Esther 7

Amharic Dawro DFBE (ጌሻ ማጻፋ) No Year

1ካቲነ ሀማን ካታት አስትር ባላ ማናዉ ቤድኖ።

2ሄ ላኤን ጋላሳ ሾብያዉ ቢደ፥ ኡንቱንቱ ዎይንያ ኤሳ ኡሽ ደእሽን፥ ካቲ ቃይካ፥ “ካታት አስቴረ፥ ኔን ዎስያባይ አዬ? ታን ነዉ እማና። ቃይ ኔን ታና ኦችያባይ አዬ? ሀራይ አቶ ታ ካዉተፐ ባጋ ግዶፐነ፥ ታን ነ ኦሻ ፖላና” ያጊደ ኦቼዳ።

3ካታታ አስትራ ዛራደ ያጋዱ፤ “ካትያዉ፥ ኔን ታናን ናሸቴዳዋ ግዶፐ፥ ቃይ ታ ኦሻካ ፖላናዉ ኔን ዶሴዳዋ ግዶፐ፥ ታ ዎሳይነ ታ ኦሻይ ታንነ ታ አሳይ ሀይቀናን አታናሳ።

4አያዉ ጎፐ፥ ታንነ ታ አሳይ እቱነ አተናን ዉራናዉ ሀይቃናዉነ ያናዉ ዛልኤቴዶ። ኑን ዛልኤቴዳዌ ማጫ አይለነ አቱማ አይልያ ግዲደ ደአናዉ ግድንቶ፥ ታን ጮኡ ጋና፤ አያዉ ጎፐ፥ ሄዋ ማላ መቱ ካትያ ዋይሳናዉ በስያዋ ግደና” ያጋዱ።

5ካቲ አርጸክስስ ዛሪደ፥ “ሄዋ ኦናዉ ጻሌዳዌ ኦኔ? እ ሄ ብታኒ ሀቃን ደኢ?” ያጊደ ካታቶ አስቴሮ ኦቼዳ።

6አስትራ፥ “ኑ ሞርኪ፥ ኑና የደርስያዌ ሀዋ ሀ ኢታ ሃማና” ያጋዱ። ሄ ዎደ ሃማን ካትያ ስንንነ ካታት ስንን ዳሮ ዳጋሜዳ።

7ካቲ ሎይ ሀንቀቲደ፥ ባረ ኡቴዳ ሳፐ ደንድ ኤቂደ፥ ካትያ ጎልያ አታክልትያ ሳኣ ቤዳ። ሽን ሃማን ካቲ አ ቦላ ኢታባ አሀናዉ ቃቼዳዋ ኤሬዳ ድራዉ፥ ካታታ አስትራ አ ሀይቁዋፐ አሻና ማላ ዎሳናዉ ጉየ አቴዳ።

8ካቲ ካትያ ጎልያ አታክልትያ ሳፐ ስሚደ፥ ዎንታ ኡንቱንቱ ዎይንያ ኤሳ ኡሽያ ሳኣ ገልያ ዎደ፥ ሃማን ካታት አስትርፐ ማሮታ ዎሳና ጊደ፥ አ ኡቴዳ ግሱዋ ቦላን ጉፋኔዳዋ በኢደ፥ ሀንቁዋን ኤጽ ከሲደ “ላ ሀ ብታኒ ሀዋን ካትያ ጎለን፥ ኡባ ቃይ ታ ስንን፥ ካታትና ግሳናዉ ኮዪየ?” ያጌዳ። ካቲ ብሮ ሄዋ ሃሳይሽን፥ ካትያ ሱንቱ ዪደ፥ ሃማና ዴሙዋ ጉሎዬድኖ።

9ቃይ ኡንቱንቱፐ እቱ፥ ሀርቦና ጌተትያ ካትያዉ ኦያ ጎይረቶዌ፥ “ካትያዉ፥ ሃማን ኔና ሀይቁዋፐ አሼዳ ማርድክዮሳ ካቃና ጊደ ኤሴዳ እሻታሙ ዋ ኮጫይ አ ሶን ደኤ” ያጌዳ። ካቲ ዛሪደ፥ “ሃማና አፊደ፥ ሄ ኮጫን ሱልተ!” ያጊደ አዛዜዳ።

10ሄዋ ድራዉ፥ ማርድክዮሳ ካቃና ጊደ ጊግሴዳ ኮጫን ሀማን ካቀቴዳ። ሄዋፐ ጉይያን፥ ካትያ ሀንቁ ዶቼዳ።

← Chapter 6 Chapter 8 →