1 Samuel 29

Amharic Dawro DFBE (ጌሻ ማጻፋ) No Year

1ፕልስጼማ አሳቱ ባረንቱ ኦላንቻቱዋ ኡባ አፌቃን ሺሼድኖ። እስራኤላቱ እዝራኤላን ደእያ ሃ ፑልትያ ማታን ኡቴድኖ።

2ፕልስጼማቱዋ ካፓቱ ባረንቱ ጼታቱዋ ጭታንነ ሻአቱዋ ጭታን ሳልፔድኖ፤ ዳዊተነ አ አሳይ አኪሻራ እትፐ ጉየ ባጋና ሳልፔድኖ።

3ፕልስጼማቱዋ ካፓቱ በኢደ፥ “ሀ እብራዌቱ ሀዋን አይ ኦኖ?” ያጌድኖ። አኪሽ ፕልስጼማቱዋ ካፓቱዋ፥ “ሀዌ በን እስራኤልያ ካትያ ሳኦላ ቆማ ዳዊታ ግደኔ? እ ዳሮ ዎደፐ ታናና እትፐ ደኤ፤ እ ሳኦላ ካዲደ ከሶደፐ ሀኖ ጋካናዉ፥ ታን አን ባላ ደማበይከ” ያጌዳ።

4ሽን ፕልስጼማቱዋ ካፓቶ አኪሻ ሀንቀቲደ፥ “ሀ ብታንያ ኔን አዉ እሜዳ ካታማ ጉየ ዛራ፤ እ ኑናና ኦላ ቦፐ እ ኑና ዛሪደ ኦላና። እ ባረ ጎዳና ስገናዉ ኑ አሳቱዋ ቆያ ሙጭያዋፐ ሀራ ሎእያባይ አዬ?

5ቃይ ማጫ አሳቱ የጺድነ ዱሪደ፥ ‘ሳኦል ባረ ሻኣ ዎዳ፤ ዳዊተ ባረ ታሙ ሻኣ ዎዳ’ ያጊደ ሳቤዳዌ ሀ ዳዊታ ግደኔየ?” ያጌድኖ።

6ሄዋ ድራዉ፥ አኪሽ ዳዊታ ጼሲደ፥ “መና ጎዳይ ኤሮ! ኔን አማነትያ አሳ፤ ኔን ታናና ኦላዉ ባናዋ ታን ናሸታይ፤ ኔን ታኮ ዮደፐ ሀኖ ጋካናዉ፥ ታን ነ ቦላ ባላ ደማበይከ። ሽን ካፓቱ ኔን ኦላዉ ባናዋ ናሸትክኖ።

7ኔን ሀእ ስማደ ሳሩዋን ባ፤ ፕልስጼማቱዋ ካፓቱዋ ናሸቼናዋ አይነ ኦፓ” ያጌዳ።

8ዳዊተ አኪሻ፥ “ታን አይ ኦድታ? ታን ኔናና ደኦደፐ ሀኖ ጋካናዉ፥ ታናን ባላ ደማበይከ ጋዳ፤ ያትና፥ ካትያ ታ ጎዳ ሞርከቱዋና ባደ አያዉ ኦለትክታ?” ያጌዳ።

9አኪሽ ዳዊታ፥ “ጾሳ ኪታንቻዳን ኔን ታዉ አማነትያዋ ግድያዋ ታን ኤራይ፤ ግዶፐነ፥ ፕልስጼማቱዋ ካፓቱ፥ ‘እ ኑናና ኦላ ቦፖ’ ያጌድኖ።

10ሀእ ስም ዎንታና ደንዳደ፥ ኔናና ዬዳ ነ ጎዳ ቆማቱዋናካ እትፐ ሳአይ ዎንትያ ወደ ቢተ” ያጌዳ።

11ዳዊተነ አ አሳቱ ፕልስጼማ ጋድያ ስማናዉ ዎንታ ጉራን ደንዴድኖ፤ ፕልስጼማ አሳቱካ ፑደ እዝራኤላ ቤድኖ።

← Chapter 28 Chapter 30 →