Deuteronomy 13

Amharic Dawro DFBE (ጌሻ ማጻፋ) No Year

1“ህንተ ግዶን ትምቢትያ ኦድያዌ ዎይ አኩሙዋ ብልያ አሳይ ደንዲደ፥ ማላታነ ማላልስያባ ኦፐ፥

2እ ኦዴዳ ማላታይ ዎይ ማላልስያባይ ቱሙ ግዲደ ፖለትና፥ እ ህንተና፥ ‘አነ ካሰ ህንተ ኤረና ሀራ ጾሳቶ ጎይኖይተ’ ያጎፐ፥

3ህንተ አ ሙለካ ስሶፕተ። ህንተ አ ኩመን ዎዛናፐነ ኩመን ሸምፑዋፐ መና ጎዳ ህንተ ጾሳ ዶስንቶነ ጊደ፥ ህንተና እ ፓጫናዉ ሄዋ ኦ።

4መና ጎዳ ህንተ ጾሳ ካልተ፤ አዉ ያይተ፤ አ አዛዙዋ ናግተ፤ አ ቃላካ ስስተ፤ አዉ ጎይንተ፤ አፐ ዱጾፕተ።

5ህንተና ግብጼፐ ከሲደ፥ አይለተፐ ህንተና ዎዜዳ መና ጎዳ ህንተ ጾሳ ቦላ ህንተ ማካላናዳን ታማርስያ ትምቢትያ ኦድያዋ፥ ዎይ አኩሙዋ ብልያዋ ዎተ፤ ሄዋ ማላ አሳይ ህንተና መና ጎዳ ህንተ ጾሳ አዛዙዋፐ ዎራ ባናዳን ኦያ ድራዉ፥ ሄዋ ማላ ዎደ፥ ኢታ ህንተ ግዶፐ ድግተ።

6“ሀራይ አቶ ነ ዳይ ናአይ ነ እሻይ፥ ነ አቱማነ ማጫ ናእ፥ ነ ሲቅያ ነ ማቻታ፥ ዎይ ነ ሲቆ ላጊ ኔና፥ ‘ደንዳ፥ ካሰ ኔንነ ነ ማይዛ አዎቱ ጎይን ኤረና ጾሳዉ ጎይናና’ ጎፐ፥

7ቢታዉ ሀ ጋጻፐ ያ ጋጻ ጋካናዉ ደእያ፥ ነ ዩሹዋ ኡባን ማታንነ ሃኩዋን ደእያ አሳይ ኡባይ ጎይንያ ጾሳቶ፥ ‘ደንዳ ቢደ ኡንቱንቶ ጎይናና’ ጊደ ባለፐ፥

8አዉ ኤኖ ጎፓ፤ እ ግያዋካ ስሶፓ። አዉ ቃረታደ አ ጉየ አሾፓ፤

9አ ዎናዉ ኮሼ። አ ዎናዉ ኮይሮ ነ ዶማ፤ ሄዋፐ ጉይያን፥ አሳይ ኡባይ ባረ ኩሽያ አ ቦላ ዎደ ዎ።

10እ ሀይቃና ጋካናዉ፥ ሹቻን ጫድተ፤ አያዉ ጎፐ፥ እ ህንተና ግብጼ ጋድያፐ፥ አይለተ ጎልያፐ ከሴዳ መና ጎዳፐ፥ ህንተ ጾሳፐ፥ ህንተና ሻካናዉ ኮዬዳ።

11እስራኤልያ አሳይ ኡባይ ሄዋ ስሲደ ያያና፤ ቃይ ሄዋ ማላ ኢታባካ ላኤን ህንተ ግዶን ኦንነ ኦና።

12“መና ጎዳይ ህንተ ጾሳይ ህንተ ደአናዳን እምያ ካታማፐ እቱዋን ህንተ ደእያ ዎደ፥

13ህንተ አሳ ግዶን ኢታቱ ደንዲደ፥ አሳ፥ ‘ደንድተ! ቢደ ህንተ ኤረና ጾሳቶ ጎይኔቶ’ ያጊደ ባለያዋ ስሶፐ፥

14ሄ የዉዋባ ኦችተ፤ ምንሲደ ፓይድተ። ቆርና ሄ ህንተ ግዶን ቱናባይ ኦሰቴዳዌ ቱማ ግዶፐ፥

15ሄ ካታማን ደእያ አሳ ኡባ ማሻ ቃራን ዉርስተ፤ ሄ ካታማነ አን ደእያ መህያናካ አሸናን ይስተ።

16ሄ ካታማፐ ህንተ አኬዳ ኦሞዱዋ ኡባ ካታማ ዳባባ ሺሽተ። ሄ ካታማነ አ ኦሞዱዋ ኡባ መና ጎዳዉ፥ ህንተ ጾሳዉ፥ ጹግያ ያርሹዋ ኦደ ዉርስ ጹግተ። እ መናዉካ ላኤን ኬጸተና፤ ላለቴዳ ሳ ግዲደ፥ ሄ ሳአይ አታና።

17ቱና ጌተቴዳ ሚሻፐ አያይነ ህንተ ኩሽያን ቤቶፖ። ያቶፐ፥ መና ጎዳይ ባረ ዎልቃማ ሀንቁዋፐ ስሚደ፥ ህንተና ማራና፤ እ ህንተንቶ ቃረታና። ካሰ ህንተ ማይዛ አዋቶ ጫቄዳ ጫቁዋዳን፥ ህንተ ፓይዱዋ ዳርሳና።

18አያዉ ጎፐ፥ ታን ሀች ህንተና አዛዝያ አዛዞ ኡባ ህንተ ናግያዋን መና ጎዳዉ፥ ህንተ ጾሳዉ አዛዘቶፐ፥ ቃይ መና ጎዳ ህንተ ጾሳ ስንንካ ልከ ግድያባ ኦፐ፥ ሄ ጌዳዌ ህንተንቶ ቱሙ ፖለታና።

← Chapter 12 Chapter 14 →