1 Corinthians 8

Amharic Dawro DFBE (ጌሻ ማጻፋ) No Year

1ኤቃዉ ያርሼዳ ቁማባ ግዶፐ፥ ኑን ኡባይካ ኤሬቶ። ኤራይ ኦቶርሴ፤ ሽን ሲቁ አማኑዋን ድቼ።

2ኦንነ ባረዉ እትባ ኤርያዋ ማላቶፐ፥ እ ብሮ ኤራናዉ በስያዋ ኤርቤና።

3ሽን ኦንነ ጾሳ ሲቆፐ፥ ጾሳይ አ ኤሬ።

4ሄዋ ድራዉ፥ ኤቃዉ ያርሼዳ ቁማ ሙሳባ ግዶፐ፥ ኤቃ ኡባይ አላምያን አያነ ግደናዋነ፥ እት ጾሳፐ አትን፥ ሀራይ ባይናዋ ኑን ኤሬቶ።

5አያዉ ጎፐ፥ ጮራ ጾሳቱነ ጮራ ጎዳቱ ደኢኖ። ሽን ሀራይ አቶ፥ ሳሉዋን ግድና ሳኣን ግድና፥ ጾሳቱዋ ጌተትያዋንቱ ደኦፐካ፥

6ኡባባ መዳዌ ኑን አዉ ደእያዌ፥ እት ጾሳይ፥ አዉ፥ ኑዉ ደኤ። ቃይ ኡባባይ አን መቴዳዌነ ኑን አን ደእያዌ እት ጎዳይ፥ የሱስ ክርስቶስካ ኑዉ ደኤ።

7ሽን ሀ ኤራይ አሳ ኡባዉ ደኤና። እት እት አሳቱ ኤቃ ዶዬዳ ድራዉ፥ ሀእ ጋካናዉካ፥ “ኤቃዉ ያርሼዳ ቁማ” ያጊደ ሚኖ። ቃይ ኡንቱንቱ ዎዛናይ ሹጋ ግዴዳዋን፥ ኡንቱንቶ ሀ ቁማን ቱኔዳዋ ማላቴ።

8ሽን ቁማይ ኑና ጾሳኮ ሺቃናዳን ማደና። ኑን ማና ይንቶካ ኑዉ አይነ ፓጨና፤ ሞፐነ ኑዉ አይነ ጉጀተና።

9ሽን ሀዌ ህንተ ህንተ ዶሶዋዳን ሀንያዌ ሹጎ አማኑዋና ደእያዋንታ ናጋራን የገና ማላ ናገትተ።

10አያዉ ጎፐ፥ ኔን ኤራንቻይ ኤቃዉ ያርሼዳ ቁማ ማናዉ ኤቃ ጎልያን ኡቴዳ ዎደ፥ ሹጎ አማኑዋና ደእያ እት አሳይ ኔና በኦፐ፥ ኤቃዉ ያርሼዳ ቁማ እ ማናዉ አ ዎዛናይ ቆፐኔዬ?

11ሄዋ ግዶፐ ሀ ሹጎ አማኑዋና ደእያ ነ እሻይ፥ ክርስቶስ አ ድራዉ ሀይቄዳዌ፥ ነ ኤራን ባዬ።

12ሀዋዳንካ፥ ህንተ ህንተ እሻቱዋ ናቂያዋንነ ኡንቱንቱ ሹጎ ዎዛና ማይያዋን ክርስቶሳ ናቂታ።

13ሄዋ ድራዉ፥ ቁማይ አማንያ ታ እሻ ቢያዋ ግዶፐ፥ አ በና ማላ፥ ታ ደእያ ላይን ሙለካ አሹዋ ሚከ።

← Chapter 7 Chapter 9 →