Exodus 18

Amharic Dawro DFBE (ጌሻ ማጻፋ) No Year

1ሚድያማ ጋደ ቄሲ፥ ሙሴ ቦሉ ዮቶረ፥ ጾሳይ ሙሴዉነ አ አሳ እስራኤልያዉ ኦዳባ ኡባነ መና ጎዳይ እስራኤልያ ግብጼፐ ከሴዳዋ ስሴዳ።

2ሄ ዎደ ሙሴ ቦሉ፥ ዮቶረ፥ ሙሴ አኮ የዲደ ቤዳ አ ማቻቶ ጽፓሮነ እዝ ላኡ ናና አሄዳ። ኡንቱንቱፐ እቱዋ ሱንይ ገርሾማ፤ አያዉ ጎፐ፥ ሙሴ፥ “ታን አሳ ጋድያን በተ ግዳድ” ያጌዳ።

4ላኤንዋ ሱንይ ኤልኣዛራ፤ አያዉ ጎፐ፥ እ፥ “ታ አዉዋ ጾሳይ ታና ማዴዳዋ፤ እ ታና ግብጼ ካትያ ማሻፐ አሼዳ” ያጌዳ።

5ሙሴ ቦሉ ዮቶረ አ አቱማ ናናነ አ ማቻትና ጾሳ ደርያ ማታን ደእያ ሙሴኮ መላ ቢታ ዬዳ።

6እ ሙሳ፥ “ታን፥ ነ ቦሉ ዮቶረ፥ ነ ማቻትናነ እዝ ላኡ ናናቱዋና ኔኮ ያይ” ያጊደ አኮ ኪት ዎዳ።

7ሄዋ ድራዉ፥ ሙሴ ባረ ቦሉዋና ጋከታናዉ ከሲደ፥ አዉ ጎይኔዳ፥ አ የሬዳ። ኡንቱንቱ እቱ እቱዋ ሳሮደ፥ ዱንካንያ ግዶ ገሌድኖ።

8መና ጎዳይ እስራኤልያ አሳ ድራዉ፥ ካትያ ቦላነ ግብጼቱዋ ቦላ ኦዳ ኡባ፥ ኦግያን ኡንቱንታ ጋኬዳ ዳቡራባ ኡባነ መና ጎዳይ ኡንቱንታ አሼዳዋ ሙሴ ባረ ቦሎ ኦዴዳ።

9እስራኤልያ አሳ ግብጼቱዋ ኩሽያፐ አሻናዉ መና ጎዳይ ኦዳ ሎኦ ኦሶቱዋባ ኡባ ስሲደ፥ ዮቶረ ናሸቴዳ።

10ያቲደ “ህንተና ግብጼቱዋ ኩሽያፐነ ካትያ ኩሽያፐ አሼዳ መና ጎዳይ፥ ግብጼቱዋ ኩሽያፐ አሳ ከስ አኬዳዌ፥ እ ጋላተቶ።

11መና ጎዳይ ሀራ ጾሳቱዋፐ ኡባፐ ዎልቃማ ግድያዋ ታን ሀእ ኤራድ፤ አያዉ ጎፐ፥ እ ሀ እስራኤልያ አሳ ቦላ ኦተረቴዳ ግብጼ ጾሳቱዋ ቦላ ሀዋ ኦዳ” ያጌዳ።

12ሄዋፐ ጉይያን ዮቶረ፥ ሙሴ ቦሉ፥ ሹከቲደ ፖሎ ጹገትያ እት መህያ ያርሹዋነ ሀራ ያርሾ ሹከቴዳ አሹ ሜተትያ መህያ ያርሹዋ ጾሳዉ አሄዳ፤ አሮነነ እስራኤልያ ጭማቱ ኡባይ ጾሳ ስንን ሙሴ ቦሉዋና ቁማ ማናዉ ዬድኖ።

