1 Chronicles 13

Amharic Dawro DFBE (ጌሻ ማጻፋ) No Year

1ሄዋፐ ጉይያን፥ ዳዊተ ሱንቱዋና፤ ሻላቃቱዋናነ ጼቱዋ ካፓቱዋና ዞረቴዳ።

2እስራኤልያ አሳ ኡባ፥ “ህንተንቶ ሎአ ማላትያባ ግዶፐነ፥ መና ጎዳ ኑ ጾሳ ሸነ ግዶፐ፥ እስራኤልያ ቢታ ጋጻን ደእያ ኑ ዳቦቱ፥ ቄሳቱ ነ ባረንቱ ካታማን ደእያ ሌዋቱ ኑናና እትፐ ሺቃናዳን አሳ ኪቶይተ።

3ሳኦል ካተቴዳ ዎደ ሸነኮ ጊና፥ ዶገቲደ አቴዳ ኑ ጾሳ ታቦታ አነ ዛሪደ አሆይተ” ያጌዳ።

4ዳዊተ ኦዴዳ የዉ ሱረ ግዴዳ ድራዉ፥ አሳይ ኡባይ ማዬዳ።

5ሄዋ ድራዉ፥ ዳዊተ ጾሳ ታቦታ ቅርያት-ይኣሪማፐ አሀና ማላ፥ ግብጼ ዛዋፐ ሽሆራ ሻፋፐ ዶሚደ፥ ሀማታ ፕኑዋ ጋካናዉ ደእያ እስራኤልያ አሳ ኡባ ሺሼዳ።

6ዳዊተነ እስራኤልያ አሳይ ኡባይ ክሩበቱዋፐ ግዱዋን ባረ ካዉተ አራታ ቦላ ኡቴዳ ጾሳ ሱንን ጼሰቴዳ ጾሳ ታቦታ አሀናዉ ይሁዳ ቢታን ደእያ ባኣላ ጌተትያ ቅርያት-ይኣሪማ ካታማ ቤድኖ።

7ጾሳ መና ጎዳ ታቦታ ቦራይ ጎችያ ኦራ ጋርያን ዎደ፥ አብናዳባ ሶፐ አሄድኖ፤ ኡዝነ አህዮይ ጋርያ ላጊኖ።

8ዳዊተነ እስራኤልያ አሳይ ኡባይ ዲነ ማስንቁዋ ዲጺደ፥ ካባሩዋ ባቂደ፥ ዳላ ቃደነ ጹሩምባ ፑኒደ፥ ባረንቱ ኩመን ዎልቃን ጾሳ ስንን ናሸቲደ ቦንቼድኖ።

9ኡንቱንቱ ኪዶና ግያ ሳን ደእያ ካ ቡክያ ኡዱማ ጋክያ ዎደ፥ ቦራቱ በትና፥ ኡዝ ታቦታ ኦይቃናዉ ባረ ኩሽያ የዴዳ።

10አ ኩሺ ታቦታ ቦቼዳ ድራዉ፥ መና ጎዳ ሀንቁ ኡዛ ቦላ ኤጽ ከሴዳ። ሄዋ ድራዉ፥ ጾሳይ አ ሾጭና፥ እ ሄ ሳኣን ጾሳ ስንን ሀይቂ አጌዳ።

11መና ጎዳይ ሀንቀቲደ ኡዛ ዎዳ ድራዉ፥ ዳዊተ ይሎቴዳ። ሀቼ ጋካናዉ፥ ሄ ሳአይ ፔረዝ ኡዛ ጌተቲደ ጼሰቴዳ። ኡዝ ሾጨቶ ሳኣ ጌተቴ።

12ሄ ጋላስ ዳዊተ ጾሳዉ ያዬዳ ድራ፥ “ጾሳ ታቦታ ታኮ ዋታ አሀናዉ ዳንዳያይታ?” ያጌዳ።

13ሄዋ ድራዉ፥ ታቦታ ባረናና ዳዊታ ካታማ አፍቤና። ሽን ጋትያ ኦቤድ-ኤዶማ ጌተትያ ብታንያ ሶ አፌዳ።

14ጾሳ ታቦታይ ኦቤድ-ኤዶማ ጎለን አ ጎልያ አሳና ሄዙ አግና ጋምኤዳ። መና ጎዳይ አ ጎልያ አሳነ አዉ ደእያ ኡባባ አንጄዳ።

← Chapter 12 Chapter 14 →