Psalms 87

Amharic 2000 (የአማርኛ መጽሐፍ ቅዱስ (ሰማንያ አሃዱ))

1የድኅነቴ አምላክ እግዚአብሔር፥ በቀንና በሌሊት በፊትህ ጮኽሁ፤

2ጸሎቴ ወደ ፊትህ ትግባ፥ ጆሮህንም ወደ ልመናዬ አዘንብል፤

3ነፍሴ መከራን ጠግባለችና፥ ሕይወቴም ለሞት ቀርባለችና።

4ወደ ጕድጓድ ከሚወርዱ ጋር ተቈጠርሁ፥ ረዳትም እንደሌለው ሰው ሆንሁ።

5እንደ ተገደሉና በመቃብር ውስጥ እንደ ተጣሉ፥ ለዘለዓለም እንደማታስባቸው በሙታን መካከል የተጣልሁ ሆንሁ፤ እነርሱ ከእጅህ ርቀዋልና።

6በጨለማና በሞት ጥላ ውስጥ፥ በታችኛው ጕድጓድ አስቀመጡኝ።

7በእኔ ላይ ቍጣህ ጸና፥ መቅሠፍትህን ሁሉ በእኔ ላይ አመጣህ።

8የሚያውቁኝን ከእኔ አራቅህ፤ በእነርሱ ዘንድ ርኩስ አደረግኸኝ፤ ያዙኝ፥ መውጫም የለኝም።

9ዐይኖቼም በችግር ፈዘዙ፤ አቤቱ፥ ሁልጊዜ ወደ አንተ ጮኽሁ፥ እጆቼንም ወደ አንተ ዘረጋሁ።

10በውኑ ለሙታን ድንቅን ታደርጋለህን? ወይስ ያመሰግኑህ ዘንድ ባለ መድኀኒቶች ያነሡአቸዋልን?

11በመቃብርስ ውስጥ ያሉት ቸርነትህን፥ እውነትህንስ በሞት ስፍራ ይናገራሉን?

12ተአምራትህ በጨለማ ይታወቃልን? ቅንነትህስ በምድር ተረሳን?

13አቤቱ፥ እኔ ግን ወደ አንተ ጮኽሁ፤ በጥዋት ጸሎቴ ወደ አንተ ትድረስ።

14አቤቱ፥ ጸሎቴን ለምን ትጥላለህ? ፊትህንስ ከእኔ ለምን ትመልሳለህ።

15እኔ ድሃ ነኝ፥ ከሕፃንነቴ ጀምሮ ደከምሁ። ከፍ ከፍ ካልሁ በኋላ ተዋረድሁ፥ ተናቅሁም።

16መቅሠፍት በላዬ አለፈ፥ ግርማህም አስደነገጠኝ።

17ሁልጊዜ እንደ ውኃ ከበቡኝ፥ በአንድነትም ያዙኝ።

18ወዳጆቼንና ባልንጀሮቼን ዘመዶቼንም ከችግሬ የተነሣ ከእኔ አራቅህ።

← Chapter 86 Chapter 88 →