13ዎንተ ጋላስ ሙሴ አሳዉ ፕርዳናዉ ኡቴዳ፤ አሳይ ሙሴ ዩሹዋን ዎንታፐ ኦማርስ ጋካናዉ ኤቄዳ።

14ሙሴ ቦሉ ሙሴ አሳዉ ኦያዋ ኡባ በኢደ፥ “ኔን ሀ አሳዉ ኦያዌ ሀዌ አዬ? አሳይ ኡባይ ዎንታፐ ዶሚደ ኦማርስ ጋካናዉ ነ ዩሹዋን ኤቂደእሽን፥ ኔን ኔረካ ዳናዳን አያዉ ኡታድ?” ያጌዳ።

15ሙሴ ባረ ቦሉዋ፥ “አሳይ ጾሳ ሸንያ ኦቻናዉ ታኮ ይያ ድራሳ።

16ኡንቱንቶ የዉ ደኦፐ ታኮ ዪኖ፤ ታን እት ኡራ ግዱዋንነ አ ሾሩዋ ግዱዋን ፕርዳይ፤ ጾሳ አዛዙዋነ ዎጋ ኡንቱንታ ኤርሳይ” ያጌዳ።

17ሙሴ ቦሉ፥ “ሀዌ ኔን ኦያባይ ሎኤና።

18ኔንነ ኔናና ደእያ አሳይ ዳቡራ ጻላላ ግዲታ፤ ሀ ኪታይ ነዉ ሎይ ዴጾ፤ ኔን ሀዋ ኔረካ ኦናዉ ዳንዳያካ።

19አነ ሀእ ታን ኦድያዋ ስሳ፤ ታን ኔና ዞራና፤ ጾሳይ ኔናና ግዶ። ኔን ሀ አሳ ድራዉ ጾሳ ስን አ፤ ኔን ኡንቱንቱ የዉዋ ጾሳኮ አሀ።

20አዛዙዋነ ዎጋ ኡንቱንታ ኔን ታማርሳ፤ ኡንቱንቱ ደአና ማራነ ኦና ኦሱዋ ኡባ ኡንቱንታ በሳ።

21ቃይ አሳ ኡባ ግዶን ዳንዳይያ አሳቱዋ፥ ጾሳዉ ያይያዋንታ፥ አማነቴዳዋንታነ ማጋንጻ ምያዋ እጽያዋንታ ዶራደ ኡንቱንቱፐ አሳዉ ሻኣ ካፓቱዋ፥ ጼቱዋ ካፓቱዋ፥ እሻታሙዋ ካፓቱዋነ ታሙዋ ካፓቱዋ ሱን።

22ኡንቱንቱ ኡባ ዎደ አሳዉ ፕርድኖ፤ ሽን ዋይስያ የዉዋ ኡባ ኔኮ አህኖ፤ ዋይሰና የዉዋ ኡባ ኡንቱንቱ ዉርስኖ። ኡንቱንቱ ኔናና ሻከትያ ድራዉ፥ ቶኩ ነዉ ካዉሻናዋ።

23ኔን ሄዋዳን ኦፐነ ሀዌ ጾሳ አዛዞ ግዶፐ፥ ኔን ዳንዳያና። ቃይ ሀ አሳይ ኡባይካ ባረ አላሊ ፖለትና፥ ባረ ሶ ባረ ሶ ባናዋ” ያጌዳ።

24ሙሴ ባረ ቦሉዋ ቃላ ስሴዳ፤ እ ጌዳዋ ኡባካ ኦዳ።

25ሙሴ እስራኤልያ ኡባ ግዶፐ ዳንዳይያ አሳቱዋ ዶሪደ አሳ ካለያ ሻኣ ካፓቱዋ፥ ጼቱዋ ካፓቱዋ፥ እሻታሙዋ ካፓቱዋነ ታሙዋ ካፓቱዋ ሱንዳ።

26ኡንቱንቱ አሳዉ ኡባ ዎደ ፕርዴድኖ፤ ኡንቱንቱ ባረና ዴጼዳ የዉዋ ሙሴኮ አሄድኖ፤ ሽን ዴጸና የዉዋ ኡባ ኡንቱንቱ ዉርሴድኖ።

27ሄዋፐ ጉይያን ሙሴ ባረ ቦሉዋ ሞይዝና ዮቶረ ባረ ጋድያ ስሜዳ።

← Chapter 17 Chapter 19 →