1 Samuel 27

Amharic Dawro DFBE (ጌሻ ማጻፋ) No Year

1ዳዊተ ባረ ዎዛናን፥ “እት ጋላስ ታን ሳኦላ ኩሽያን ዳባታና፤ ታን ፕልስጼማ ጋድያ ባቃታናፐ አትና፥ ሀራባይ ታዉ ሎኤና። ያትና፥ ሳኦል እስራኤልያ ቢታ ኡባን ታና ኮይያዋ አጋና፤ ያቶፐ ታን አ ኩሽያፐ ከሳ አካና” ያጊደ ቆፔዳ።

2ሄዋ ድራዉ፥ ዳዊተነ አናና ደእያ ኡሱፑን ጼቱ አሳቱ ደንዲደ፥ ጋተ ካትያ ማኦካ ናኣ አኪሻኮ ቤድኖ።

3ዳዊተነ አ አሳይ አኪሻራ ጋተን ኡቴድኖ። አሳይ ኡባይ ባረ ሶ አሳ አሳ አኪደ ቤዳ፤ ዳዊተካ ባረ ማቻቱዋ፥ እዝራኤልያ አህኖኣሞነ ናባላ አምአታ፥ ቃርመሎስያ አብጋሎ አኪደ ቤዳ።

4“ዳዊተ ጋተ ባቃቴዳ” ግያዋ ስሲደ፥ ሳኦል ላኤንዋ አ ኮይያዋ አግ ባሼዳ።

5ዳዊተ ካትያ አኪሻ፥ “ኔን ታናን ናሸቶፐ፥ ታን ያን ደአና ማላ፥ ነ ካዉተን ደእያ ካታማቱዋፐ እትኖ ታዉ እማ። ታን ነ ቆማይ ካቲ ደእያ ካታማን ኔናና እትፐ አያዉ ኡታኔ?” ያጌዳ።

6ሄ ጋላስ አኪሽ ጽቅላጋ ካታማ ዳዊታዉ እሜዳ፤ ሀቼ ጋካናዉካ ጽቅላጋ ካታማይ ይሁዳ ካተቱዋሳ ግዲደ አቴዳ።

7ዳዊተ ፕልስጼማ ቢታን እት ላይነ ኦይዱ አግና ደኤዳ።

8ዳዊተነ አ አሳቱ ፑደ ቢደ፥ ጋሹራቱዋ፥ ግርዘቱዋነ አማሌቃቱዋ ኦሊኖ። በኒደፐ ዶሚደ፥ ሄ አሳቱ ሹራፐ ቢደ ግብጼ ጋካናዉ ደእያ ቢታን ደኤድኖ።

9ዳዊተ ሄ ቢታ ኦልያ ዎደ አዉደነ ሄ ቢታን ደእያ ማጫዋ ግዲና፥ አቱማዋ ግዲና፥ ፓጻ አግቤና፤ ዶርሳነ ሚዛ፥ ሀርያነ ጋሉዋ፥ ማዩዋካ አኬዳ፤ ያቲደ አኪሻኮ ስሜ።

10አኪሽ፥ “ሀቼ ሀቃን ሺቄድቴ?” ያጊደ ዳዊታ ኦቼ። ዳዊተ፥ “ኔጌባ ዎራን ደእያ ይሁዳ አሳቱ ቦላ፥ ዎይ ይራህማኤላ አሳቱ ቦላ፥ ዎይ ቄና አሳቱዋ ቦላ ሺቄዶ” ያጌ።

11ኡንቱንቱፐ እት አሳይነ ጋተ ካታማ ዪደ፥ “ዳዊተ ሀዋ ኦዳ” ጊደ ኦደና ማላ፥ ዳዊተነ አ አሳቱ ማጫዋ አቱማዋ አሸናን ዉርስ ዎኖ። ዳዊተ ፕልስጼማ ቢታን ደኤዳ ዎደ ኡባን ሄዋዳን ኦዳ።

12አኪሽ ዳዊታን አማነቲደ፥ “ዳዊተ ባረ አሳን፥ እስራኤላን ሎይ እጸቴዳ፤ ሄዋ ድራዉ፥ እ ታዉ መናዉ ቆማ ግዳና” ያጊደ ቆፔዳ።

← Chapter 26 Chapter 28 →