1 Kings 17

Amharic Dawro DFBE (ጌሻ ማጻፋ) No Year

1ጋላኣደን ትሽበ ግያ ሳፐ ዬዳ፥ ትምቢትያ ኦድያ ኤላሳ ጌተትያ እት ብታኒ ካትያ አካባ ሀዋዳን ያጌዳ፤ “ታን አዉ ኦያ መና ጎዳይ እስራኤልያ ጾሳይ ኤሮ! ሀ ስንና ይያ ላይቱዋን ታን ኦደናን ደእሽን፥ ሳኣን እራይ ቡከና ዎይ ከተርሳይ ቤተና” ያጌዳ።

2ሄዋፐ ስሚደ መና ጎዳ ቃላይ ትምቢትያ ኦድያ ኤላሳኮ ዪደ አ ሀዋዳን ያጌዳ፤

3“ሀዋፐ ደንዳደ አዋይ ዶልያ ባጋ ባ፤ ያን ዮርዳኖሳ ሻፋፐ አዋይ ዶልያ ባጋና ደእያ ካሪታ ሻፋ ማታን ቆሰታ።

4ኔን ሄ ሻፋፐ ሃ ኡሻና፤ ቁራቱ ኔና ሄ ሳኣን ቁማ ምዛናዳን ታን ኡንቱንታ አዛዛድ” ያጌዳ።

5ኤላስ መና ጎዳይ ጌዳዋ ኦዳ፤ ዮርዳኖሳ ሻፋፐ አዋይ ዶልያ ባጋና ደእያ ካሪታ ሻፋ ቢደ፥ ያን ኡቴዳ።

6ዎንታነ ኦማርስ ቁራቱ ኡክነ አሹዋ ኤላሳዉ አሂኖ፤ ሃካ ሻፋፐ ኡሼ።

7ጋድያን እራይ ቡከና ድራዉ፥ ጉ ዎድያፐ ጉይያን ሻፋይ መሌዳ።

8ሄዋፐ ጉይያን መና ጎዳ ቃላይ ኤላሳኮ ዪደ፥ አ ሀዋዳን ያጌዳ፤

9“ሀ ሳፐ ደንዳደ፥ ሲዶና ማታን ደእያ ስራፍታ ባ፤ ያን ደአሻ። እት አምኤ ምሽራታ ኔና ቁማ ምዛናዳን ታን አዛዛድ” ያጌዳ።

10ኤላስ ደንዲደ ስራፍታ ቤዳ፤ እ ካታማ ፐንግያኮ ጋክያ ዎደ፥ እት አምኤ ምሽራታ ም ምጻዉ። ኤላስ ምሽራቶ ጼሲደ፥ “ሀያና፥ ታዉ ኡሻናዉ ሃ ቡልያን አካ ያርኪ” ያጌዳ።

11ምሽራታ ሃ አሀናዉ ቢሽን እ ጼሲደ፥ “ሀያና ጉ ባሶ ኡክካ አካደ ያርኪ” ያጌዳ።

12ምሽራታ አዉ፥ “መና ጎዳይ ነ ጾሳይ ኤሮ! ታዉ ኡክይ ባዋ። ታዉ ኦቱዋን እት ኩቻ ሊነ ጻሩዋን ጉ ዛይተ ጻላላይ ደኤ። ታን ሀዋ ዬዳዌ ጉ ም ምጻደ፥ ሶ ስማደ፥ ህኖካ ታዉነ ታ ናአዉ እት ገደ ኡካናሳነ ሚደ ሀይቃናሳ” ያጋዱ።

13ኤላስ ምሽራትዉ፥ “አየነ ባዋ፥ ያዮፓ፤ ባደ ኔና ጌዳዋዳን ኦ። ሽን ካሰታደ ነ ልያፐ ጉ ኮምፑዋ ኮምፓደ ታዉ አካ ያ፤ ሄዋፐ ስማደ ነዉነ ነ ናአዉ ኮምፓ።

14አያዉ ጎፐ፥ መና ጎዳይ እስራኤልያ ጾሳይ፥ ‘ሳኣ ቦላን መና ጎዳይ እራ ቡክሳና ጋካናዉ፥ ሊ ኦቱዋፐ ዉረና፤ ዛይቲካ ጻሩዋፐ ዉረና’ ያጌ” ያጌዳ።

15ሄዋ ድራዉ፥ ምሽራታ ባደ፥ ኤላስ ኦዴዳዋዳን ኦዱ፤ ሄዋን ኤላስ፥ ምሽራታነ እ ሶ አሳይ ኡባ ጋላስ ቁማ ሜድኖ።

16አያዉ ጎፐ፥ መና ጎዳይ ኤላሳ ባጋና ኦዴዳ ቃላ ናጊደ፥ ኦቱዋፐ ሊ ዉርቤናነ ጻሩዋፐ ዛይቲካ ዉርቤና።

17ጉ ዎድያፐ ጉይያን ሄ ጎልያ ጎዳት ናአይ ሀርጌዳ፤ ሀርጊ ጎብ ጎብ ቢና፥ ዉርሰን ናአይ ሸምፑዋ ተኤቲደ ሀይቄዳ።

18ያትና፥ ምሽራታ ኤላሳ፥ “ጾሳ አሳው፥ ኔን ታና ሞርክያባይ አያነ? ኔን ታ ናጋራ ሀሳይሳደ ታ ናኣ ዎናዉ ያድ?” ያጋዱ።

19ኤላስ እዞ፥ “ነ ናኣ ታዉ ሀማ” ያጌዳ። ናኣ እ ክዉዋፐ አኪደ፥ ፑደ ባረ ደእያ ፖቅያ አፊደ ባረ አርሳን ግስሴዳ።

20ያቲደ መና ጎዳዉ ሀዋዳን ያጊደ ዋሴዳ፤ “አቤት መና ጎዳዉ፥ ታ ጾሳዉ፥ ቃይ ሀ ታን ደእያ ምሽራት አምአት ናኣ ዎደ፥ እ ቦላካ መቱዋ አያይ?” ያጌዳ።

21ሄዋፐ ስሚደ ናኣ ቦላ ሄዙ ገደ ዛቁሊደ፥ መና ጎዳዉ ሀዋዳን ያጊደ ዋሴዳ፤ “አቤት መና ጎዳዉ፥ ታ ጾሳዉ፥ ሀ ናኣ ሸምፑዋ ዛራ” ያጌዳ።

22መና ጎዳይ ኤላሳ ዋሱዋ ስሴዳ። ናኣ ሸምፑካ ስምና፥ ናአይ ፓጼዳ።

23ኤላስ ናኣ አኪደ ፖቅያፐ ዱገ ዎዳ፤ ናኣ አትዉ እሚደ ሀዋዳን ያጌዳ፤ “በአ፥ ነ ናአይ ፓጼዳ” ያጌዳ።

24ሄዋፐ ጉይያን ምሽራታ ኤላሳ፥ “ኔን ጾሳ አሳ ግዴዳዋነ ነ ዶናፐ ኦደትያ መና ጎዳ ቃላይ ቱማ ግዴዳዋ ታን ሀእ ኤራድ” ያጋዱ።

← Chapter 16 Chapter 18 →