Psalms 116

Amharic Catholic Version (መጽሐፍ ቅዱስ - (ካቶሊካዊ እትም - ኤማሁስ)) No Year

1ሃሌ ሉያ! ጌታ የልመናዬን ድምፅ ሰምቶአልና ወደድሁት።

2ጆሮውን ወደ እኔ አዘንብሏልና በዘመኔ ሁሉ እጠራዋለሁ።

3የሞት ገመዶች ወጠሩኝ፥ የሲኦልም ሕማም አገኘኝ፥ ጭንቀትንና መከራን አገኘሁ።

4የጌታን ስም ጠራሁ፦ አቤቱ፥ ነፍሴን አድናት።

5ጌታ መሓሪና ጻድቅ ነው፥ አምላካችንም ርኅሩኅ ነው።

6ጌታ የዋሆችን ይጠብቃል፥ ተዋረድሁ፥ እርሱም አዳነኝ።

7ነፍሴ ሆይ፥ ወደ ዕረፍትሽ ተመለሺ፥ ጌታ መልካም አድርጎልሻልና፥

8በእርግጥም ነፍሴን ከሞት፥ ዓይኔንም ከእንባ፥ እግሬንም ከመሰናከል አድነሃል።

9በሕያዋን አገር በጌታ ፊት እሄዳለሁ።

10አመንሁ ስለዚህም ተናገርሁ፥ እኔም እጅግ ተቸገርሁ።

11እኔም ከድንጋጤዬ የተነሣ፦ “ሰው ሁሉ ሐሰተኛ ነው አልሁ”።

12ስላደረገልኝ መልካም ነገር ሁሉ ለጌታ ምንን እመልሳለሁ?

13የመድኃኒትን ጽዋ ከፍ አደርጋለሁ ፥ የጌታንም ስም እጠራለሁ።

14በሕዝቡ ሁሉ ፊት፥ እነሆ ስእለቴን ለጌታ እፈጽማለሁ።

15የቅዱሳኑ ሞት በጌታ ፊት የከበረ ነው።

16አቤቱ፥ እኔ አገልጋይህ ነኝ፥ አገልጋይህ፥ የሴት አገልጋይህም ልጅ ነኝ፤ ሰንሰለቴን ሰበርህ።

17ለአንተ የምስጋና መሥዋዕትን እሠዋለሁ፥ የጌታንም ስም እጠራለሁ።

18በሕዝቡ ሁሉ ፊት ስእለቴን ለጌታ እፈጽማለሁ፥

19በጌታ ቤት አደባባይ፥ ኢየሩሳሌም ሆይ፥ በመካከልሽም እንዲሁ። ሃሌ ሉያ።

← Chapter 115 Chapter 117 →