብታኒ ጌሻ ጎልያ ጋርሳ ዳባባን ደእያ ኬቱዋ ልኪ ዉርሲደ፥ አዋይ ዶልያ ባጋ ጼልያ ድርሳ ፐንግያና ታና ካረ ከሴዳ። ጌሻ ጎልያ ዩሽ አደ ልኬዳ።

16ጻምኣ አኪደ፥ አዋይ ዶልያ ባጋ ልክና፥ 500 ዋ ግዴዳ።

17ስሚደ ሁጲሳ ባጋ ሄ ጋትማን ልክና 500 ዋ ግዴዳ።

18ስሚደ ገድሳ ባጋ ልክና 500 ዋ ግዴዳ።

19ስሚደካ አዋይ ዉልያ ባጋ ልኬዳ፤ እካ 500 ዋ ግዴዳ።

20ሄዋዳን ኦደ፥ እ ኦይዱ ባጋቱዋካ ልኬዳ። አ ዩሹዋን 500 ዋ አዱቂደ፥ 500 ዋ አክያ ድርሳ ግምቢ ደኤ። ሄ ግምቢ ጌሻ ሳኣ የንኮ ጮ ሳኣፐ ሻካናሳ።

← Chapter 41 Chapter 43 →