Ezekiel 25

Amharic Dawro DFBE (ጌሻ ማጻፋ) No Year

1መና ጎዳ ቃላይ ታኮ ሀዋዳን ያጊደ ዬዳ፤

2“ላ አሳ ናአዉ፥ ነ ሶምኡዋ አሞና ቢታኮ ዛራደ፥ አሞናቱዋ ቦላ ትምቢትያ ኦዳ።

3ሀዋዳን ያጋ፤ ‘ኡባ ሞድያ መና ጎዳ ቃላ ስስተ። ኡባ ሞድያ መና ጎዳይ ሀዋዳን ያጌ፤ “ህንተ ታ ጌሻ ጎሊ ቱንያ ዎደ፥ እስራኤልያ ቢታይ መላ አትያ ዎደነ ይሁዳ አሳይ ኦሞዶ ብያ ዎደ፥ ሀሹ! ጌዳ ድራዉ፥

4ታን ህንተና አዋይ ዶልያ ባጋ ቢታ አሳዉ ላታ ኦደ እማና። ያቶፐ ኡንቱንቱ ህንተ ግዶን ካምቢያ ኬጻና፤ ደአና። ህንተ ማና ቴራ ኡንቱንቱ ማና፤ ህንተ ማካ ኡንቱንቱ ኡሻና።

5ታን ራባ ካታማ ጋሎቱ ሄመትያ ሳኣ ከሳና፤ አሞናቱዋ ጋድያካ ዶርሳ ዉዲ አላጽያ ሳኣ ኦና። ታን መና ጎዳ ግድያዋ ህንተ ሄዋን ኤራና” ያጌ።

6“ ‘አያዉ ጎፐ፥ ኡባ ሞድያ መና ጎዳይ ሀዋዳን ያጌ፤ “ህንተ እስራኤልያ ባሻን ኩሽያ ባቄዳ ድራዉ፥ ጉፔዳ ድራዉነ ናሸቲደ ቅሊጬዳ ድራዉ፥

7ታን ህንተ ቦላ ታ ኩሽያ የዳድ። ህንተና ካዉተቶ ኦሞዱዋ ኦደ እማና። ታን ህንተና አሳ ግዶፐ ሾዳና፤ ካዉተቱዋ ግዶፐካ ይሳና። ታን መና ጎዳ ግድያዋ ህንተ ሄዋን ኤራና” ያጌ።

8“ ‘ኡባ ሞድያ መና ጎዳይ ሀዋዳን ያጌ፤ “ሞኣብነ ሰኢር፥ በእተ፥ ይሁዳይ ሀራ ካዉተቱዋ ማላ ያጌዳ ድራዉ፥

9ታን ሞኣባ ቢታ ቦላን ገላደ፤ ዎራጃደ አ ዛዋ ናግያ፥ ቤት-ያሽሞታ፥ ባኣል-ማኦናነ ቅርያታይማ ጌተትያ፥ ኤረቴዳ ካታማቱዋ ይሳና።

10ሀዋፐ ስንናዉ አሞናቱዋናካ ጉጃደ፥ ኡንቱንቱ ካዉተቱዋ ግዶን ሀሳየተናዳን፥ ታን ኡንቱንታ አዋይ ዶልያ ባጋ ቢታፐ ዬዳ አሳቶ ዱረታዳን አደ እማና።

11ታን ሞኣባ ፕርዳና። ሄ ዎደ ታን መና ጎዳ ግድያዋ ኡንቱንቱ ሄዋን ኤራና” ያጌ።

12“ ‘ኡባ ሞድያ መና ጎዳይ ሀዋዳን ያጌ፤ “ኤዶማቱ ይሁዳ ቦላ ሀሉዋ ከሴዳ ድራዉነ ዳሮ ባይዛንቻ ግዴዳ ድራዉ፥

13ታን ኡባ ሞድያ መና ጎዳይ ታ ኩሽያ ኤዶማ ቦላ የዳና። አን ደእያ አሳነ መህያ ሙለ ይሳና፤ ይሳደ መላ ከሳና። ተማና ካታማፐ ቢደ፥ ዳዳና ካታማ ጋካናዉ፥ ኡንቱንቱ ማሻን ቡሳከታና።

14ታን ኤዶማዉ ታ አሳ እስራኤልያ ባጋና ሀሉዋ ከሳና። እስራኤላቱ ኡንቱንቱ ቦላ ታ ሀንቁዋነ ታ ሀንቁዋ ኬሻ ኦና። ታን ሀሉዋ ከሴዳዋ ኡንቱንቱ ኤራና። ታን ኡባ ሞድያ መና ጎዳይ ሀዋ ኦዳይ” ያጌ።

15“ ‘ኡባ ሞድያ መና ጎዳይ ሀዋዳን ያጌ፤ “ፕልስጼማቱ ባረንቱ ዎዛና ኢታተን ሀሉዋ ከሴዳ ድራዉነ ጋምኤዳ ሞርከተን ይሁዳ ካደ ይሳናዉ ኮዬዳ፥

16ሄዋ ድራዉ ኡባ ሞድያ መና ጎዳይ ሀዋዳን ያጌ፤ ታን ታ ኩሽያ ፕልስጼማቱዋ ቦላ የዳደ ከሊታዌቱዋ ቃንጻና። ታን ኡንቱንታነ አባ ዶናን አቴዳዋንታ ኡባ ይሳና።

17ታን ኡንቱንቶ ዎልቃማ ሀሉዋ ከሳና፤ ታ ሀንቁዋን ኡንቱንታ ሙራና። ታን ኡንቱንቶ ሀሉዋ ከስያ ዎደ፥ ታን መና ጎዳ ግድያዋ ኡንቱንቱ ኤራና” ያጌ’ ያጋ” ያጊደ ዬዳ።

← Chapter 24 Chapter 26 →